ଗଞ୍ଜାମ ଜିଲ୍ଲା ଦିଗପହଣ୍ଡି ସ୍ଥିତ ଲୋକସେବା ପରିଷଦର ମୁଖପତ୍ର ' ପତ୍ରିକା ' ସବୁଜପତ୍ର ପକ୍ଷରୁ ଶୁକ୍ରବାର ' ସମାଜରେ ପ୍ରଗତିଶୀଳ ସାହିତ୍ୟର ପ୍ରଭାବ ' ସମ୍ପର୍କିତ ଆଲୋଚନା ଚକ୍ର ଅନୁଷ୍ଠିତ ହୋଇଯାଇଛି । ଏହି କାର୍ଯ୍ୟକ୍ରମରେ ଲୋକସେବା ପରିଷଦର ସମ୍ପାଦକ କୁରେଶୁ ପଣ୍ଡା ସଂଯୋଜନା କରିଥିଲେ । ପ୍ରାଧ୍ୟାପକ ଡା.ସୁରେନ୍ଦ୍ର ନାଥ ପାଣିଗ୍ରାହୀ , ଆଇନଜୀବୀ ଡା.ଲକ୍ଷ୍ମୀନାରାୟଣ ଦାସ , ସାହିତ୍ୟକ ଲିଙ୍ଗରାଜ ପୁଜାରୀ , ଖବରଦାତା ହରପ୍ରସାଦ ରଥ , ଅଶେଷନାଥ ମିଶ୍ର ଓ ଗୋପାଳକୃଷ୍ଣ ମଲ୍ଲୀକ ପ୍ରମୁଖ ଆଲୋଚକ ଭାବେ କାର୍ଯ୍ୟକ୍ରମରେ ମଞ୍ଚାସୀନ ଥିଲେ । ପତ୍ରିକାର ନବବର୍ଷ ସଂଖ୍ୟା ଏବଂ କ୍ୟାଲେଣ୍ଡରକୁ ଅତିଥି ବୃନ୍ଦ ଉନ୍ମୋଚିତ କରିଥିଲେ । ସାହିତ୍ୟ ସମାଜ ଗଠନ ଦିଗରେ ପ୍ରଭାବଶାଳୀ ଭୁମିକା ନିଭାଇ ଆସୁଥିବା ବେଳେ ସାହିତ୍ୟର ଆରମ୍ଭ ନାହିଁ କି ଅନ୍ତ ନାହିଁ ସେ ଅନନ୍ତ । କେବଳ ମଣିଷ ସମାଜ ନୁହେଁ ସମସ୍ତ ପ୍ରାଣୀ ଜଗତଙ୍କ ବିକାଶ ଦିଗରେ ସାହିତ୍ୟ ହିଁ ପ୍ରତିବିମ୍ବ । ଯେତେଦିନ ପର୍ଯ୍ୟନ୍ତ ଏ ଧରା ପୃଷ୍ଠରେ ପ୍ରାଣୀଜଗତ ରହିଥିବ ସାହିତ୍ୟ ତାର ସାମାଜିକ , ଅର୍ଥନୈତିକ ବିକାଶ ଦିଗରେ ଆଲୋକ ଦେଖାଉଥିବା କାଳଜୟୀ ସ୍ରଷ୍ଟାଙ୍କ ସୃଷ୍ଟି ପାଇଁ ସାହିତ୍ୟ ସମେତ ଭାଷା ସଂସ୍କୃତି ଆଜି ପର୍ଯ୍ୟନ୍ତ ତିଷ୍ଠି ରହିଛି । ସାମ୍ପ୍ରତିକ ସମାଜରେ ପ୍ରଗତିଶୀଳ ସାହିତ୍ୟ ତାର ପ୍ରଭାବ ସୃଷ୍ଟି କରିପାରିଛି ବୋଲି ଆଲୋଚନା ଚକ୍ରରେ ମତପ୍ରକାଶ ପାଇଥିଲା । ଶେଷରେ ଆୟୋଜିତ କବିତା ଆସର କାର୍ଯ୍ୟକ୍ରମ ୧୦ ରୁ ଉର୍ଦ୍ଧ କବି,କବୟତ୍ରୀ ଏଥିରେ ଯୋଗଦେଇ ସେମାନଙ୍କ ସ୍ୱରଚିତ କବିତା ପାଠ କରିଥିଲେ । ପ୍ରତିବର୍ଷ ଭଳି ଚଳିତ ବର୍ଷକୁ ବିଦାୟ ଓ ନବ ବର୍ଷକୁ ସ୍ୱାଗତ ଜଣାଇ ଲୋକସେବା ପରିଷଦ ତାର ସାରସ୍ଵତ କାର୍ଯ୍ୟକ୍ରମକୁ ପାରମ୍ପରିକ ଭାବେ ପାଳନ କରି ଆସୁଥିବା ଯୋଗୁଁ ଉପସ୍ଥିତ ଆଲୋଚକ , କବି, କବୟତ୍ରୀ ବୁଦ୍ଧିଜୀବି ମାନେ ସମ୍ପୃକ୍ତ ଅନୁଷ୍ଠାନକୁ ପ୍ରଶଂସା କରିଥିଲେ । ଦିଗପହଣ୍ଡି ଏନ୍ ଏ ସି ର ପୂର୍ବତନ ଅଧ୍ୟକ୍ଷ ପ୍ରଫୁଲ ପଣ୍ଡାା , ଅଶ୍ୱୀନି କୁମାର ଦାଶ , ବିନାୟକ ଦାଶ , ଲକ୍ଷ୍ମୀଧର ମହାପାତ୍ର , ହେମନ୍ତ କୁମାର ପାତ୍ର , ଅରୁଣ କମାର ସାହୁ , ପ୍ରଭାତ କୁମାର ପାଢ଼ୀ , କାମାକ୍ଷୀ ପ୍ରସାଦ ସାହୁ ସହରର ବହୁ ଗଣ୍ୟମାନ୍ୟ ବ୍ୟକ୍ତି ଉପସ୍ଥିତ ଥିଲେ ।