Swadhina Kumar Sahu
ଗଞ୍ଜାମ ଜିଲ୍ଲାର ଧରାକୋଟ, ଛତ୍ରପୁର, ଗଞ୍ଜାମ, ପାତ୍ରପୁର ଏବଂ ବେଲଗୁଣ୍ଠା ବ୍ଲକରେ ତୃତୀୟ ପର୍ଯ୍ୟାୟରେ ହେବ ନିର୍ବାଚନ । ଏହାକୁ ନେଇ ଜିଲ୍ଲା ପ୍ରଶାସନ ପକ୍ଷରୁ ଏହି ପାଞ୍ଚଟି ବ୍ଲକରେ ସମସ୍ତ ପ୍ରକାର ପ୍ରସ୍ତୁତି କରାଯାଇଛି । ତେବେ ୫ଟି ବ୍ଲକରେ ମୋଟ ୧୩୮୨ଟି ମତଦାନ କେନ୍ଦ୍ରରେ ମତଦାନ କରିବେ ୪ ଲକ୍ଷ ୯୦ ହଜାର ୯୪୪ ଭୋଟର । ଅନ୍ୟପଟେ ଆଜି ଜିଲ୍ଲା ପ୍ରଶାସନ ପକ୍ଷରୁ ପୁର୍ବ ପ୍ରସ୍ତୁତି ମୁତାବକ ଏହି ପାଞ୍ଚୋଟି ବ୍ଲକ ମୁଖ୍ୟାଳୟରୁ ପୁଲିଂ ପାର୍ଟିମାନେ ନିଜ ଦାୟିତ୍ୱରେ ଥିବା ମତଦାନ କେନ୍ଦ୍ରକୁ ଯାଇଛିନ୍ତି । ସେହିପରି ଗଞ୍ଜାମ ବ୍ଲକରେ ମୋଟ ୨ଟି ଜିଲ୍ଲା ପରିଷଦ ଆସନ, ୧୫ଟି ସରପଞ୍ଚ, ସମିତିସଭ୍ୟ ଓ ୨୨୩ ୱାର୍ଡସଭ୍ୟ ଆସନ ରହିଥିବାବେଳେ ବର୍ତ୍ତମାନ ୧୪୫ଟି ୱାର୍ଡସଭ୍ୟ, ୩ଟି ସରପଞ୍ଚ ଓ ୩ଟି ସମିତିସଭ୍ୟ ଆସନ ପାଇଁ ଜଣେ ଲେଖାଏଁ ପ୍ରାର୍ଥୀ ନାମାଙ୍କନ ଭରିଥିଲେ । ବର୍ତ୍ତମାନ ଏହି ବ୍ଲକରେ ୨୨୩ ମତଦାନ କେନ୍ଦ୍ରରେ ୨ ଜିଲ୍ଲା ପରିଷଦ, ୧୨ ସରପଞ୍ଚ, ୧୨ ସମିତିସଭ୍ୟ ଓ ୭୮ ୱାର୍ଡସଭ୍ୟ ଆସନ ପାଇଁ ମତଦାନ ଅନୁଷ୍ଠିତ ହେବ । ଏହି ବ୍ଲକର ୧୪ ନମ୍ବର ଜିଲ୍ଲା ପରିଷଦ ଆସନ ପାଇଁ ବିଜେଡି, ବିଜେପି, କଂଗ୍ରେସ ଓ ସିପିଆଇଏମ ପ୍ରାର୍ଥୀଙ୍କ ଭାଗ୍ୟ ନିର୍ଦ୍ଧାରଣ ହେବାକୁ ଥିବା ବେଳେ ୧୫ ନମ୍ବର ଜିଲ୍ଲା ପରିଷଦ ଆସନରେ ବିଜେଡି, ବିଜେପି, କଂଗ୍ରେସ, ସିପିଆଇ, ସିପିଆଇଏମ ଓ ବିଏସପି ପ୍ରାର୍ଥୀଙ୍କ ଭାଗ୍ୟ ନିର୍ଦ୍ଧାରଣ ହେବ । ସେହିପରି ଏହି ବ୍ଲକର ୧୫ଟି ପଞ୍ଚାୟତର ୪୮ ସରପଞ୍ଚ ପ୍ରାର୍ଥୀ ଓ ୩୬ ସମିତିସଭ୍ୟ ପ୍ରାର୍ଥୀଙ୍କ ଭାଗ୍ୟ ନିର୍ଦ୍ଧାରଣ କରିବେ ବ୍ଲକର ୭୪ ହଜାର ୬୯୩ ଜଣ ଭୋଟର ।
