Kiran Behera
ଗଞ୍ଜାମ ଜିଲ୍ଲା ଦିଗପହଣ୍ଡି ତହସିଲ ଅନ୍ତର୍ଗତ ଜକର ରାଜସ୍ବ ସର୍କଲ ତେଣ୍ଟୁଆପଡା ବିଶ୍ରାମଗାର ନିକଟରେ ଏକ ଟ୍ରାକ୍ଟର ଯୋଗେ ବେଆଇନ ବାଲି ଚୋରାଚାଲାଣ ଚାଲିଥିବା ବେଳେ ଏନଫୋର୍ସମେଣ୍ଟ ଟିମ୍ ଦ୍ଵାରା ଉକ୍ତ ଗାଡିକୁ ଜବତ କରାଯାଇଥିବା ଜଣାପଡ଼ିଛି । ଯାହାକୁ ନେଇ ଟ୍ରାକ୍ଟର ମାଲିକ ରାଜସ୍ବ ନୀରିକ୍ଷକ କାର୍ଯ୍ୟାଳୟରେ ପହଞ୍ଚି କର୍ମଚାରୀଙ୍କୁ ଦୁର୍ବ୍ୟବହାର କରିଥିବା ବେଳେ ନିକଟସ୍ଥ କେ. ନୂଆଗାଁ ଥାନାରେ ମାଲିକ ନାମରେ ଏତଲା ଦିଆଯାଇଛି । ଖବରନୁଯାୟୀ , ଗତ ଫେବୃଆରୀ ୨୮ ତାରିଖ ସକାଳ ସାଢେ ଆଠଟା ସମୟରେ ସ୍ଥାନୀୟ ତହସିଲଦାର ସିପକ କୁମାର ପାତ୍ରଙ୍କ ନିର୍ଦ୍ଦେଶକ୍ରମେ ଏହି ଟିମରେ ରହିଥିବା ବାସୁଦେବପୁର ରାଜସ୍ବ ନୀରିକ୍ଷୀକା ବନିତା ପ୍ରଧାନ ଓ ଏଆରଆଇ କୁମାରୀ ରଞ୍ଜିତା ନାୟକ ଉକ୍ତ ଗ୍ରାମ ନିକଟ ଦେଇ ଯାଉଥିବା ସମୟରେ ଏକ ଟ୍ରାକ୍ଟର (ଓଡି୦୭ ଏକ୍ସ ୭୭୩୫) ବେଆଇନ ଭାବେ ବାଲି ଚୋରାଚାଲାଣ କରୁଥିଲା । ତେବେ ଯାଞ୍ଚ ପରେ ୱାଡ଼ଫର୍ମ ସଠିକ ନଥିଲା । ଯାହାଫଳରେ ଗାଡ଼ିକୁ ଜବତ କରାଯାଇଥିଲା । ଜବତ ସମ୍ପର୍କରେ ଚାଳକ ଜଗଦୀଶ ବିଷୋୟୀଙ୍କ ଠାରୁ ଖବର ପାଇ ମାଲିକ ଲକ୍ଷ୍ମୀ ନାରାୟଣ ପ୍ରଧାନ ସେଠାରେ ପହଞ୍ଚି ଉପସ୍ଥିତ କର୍ମଚାରୀଙ୍କୁ ଗାଳିଗୁଲଜ କରି ଜୋର ଜବରଦସ୍ତ ଜବତ ଟ୍ରାକ୍ଟରକୁ ଧରି ଦେଖାଳି ଅଭିମୁଖେ ଚାଲି ଯାଇଥିଲେ । ଏନେଇ କର୍ମଚାରୀ ମାନେ ତହସିଲଦାରଙ୍କୁ ଜଣାଇଥିଲେ । ଘଟଣାପରେ ତହସିଲଦାର ଶ୍ରୀ ପାତ୍ର ଗାଡ଼ିର ପିଛା କରି କରପଡା ଛକ ନିକଟରେ ଟ୍ରାକ୍ଟର ଅଟକାଇବା ପାଇଁ ଚେଷ୍ଟା କରିଥିଲେ । ତେବେ ମାଲିକ ତଥା ଚାଳକ କରପଡା ଅଭିମୁଖେ ଟ୍ରାକ୍ଟରକୁ ବୁଲାଇ ଚମ୍ପଟ ମାରୁଥିବା ବେଳେ ତହସିଲଦାର ତାକୁ ପିଛା କରିଥିଲେ। କିଛି ବାଟ ଗଲାପରେ ଢାମଣାପଦର ନିକଟରେ ଟ୍ରାକ୍ଟର ଓଲଟି ପଡିବାରୁ ମାଲିକ ସାମାନ୍ୟ ଆହତ ହୋଇଥିଲେ । ଖବର ପାଇ ଦିଗପହଣ୍ଡି ପୋଲିସ ସେଠାରେ ପହଞ୍ଚି ମାଲିକଙ୍କୁ ଧରିଆଣି ଚିକିତ୍ସିତ କରାଇଥିଲେ । ତହସିଲଦାର ଦିଗପହଣ୍ଡି ଥାନାରେ ପ୍ରଥମେ ଏତଲା ଦେଇଥିଲେ ମଧ୍ୟ ଘଟଣା ନୂଆଗାଁ ଅଧୀନସ୍ଥ ଥିବାରୁ ସେଠାରେ ଏତଲା ଦିଆଯିବାକୁ କୁହାଯାଇ ମାଲିକଙ୍କୁ ଛାଡି ଦିଆଯାଇଥିଲା । ପରେ ତହସିଲଦାରଙ୍କ ପକ୍ଷରୁ ନୂଆଗାଁ ଥାନାରେ ଏତଲା ଦିଆଯିବା ପରେ ଥାନା ମାମଲା ସଂଖ୍ୟା ୬୧/୨୨ ପ୍ରକାରେ ମାମଲା ରୁଜୁ ହୋଇଥିବା ଆଇଆଇସି ମୃତ୍ଯୁଞ୍ଜୟ ସ୍ବାଇଁ ଜଣାଇଛନ୍ତି ।
