ଗଞ୍ଜାମ ଜିଲ୍ଲା ଦିଗପହଣ୍ଡି ଥାନା ଅନ୍ତର୍ଗତ ବନ୍ଥପଲ୍ଲୀ ପଞ୍ଚାୟତ ନୂଆ ଅନନ୍ତେଇ ଗ୍ରାମ ଦୁଷ୍ମନ୍ତ ହତ୍ୟା ମାମଲାର ଦୀର୍ଘଦିନ ବିତିଯାଇଥିଲେ ମଧ୍ୟ ଅଭିଯୁକ୍ତମାନଙ୍କୁ ଧରିବାରେ ଦିଗପହଣ୍ଡି ପୋଲିସକୁ ଏକ ପ୍ରକାର ସଫଳତା ବୋଲି ଜଣାପଡିଛି । ପୂର୍ବରୁ ଏହି ମାମଲାରେ ଦିଗପହଣ୍ଡି ପୋଲିସ ୮ ଜଣକୁ ଗିରଫ କରି କୋର୍ଟଚାଲାଣ କରିଥିଲା । ଏନେଇ ବୁଧବାର ଦିନ ନୂଆ ଅନନ୍ତେଇ ଗ୍ରାମର ବୀଣା ସେଠୀଙ୍କ ପୁଅ ଅମି ସେଠୀଙ୍କୁ (୩୨) ଗିରଫ କରି କୋର୍ଟଚାଲାଣ କରିଥିବା ସୂଚନା ମିଳିପାରିଛି । ଖବରନୁଯାୟୀ , ଗତ ଫେବୃଆରୀ ୨୮ ତାରିଖ ବିଳମ୍ବିତ ରାତିରେ ସିଗାରେଟ ବାକିକୁ କେନ୍ଦ୍ର କରି ଗ୍ରାମର ଦୁଷ୍ମନ୍ତ ଚୌଧୁରୀ ଓ ତାଙ୍କ ପରିବାରକୁ ୧୧ ଜଣ ସଂଘବଦ୍ଧ ଭାବେ ଢେଲାପଥର ମାଡ଼ ମାରିବା ସହ ଘଟଣାସ୍ଥଳରୁ ଚମ୍ପଟ ମାରିଥିଲେ । ଘଟଣାସ୍ଥଳରେ ଦୁଷ୍ମନ୍ତଙ୍କ ମୃତ୍ୟୁ ହୋଇଥିବା ବେଳେ ମାଆ ସକୁନ୍ତଳା ଚୌଧୁରୀ , ବଡ଼ ଭଉଣୀ ସୈାଦାମିନୀ ଚୌଧୁରୀ ଏବଂ ଭାଇ ବିକ୍ରମ ଚୌଧୁରୀ ଆହତ ହୋଇଥିଲେ । ଏହାପରେ ଗ୍ରାମ ଲୋକଙ୍କ ଦ୍ୱାରା ସମସ୍ତଙ୍କୁ ଗୁରୁତର ଅବସ୍ଥାରୁ ଉଦ୍ଧାର କରାଯାଇ ବ୍ରହ୍ମପୁର ବଡ଼ମେଡ଼ିକାଲରେ ଭର୍ତ୍ତି କରାଯାଇଥିଲା । ତେବେ ଉପସ୍ଥିତ ଡାକ୍ତର ଦୁଷ୍ମନ୍ତଙ୍କୁ ମୃତ ଘୋଷଣା କରିଥିଲେ । ଘଟଣାପରେ ଚିକିଟି ଏସଡିପିଓ ସୁରେନ୍ଦ୍ରନାଥ ମୁର୍ମୁ ଓ ଦିଗପହଣ୍ଡି ଥାନା ଅଧିକାରୀ ବସନ୍ତ କୁମାର ସେଠୀ ପହଞ୍ଚି ଅଭିଯୁକ୍ତ ମାନଙ୍କ ବିରୋଧରେ ଥାନା ମାମଲା ୨୬/୨୦୨୧ ଦଫା ୧୪୭/୧୪୮/୩୨୩/୩୩୬/୪୫୦/୩୦୨/୧୪୯ ଆଇପିସି ଧାରା ଅନୁସାରେ ମକଦ୍ଦମା ରୁଜୁ କରି ତଦନ୍ତ ଚଳାଇଥିଲା । ଦିଗପହଣ୍ଡି ପୋଲିସ ପୂର୍ବରୁ ୭ ଜଣକୁ ଗିରଫ କରି କୋର୍ଟଚାଲାଣ କରିଥିବା ବେଳେ ଗତ ଏକମାସ ତଳେ ଅଭିଯୁକ୍ତ ସୁନୀଲକୁ ଗିରଫ କରିଥିଲା । ତେବେ ବୁଧବାର ଦିନ ଅଭିଯୁକ୍ତ ଅମିକୁ ଗିରଫ ପରେ କୋର୍ଟ ଚାଲାଣ କରାଯାଇଥିଲା ମଧ୍ୟ ସେଠାରେ ଜାମିନ ଆବେଦନ ଖାରଜ ହେବାରୁ ସବଜେଲ ହାଜତକୁ ପଠାଇ ଦିଆଯାଇଥିବା ଥାନା ଅଧିକାରୀ ବସନ୍ତ କୁମାର ସେଠୀ ସୂଚନା ଦେଇଛନ୍ତି ।