Kiran Behera
ଗଞ୍ଜାମ ଜିଲ୍ଲା ଦିଗପହଣ୍ଡି ଥାନା ଗୁଣ୍ଠପଡା ଗ୍ରାମରେ ସୋମବାର ସନ୍ଧ୍ୟାରେ କଲ୍ୟାଣପୁର ପୂର୍ବତନ ସମବାୟ ସମିତି ସଭାପତି ଏ . ବୁଦ୍ଧିଆ ପାତ୍ରଙ୍କୁ ସୋମବାର ସନ୍ଧ୍ୟାରେ ଦୁବୃର୍ତ୍ତ ମାନେ ମରଣାନ୍ତକ ଆକ୍ରମଣ କରିଥିବା ଜଣାପଡ଼ିଛି । ଏହି ଆକ୍ରମଣରେ ବୁଦ୍ଧିଆ ଗୁରୁତର ଆହତ ହୋଇଥିବା ବେଳେ ପ୍ରାଥମିକ ଚିକିତ୍ସା ପରେ ଦିଗପହଣ୍ଡି ଥାନାରେ ଦୁବୃର୍ତ୍ତଙ୍କ ବିରୋଧରେ ଦିଗପହଣ୍ଡି ଥାନାରେ ଏତଲା ମଧ୍ୟ ଦିଆଯାଇଥିଲା । ଖବରନୁଯାୟୀ , ଦିଗପହଣ୍ଡି ବ୍ଲକ କଇଠଡା ପଞ୍ଚାୟତ ଗୁଣ୍ଠପଡା ଗ୍ରାମର ବୁଦ୍ଧିଆ ଗତକାଲି ନିଜ ଗ୍ରାମ ପଛପଟେ ରହିଥିବା ଜଗନ୍ନାଥ କୁକୁଡ଼ା ଫାର୍ମରେ ବସି କଥାବାର୍ତ୍ତା ହେଉଥିବା ବେଳେ ଏକ କଳା ପଲସର ବାଇକରେ ତିନି ଯୁବକ ମୁହଁରେ କଳାମୁଖା ପିନ୍ଧି ଆସିଥିଲେ । ଏହାପରେ ତିନି ଦୁବୃର୍ତ୍ତ ଗାଡିରୁ ଓହ୍ଲାଇ କଥା ବୁଝିବା ପୂର୍ବରୁ ହକି ଷ୍ଟିକ୍ ସାହାଯ୍ୟରେ ମରଣାନ୍ତକ ଆକ୍ରମଣ କରି ବଡଡୁମ୍ବୁଳା ରାସ୍ତାରେ ଚମ୍ପଟ ମାରିଥିଲେ । ତେବେ ବୁଦ୍ଧିଆଙ୍କ ମୁଣ୍ଡ ଓ ଶରୀରର ବିଭିନ୍ନ ସ୍ଥାନରେ ଗଭୀର ଆଘାତ ଲାଗିଥିବା ଜଣାପଡିଛି । ଏହାପରେ ଗ୍ରାମବାସୀ ପହଞ୍ଚି ରକ୍ତାକ୍ତ ଅବସ୍ଥାରେ ଆହତ ବୁଦ୍ଧିଆଙ୍କୁ ଉଦ୍ଧାର କରି ନିକଟସ୍ଥ ଦିଗପହଣ୍ଡି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଚିକିତ୍ସା ନିମନ୍ତେ ଭର୍ତ୍ତି କରାଇଥିଲେ । ପ୍ରାଥମିକ ଚିକିତ୍ସା ପରେ ବୁଦ୍ଧିଆ ଓ ତାଙ୍କ ପରିବାର ଦିଗପହଣ୍ଡି ଥାନାରେ ପହଞ୍ଚି ଅଭିଯୁକ୍ତଙ୍କ ବିରୁଦ୍ଧରେ ଏକ ଲିଖିତ ଅଭିଯୋଗ କରିଥିଲେ । ଏତଲାକୁ ଭିତ୍ତି କରି ଦିଗପହଣ୍ଡି ପୋଲିସ ଅଭିଯୁକ୍ତଙ୍କ ବିରୁଦ୍ଧରେ ଏକ ମାମଲା ରୁଜୁ କରି ତଦନ୍ତ ଚଳାଇଥିବା ବେଳେ ଦୁବୃର୍ତ୍ତଙ୍କୁ ଧରିବା ପାଇଁ ପୋଲିସ ପକ୍ଷରୁ କୁମ୍ବିଂ ଅପରେସନ ଜୋରଦାର ଚାଲିଥିବା ଥାନା ଅଧିକାରୀ ବସନ୍ତ କୁମାର ସେଠୀ ସୂଚନା ଦେଇଛନ୍ତି । ତେବେ ରାଜନୈତିକ ହିଂସାକୁ ନେଇ ଏଭଳି କାଣ୍ଡ ଘଟିଥିବା ଗ୍ରାମବାସୀ କହିଛନ୍ତି ।
