Kiran Behera
ଗଞ୍ଜାମ ଜିଲ୍ଲା କେ. ନୂଆଗାଁ ଥାନା ଅର୍ନ୍ତଗତ ଗୁମା ଗ୍ରାମରୁ ରାଇପୁର ଗ୍ରାମର ଅମିୟ କୁମାର ପାଢ଼ୀ ଭୋଜିଖାଇ ଫେରୁଥିବା ବେଳେ ପୂର୍ବ ଶତ୍ରୁତାକୁ କେନ୍ଦ୍ରକରି ଆକ୍ରମଣ ମାମଲାରେ ମଙ୍ଗଳବାର ପୋଲିସ ଅଭିଯୁକ୍ତକୁ ଗିରଫ କରିଥିବା ଜଣାପଡ଼ିଛି । ଗିରଫ ଯୁବକ ହେଲେ ବୁଢାଢେପ ଗ୍ରାମର କୃଷ୍ଣଚନ୍ଦ୍ର ପାଇକ ବୋଲି ସୂଚନା ମିଳିଛି । ଖବରନୁଯାୟୀ , ଗତ ରବିବାର ଅପରାହ୍ନ ୪ ଘଣ୍ଟା ସମୟରେ ଅମିୟ ନିଜ ୨ ଝିଆରୀଙ୍କୁ ନେଇ ନିକଟସ୍ଥ ଗ୍ରାମ ଗୁମାକୁ ଭୋଜି ଖାଇବାକୁ ଯାଇଥିଲେ । ଏହାପରେ ଗ୍ରାମକୁ ଫେରିବା ସମୟରେ ବୁଢ଼ାଢେପ ଗ୍ରାମ ନିକଟସ୍ଥ କେନାଲ ନିକଟରେ ଅଭିଯୁକ୍ତ ସମେତ ତାଙ୍କ ଭାଇ ରାମଚନ୍ଦ୍ର ହାତରେ ବିଭିନ୍ନ ମାରଣାସ୍ତ୍ର ସାହାଯ୍ୟରେ ଅତର୍କିତ ଭାବେ ମରଣାନ୍ତକ ଆକ୍ରମଣ କରିଥିଲେ। ଏପରିକି ନିର୍ଦ୍ଦୟ ଭାବେ ୨ ଜଣ ଝିଆରୀଙ୍କୁ କେନାଲକୁ ଫୋପାଡି ଦେଇଥିବା ତାଙ୍କ ଭାଇ ଦେବାଶିଷ ଏତଲାରେ ଉଲ୍ଲେଖ କରିଥିବା ଥାନା ଅଧିକାରୀ ମୃତ୍ୟୁଞ୍ଜୟ ସ୍ବାଇଁ କହିଛନ୍ତି । ଆହାତ ଅମିୟଙ୍କୁ ପ୍ରଥମେ ଦିଗପହଣ୍ଡି ବ୍ଲକ ବମକେଇ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା । ଅବସ୍ଥା ଗୁରୁତର ଥିବାରୁ ତାଙ୍କୁ ବ୍ରହ୍ମପୁର ବଡ ଡାକ୍ତରଖାନାକୁ ସ୍ଥାନାନ୍ତରିତ କରାଯାଇଥିଲା । ସେହିପରି ଅମିୟଙ୍କ ସାଙ୍ଗରେ ଥିବା କବି ପାଇକଙ୍କୁ ମଧ୍ୟ ୨ ଭାଇ ଆକ୍ରମଣ କରିଥିବା ପ୍ରାଥମିକ ତଦନ୍ତରୁ ଜଣାପଡିଥିବା ଥାନା ଅଧିକାରୀ ଶ୍ରୀ ସ୍ବାଇଁ ସୂଚନା ଦେଇଛନ୍ତି । ଏତଲାକୁ ଭିତ୍ତି କରି ଥାନା ମାମଲା ନଂ.୨୧୬/୨୧ ଦଫା - ୩୦୭/ ୩୨୪/୩୪୧/୫୦୬/୩୪ ଆଇ ପି ସି ଅନୁସାରେ ଅଭିଯୁକ୍ତକୁ ଗିରଫ କରାଯାଇ କୋର୍ଟ ଚାଲାଣ କରାଯାଇଥିବା ବେଳେ ଜାମିନ ଆବେଦନ ନାମଞ୍ଜୁର ହେବାରୁ ଦିଗପହଣ୍ଡି ଉପ କାରାଗାରକୁ ପଠାଇ ଦିଆଯାଇଛି ।
