ଗଞ୍ଜାମ ଜିଲ୍ଲା ପାଟପୁର ପୋଲିସ ପକ୍ଷରୁ ମଙ୍ଗଳବାର ଦିନ ଗତ ମାର୍ଚ୍ଚ ମାସରେ ଦୁର୍ଘଟଣା ଘଟାଇଥିବା ଡ୍ରାଇଭର ବସନ୍ତ ବାଘକୁ ଗ୍ରାମବାସୀ ପିଟିପିଟି ହତ୍ୟା କରିଥିବା ମାମଲାରେ ଅନ୍ୟ ଚାରି ଅଭିଯୁକ୍ତଙ୍କୁ ଗିରଫ କରାଯାଇଥିବା ଜଣାପଡ଼ିଛି । ଗିରଫ ମାନଙ୍କ ମଧ୍ୟରେ ଆଡପଡା ଗ୍ରାମର ଶ୍ରୀକାନ୍ତ ପୃଷ୍ଟି , ଚନ୍ଦନ ରାଉତ , ଜିତେନ୍ଦ୍ର ରାଉତ ଓ ପୂର୍ଣ୍ଣଚନ୍ଦ୍ର ରାଉତ ବୋଲି ଜଣାପଡିଛି । ଖବରନୁଯାୟୀ , ଗତ ମାର୍ଚ୍ଚ ମାସରେ ପାଟପୁର ଥାନା ରଙ୍ଗୁଣୀପଲ୍ଲୀରେ ଏକ ମାଟି ବୋଝେଇ ଟ୍ରିପର ଧକ୍କାରେ ଆଡପଡା ଗ୍ରାମର ଜଣେ ବ୍ୟକ୍ତିଙ୍କ ମୃତ ହୋଇଥିବା ବେଳେ ହେଲପର ଆହତ ହୋଇଥିଲେ । ଯାହାଫଳରେ ଘଟଣା ଘଟିଥିବା ସ୍ଥାନରେ ଲୋକଙ୍କ ମଧ୍ୟରେ ଉତ୍ତେଜନା ପ୍ରକାଶ ପାଇବା ସହ ଉତ୍ୟକ୍ତ ଲୋକେ ରାସ୍ତା ଅବରୋଧ କରିଥିଲେ । ଏପରିକି ଉତ୍ୟକ୍ତ ଲୋକେ ଡ୍ରାଇଭର ଉପରକୁ ରାଗ ସୁଝାଇବାକୁ ଯାଇ ସଂଘବଦ୍ଧ ଭାବେ ଆକ୍ରମଣ କରିବା ସହ ବାଡ଼େଇ ମାରିଦେଇଥିଲେ । ଘଟଣାପରେ ଟ୍ରକ ମାଲିକ ଥାନାରେ ଏକ ଏତଲା ଦେଇଥିଲେ । ଏତଲାକୁ ଭିତ୍ତିକରି ପାଟପୁର ପୋଲିସ ୩ ଟି ମାମଲା ରୁଜୁ କରି ତଦନ୍ତ ଚଳାଇ ସହ ଭିଡିଓ ଫୁଟେଜ ଆଧାରରେ ପୋଲିସ ତଦନ୍ତ କରି ମାର୍ଚ୍ଚ ୨୨ ରେ ୮ ଜଣଙ୍କୁ ଗିରଫ କରିଥିବା ବେଳେ କିଛି ଦିନ ପୂର୍ବେ ଅନ୍ୟ ୭ ଜଣକୁ ଗିରଫ କରି କୋର୍ଟଚାଲାଣ କରିଥିଲା । ସେଠାରେ ଜାମିନ ଆବେଦନ ନାମଞ୍ଜୁର ହେବାରୁ ଏବେ ସେମାନେ ଜେଲ ଚାରିକାନ୍ଥ ଭିତରେ ଦିନ କାଟୁଥିବା ଜଣାପଡିଛି । ପୂର୍ବରୁ ପୋଲିସ ହତ୍ୟା ମାମଲାରେ ଥାନା କେସ ନଂ ୮୨/୨୧ ଅନୁସାରେ ୫୦ ଜଣ ଓ ରାସ୍ତାରୋକ କରିଥିବା ହେତୁ ଏକ ମାମଲା ୮୩/୨୧ ରେ ୨୦୦ ରୁ ଉର୍ଦ୍ଧ ଲୋକଙ୍କ ନାମରେ ମାମଲା ରୁଜୁ ହୋଇଥିଲା । ତେବେ ମଙ୍ଗଳବାର ୪ ଜଣକୁ ଗିରଫ କରିବା ପରେ ଅପରାହ୍ନରେ କୋର୍ଟ ଚାଲାଣ କରିଥିବା ଥାନା ଅଧିକାରୀ ସବ୍ୟସାଚୀ ମଲ୍ଲ ସୂଚନା ଦେଇଛନ୍ତି ।