ଗଞ୍ଜାମ ଜିଲ୍ଲା ସାନଖେମୁଣ୍ଡି ନିର୍ବାଚନ ମଣ୍ଡଳୀ ବିଧାୟକ ରମେଶ ଚନ୍ଦ୍ର ଜେନା ସୋମବାର ଦିନ ସାନଖେମୁଣ୍ଡି ବ୍ଲକର ବିଭିନ୍ନ ପଞ୍ଚାୟତ ପରିଦର୍ଶନ କରିବା ସହ ପଞ୍ଚାୟତରେ ରହିଥିବା ବିଭିନ୍ନ ଉନ୍ନୟନମୂଳକ କାର୍ଯ୍ୟର ସମୀକ୍ଷା କରିଥିବା ଜଣାପଡ଼ିଛି । ଖବରନୁଯାୟୀ , ବର୍ତ୍ତମାନ କରୋନାର ଦ୍ବିତୀୟ ପର୍ଯ୍ୟାୟ ସଂକ୍ରମଣରେ ବହୁ ଲୋକଙ୍କ ମୃତ୍ୟୁ ହୋଇଥିବା ବେଳେ ଏବେବି ଲୋକଙ୍କ ମନରୁ ଭୟାବହତା ଦୂର ହୋଇପାରିନାହିଁ । ଏଭଳି ବିପର୍ଯ୍ୟୟ ସମୟରେ ବିଧାୟକ ଶ୍ରୀ ଜେନା ନିଜ ନିର୍ବାଚନ ମଣ୍ଡଳୀ ଗସ୍ତ କାର୍ଯ୍ୟକ୍ରମ ଜାରୀ ରଖିଛନ୍ତି । ସୋମବାର ଦିନ ବ୍ଲକର କଙ୍କୋରଡ଼ା ଓ କଉଡିଆ ପଞ୍ଚାୟତରେ ପହଞ୍ଚି ଚାଲିଥିବା ସରକାରୀ ଜନ ମଙ୍ଗଳ ଯୋଜନାର ରୂପରେଖ ଓ ଅଗ୍ରଗତି ସମ୍ବନ୍ଧରେ ଅନୁଧ୍ୟାନ କରିଥିବା ଜଣାପଡ଼ିଛି । ଏହି ପରିପ୍ରେକ୍ଷୀରେ କଙ୍କୋରଡ଼ା ଅଧିଷ୍ଠାତ୍ରୀ ଦେବୀ ମା ନାରାୟଣୀ ମନ୍ଦିର ପୁଷ୍କରିଣୀ ପୁନରୁଦ୍ଧାର ଓ ସୌନ୍ଦର୍ଯ୍ୟ କରଣ କାର୍ଯ୍ୟକୁ ଅନୁଧ୍ୟାନ କରିବା ସହିତ ବ୍ୟୟ ଅଟକଳକୁ ନେଇ ସମୀକ୍ଷା କରିଛନ୍ତି । ଏହାପରେ କଙ୍କୋରଡ଼ା ସରକାରୀ ବିଜ୍ଞାନ ମହାବିଦ୍ୟାଳୟର ଭିତ୍ତିଭୂମୀ ବିକାଶକୁ ନେଇ ଅଞ୍ଚଳ ବୁଦ୍ଧିଜୀବି ଓ ମହାବିଦ୍ୟାଳୟ କର୍ତ୍ତୃପକ୍ଷ ସହ ମିଳିତ ଆଲୋଚନା କରି ଆବଶ୍ୟକୀୟ ପାଣ୍ଠି ନିୟୋଜନ ପାଇଁ ସ୍ଵୀକୃତି ପ୍ରଦାନ କରିଛନ୍ତି । ସେହିପରି କରାଖଣ୍ଡି ଗ୍ରାମରେ ପହଞ୍ଚି ଗ୍ରାମର ସର୍ବାଙ୍ଗୀନ ଉନ୍ନତି ପାଇଁ ଆବଶ୍ୟକ ଉପାଦାନକୁ ନେଇ ଗ୍ରାମବାସୀଙ୍କ ସହ ଆଲୋଚନା କରିଛନ୍ତି । ଏଥିସହ କଉଡିଆ ପଞ୍ଚାୟତରେ ଗତ କିଛଦିନ ତଳେ ଦଣ୍ଡବନ୍ଧ ପୋଖରୀ ପୁନରୁଦ୍ଧାର କାର୍ଯ୍ୟରେ ଚଞ୍ଚକତାକୁ ନେଇ ଯେଉଁ ବିବାଦ ଦେଖାଯାଇଥିଲା ତାହାକୁ ନେଇ ବିଧାୟକ ଗ୍ରାମବାସୀ ସହ ଆଲୋଚନା କରିଥିଲେ । ଏହି ଅବସରରେ ସରପଞ୍ଚ ପ୍ରତିନିଧି ରୋହିତ ଖୁଣ୍ଟିଆ , ଯୁବନେତା ଅଜୟ ଦଳାଇ , ସଂଗଠକ ମିତ୍ରଭାନୁ ଦଳେଇ ବିଧାୟକ ସହ ଗ୍ରାମରେ ରହିଥିବା ମୈଳିକ ସମସ୍ୟା ସମ୍ବନ୍ଧରେ ଆଲୋଚନା କରିବା ସହ ଗ୍ରାମବାସୀଙ୍କୁ ପକ୍ଷଭୁକ୍ତ କରାଇ ଉନ୍ନୟନ ମୂଳକ କାର୍ଯ୍ୟର ସମୀକ୍ଷା କରି କାର୍ଯ୍ୟକୁ ତ୍ବରାନ୍ବିତ କରିବା ନେଇ ପରାମର୍ଶ ଦେଇଥିଲେ ।