ଆନ୍ଧ୍ରପ୍ରଦେଶ ଶ୍ରୀକାକୁଲମକୁ ଦାଦନ ଖଟିବାକୁ ଯାଇଥିବା ଜଣେ ଗରିବ ଓଡ଼ିଆ ଯୁବକଙ୍କ ଗତକାଲି ସ୍ବାସ୍ଥ୍ୟଗତ କାରଣରୁ ମୃତ୍ୟୁ ହୋଇଥିବା ବେଳେ ଆଜି ଓଡିଶା ମୋ ପରିବାର ପକ୍ଷରୁ ମୃତଦେହ ନିଜ ଭିଟାମାଟିକୁ ଫେରାଇ ଅଣାଯାଇଛି । ମୃତ ଯୁବକ ଜଣକ ହେଲେ ଗଞ୍ଜାମ ଜିଲ୍ଲା ସାନଖେମୁଣ୍ଡି ବ୍ଲକ ତଥା ପାଟପୁର ଥାନା ଆଡପଡା ପଞ୍ଚାୟତ କଇଠବେଢା ଗ୍ରାମର ବିନୋଦ ମହାନ୍ତିଙ୍କ ପୁତ୍ର ଜିତୁ ମହାନ୍ତି (୨୪) ବୋଲି ଜଣାପଡିଛି । ଖବରନୁଯାୟୀ , ବିନୋଦଙ୍କ ପରିବାର ଗରିବ ଶ୍ରେଣୀର ହୋଇଥିବାରୁ ଆର୍ଥିକ ଅବସ୍ଥା ମଧ୍ୟ ସ୍ବଛଳ ରହିଥିଲା । ଗୋଟିଏ ପଟେ ପରିବାର ପ୍ରତିପୋଷଣ ଅନ୍ୟ ପଟେ ଆର୍ଥିକ ଅନଟନ ଯୋଗୁଁ ବହୁ କଷ୍ଟରେ ଚଳୁଥିଲେ ପରିବାର । ଯାହାଫଳରେ ପରିବାର ପେଟପାଟଣା ଦୂର କରିବାକୁ ଦାଦନ ଖଟିବାକୁ ଚାଲିଗଲେ ଆନ୍ଧ୍ରପ୍ରଦେଶର ଶ୍ରୀକାକୁଲମ ଅଞ୍ଚଳକୁ । ସେଠାରେ ଦୀର୍ଘଦିନ ଧରି ଜଣେ ଶ୍ରମିକ ଭାବେ କାମ କରି ପରିବାର ଚଳାଇ ଆସୁଥିଲେ । ତେବେ ଗତକାଲି ସ୍ବାସ୍ଥ୍ୟ ଅବସ୍ଥା ଗୁରୁତର ରହିଥିବା ବେଳେ ସେଠାରେ ଥିବା ଅନ୍ୟ ଓଡ଼ିଆ ମାନେ ଗୁରୁତର ଅବସ୍ଥାରେ ମେଡିକାଲ ନେଇଥିଲେ ମଧ୍ୟ ସେଠାରେ ଡାକ୍ତର ମୃତ ଘୋଷଣା କରିଥିଲେ । ତେବେ ପୁଅର ମରଶରୀରକୁ ଗ୍ରାମକୁ ଫେରାଇ ଆଣିବା ପାଇଁ ଅର୍ଥାଭାବ ଯୋଗୁଁ ପରିବାର ଚିନ୍ତିତ ରହିଥିଲେ । ଏନେଇ ସ୍ଥାନୀୟ ଲୋକେ ଆଡପଡା ପୂର୍ବତନ ସରପଞ୍ଚ ତଥା ବ୍ଳକ ବିଜେଡି ସଭାପତି ନୀଳମାଧବ ରାଉତଙ୍କୁ ଜଣାଇଥିଲେ ।ଏହାପରେ ସାନଖେମୁଣ୍ଡିର ପୂର୍ବତନ ବିଧାୟିକା ଶ୍ରୀମତୀ ନନ୍ଦିନୀ ଦେବୀଙ୍କୁ ଏ ନେଇ ଅବଗତ ପରେ ଜିଲ୍ଲା ପ୍ରଶାସନ ସହ ଯୋଗାଯୋଗ କରି ରାଜ୍ୟ ସରକାରଙ୍କ ଓଡ଼ିଶା ମୋ ପରିବାର ସୌଜନ୍ୟରୁ ପାର୍ଥିବ ଶରୀରକୁ ଆଜି ନିଜ ପୈତୃକ ଗ୍ରାମ କଇଠବେଢା ଅଣାଯିବାର ବ୍ୟବସ୍ଥା କରାଯାଇଥିଲା । ମରଶରୀର ଗ୍ରାମରେ ପହଞ୍ଚିବା ପରେ ବ୍ଲକ ବିଜେଡି ସଭାପତି ଶ୍ରୀ ରାଉତଙ୍କ ସମେତ ନାଏବ ସରପଞ୍ଚ କାଳୁ ସ୍ବାଇଁ ଉପସ୍ଥିତ ରହି ପରିବାରକୁ ସମବେଦନା ଜଣାଇଥିଲେ ।