ଗତ ଦୁଇଦିନ ଧରି ବଙ୍ଗୋପସାଗରରେ ସୃଷ୍ଟି ଲଘୁଚାପଜନିତ ବର୍ଷା ପ୍ରଭାବରେ ରାଜ୍ୟର ବିଭିନ୍ନ ସ୍ଥାନରେ ବର୍ଷା ଲାଗିରହିଥିବା ବେଳେ ଏହାର ପ୍ରଭାବ ଗଞ୍ଜାମ ଜିଲ୍ଲାରେ ମଧ୍ୟ ପଡିଥିବା ଜଣାପଡିଛି । ତେବେ ଆଗକୁ ବର୍ଷାର ପରିମାଣ ବଢିବା ସହ ଘୋଡାହଡ ଡ୍ୟାମର ଜଳସ୍ତର ଧିରେ ଧିରେ ବୃଦ୍ଧି ପାଇବାରେ ଲାଗିଛି । ଯାହାକୁ ଦୃଷ୍ଟିରେ ରଖି ଦିଗପହଣ୍ଡି ବ୍ଳକ ଖମ୍ବାରି ଗାଁ ନିକଟସ୍ଥ ଘୋଡ଼ାହାଡ଼ ଡ଼୍ୟାମରୁ ଯେକୌଣସି ମୁହୂର୍ତ୍ତରେ ଜଳ ଛଡାଯିବ ବୋଲି ସ୍ଥାନୀୟ ଜଳସେଚନ ଉପଖଣ୍ଡ କାର୍ଯ୍ୟାଳୟ ଉପ ନିର୍ବାହୀ ଯନ୍ତ୍ରୀ ଇଂ. ଏ. ଗୋପାଳ ରାଓ ସତର୍କ ସୂଚନା ଜାରି କରିଛନ୍ତି । ତେଣୁ ଏହି ସମୟରେ ଘୋଡାହଡ ନଦୀ ତଟବର୍ତ୍ତୀ ଗ୍ରାମବାସୀଙ୍କୁ ନଦୀ ଗର୍ଭକୁ ନ ଯିବା ପାଇଁ ବାରଣ କରିଛନ୍ତି । ଡ଼୍ୟାମର ସର୍ବୋଚ୍ଚ ଜଳ ଧାରଣ କ୍ଷମତା ୧୧୭.୮୦ ମିଟର ଥିବା ବେଳେ ଶନିବାର ସନ୍ଧ୍ୟା ସୁଦ୍ଧା ଡ଼୍ୟାମରେ ଜଳ ପତ୍ତନ ୧୧୪.୮୦ ମିଟର ଥିବା ଜଳସେଚନ ବିଭାଗ ପକ୍ଷରୁ କହିଛନ୍ତି। ରାଜ୍ୟ ଜଳସମ୍ପଦ ବିଭାଗର ନିର୍ଦ୍ଦେଶ କ୍ରମେ ଡ଼୍ୟାମରୁ ସ୍ଲୁଇସ୍ ଗେଟ୍ ଖୋଲା ଯାଇ ନଦୀକୁ ଜଳ ଛଡ଼ାଯିବ ବୋଲି ସହକାରୀ ଯନ୍ତ୍ରୀ ଇଂ. ନିରଞ୍ଜନ ସାହୁ ଜଣାଇଛନ୍ତି ।