Kiran Behera
ଗଞ୍ଜାମ ଜିଲ୍ଲା ସାନଖେମୁଣ୍ଡି ବ୍ଲକ କଉଡ଼ିଆ ପଞ୍ଚାୟତ ଅନ୍ତର୍ଗତ ବଉଳଘାଇ ଗ୍ରାମର ଜଣେ ମହିଳାଙ୍କ ରବିବାର ଦିନ ବଜ୍ରପାତରେ ମୃତ୍ୟୁ ହୋଇଥିବା ଜଣାପଡିଛି । ମୃତ ମହିଳା ଜଣଙ୍କ ହେଲେ ପାଟପୁର ଥାନା ବଉଳଘାଇ ଗ୍ରାମର ଭଞ୍ଜ ଭୂୟାଁଙ୍କ ସ୍ତ୍ରୀ ପ୍ରତିମା ଭୂୟାଁ (୪୨) ବୋଲି ସୂଚନା ମିଳିପାରିଛି । ଖବରନୁଯାୟୀ , ପ୍ରତିମା ରବିବାର ଅପରାହ୍ନରେ ନିଜ ବିଲକୁ ଚାଷ କାର୍ଯ୍ୟ ନିମନ୍ତେ ଯାଇଥିଲେ । ତେବେ ସନ୍ଧ୍ୟାରେ ହଠାତ ଆକାଶରେ କଳାମେଘ ଢାଙ୍କିବା ସହ ଘଡ଼ଘଡ଼ି ଓ ବିଜୁଳି ମାରିଥିଲା । ବର୍ଷା ଓ ଘଡଘଡିକୁ ଦେଖି ମହିଳା ଜଣକ ଘରକୁ ତରବରିଆ ଭାବେ ଫେରୁଥିବା ବେଳେ ଆକସ୍ମିକ ବଜ୍ରପାତ ମାଡରେ ମହିଳା ଜଣକ ସେଠାରେ ହିଁ ଟଳି ପଡ଼ିଥିଲେ । ଗ୍ରାମବାସୀଙ୍କ ଦ୍ଵାରା ମହିଳାଙ୍କୁ ଗୁରୁତର ଅବସ୍ଥାରେ ଆଡପଡ଼ା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ପ୍ରାଥମିକ ଚିକିତ୍ସା ନିମନ୍ତେ ଭର୍ତ୍ତି କରାଯାଇଥିବା ବେଳେ ସେଠାରେ ଉପସ୍ଥିତ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଏହି ବଜ୍ରପାତରେ ମହିଳାଙ୍କ ଶରୀରର ଅର୍ଦ୍ଧେକ ଅଂଶ ପୋଡି ଯିବା ସହ କାନ ଓ ଆଖିରୁ ରକ୍ତ ବାହାରିଥିଲା । ଘଟଣାପରେ ସ୍ଥାନୀୟ ସମିତିସଭ୍ୟ ଅମିନ ପ୍ରଧାନ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ପହଞ୍ଚି ମୃତକ ପରିବାର ସହ ଆଲୋଚନା କରିଥିଲେ । ଏପରିକି ବଜ୍ରପାତରେ ମୃତକ ପରିବାରକୁ ସହାୟତା ପାଇଁ ସ୍ଥାନୀୟ ତହସିଲଦାର ଓ ପୋଲିସ ପ୍ରଶାସନର ଦୃଷ୍ଟି ଆକର୍ଷଣ କରିଥିଲେ ।
