Kiran Behera
ଗଞ୍ଜାମ ଜିଲ୍ଲା କେ . ନୂଆଗାଁ ଥାନା ପୋଲିସ ଗତକାଲି ସନ୍ଧ୍ୟାରେ ଦିଗପହଣ୍ଡି ବ୍ଳକ ଚଷା ନିମଖଣ୍ଡି ପଞ୍ଚାୟତ ଅଧିନସ୍ଥ ଶ୍ୟାମସୁନ୍ଦରପୁର ଗ୍ରାମରେ ଅତର୍କିତ ଚଢ଼ାଉ କରି ବିପୁଳ ପରିମାଣର ଚୋରା ଦେଶୀମଦ ଜବତ କରିଥିବା ଜଣାପଡିଛି । ତେବେ ପୋଲିସ ଚୋରାମଦ ବିକ୍ରି ଅଭିଯୋଗରେ ଚଷା ନିମଖଣ୍ଡି ପଞ୍ଚାୟତର ସମିତି ସଭ୍ୟଙ୍କ ସ୍ବାମୀ ମିଟୁ ମଲ୍ଲିକଙ୍କୁ ଗିରଫ କରି ମଙ୍ଗଳବାର ଦିନ କୋର୍ଟ ଚାଲାଣ କରିଛି । ଖବରନୁଯାୟୀ , ଅଭିଯୁକ୍ତ ମିଟୁ ଦୀର୍ଘ ବର୍ଷ ଧରି ଗ୍ରାମରେ ରହୁଥିବା ଘର ଭିତରେ ଅପମିଶ୍ରିତ ମଦ ପ୍ରସ୍ତୁତ କରି ବେଆଇନ ଭାବେ ବିକ୍ରି କରୁଥିଲା । ଯାହାକି ଲୋକମାନଙ୍କ ପାଇଁ ଅତ୍ୟନ୍ତ ହାନିକାରକ । ଏନେଇ ଗ୍ରାମବାସୀ ବାରମ୍ବାର ଅଭିଯୁକ୍ତ ଓ ସ୍ତ୍ରୀ ଙ୍କୁ ଗ୍ରାମରେ ମଦ ବିକ୍ରି କରିବା ପାଇଁ ତାଗିଦ୍ କରୁଥିଲେ ମଧ୍ୟ ଲୋକମାନଙ୍କୁ ଧମକ ଚମକ ଦେଉଥିବା ଗ୍ରାମବାସୀ ଅଭିଯୋଗ କରିଛନ୍ତି । ସୋମବାର ସନ୍ଧ୍ୟା ୬ ଘଣ୍ଟା ସମୟରେ ଥାନା ଅଧିକାରୀ ମୃତ୍ୟୁଞ୍ଜୟ ସ୍ବାଇଁ ବିଶେଷ ସୂତ୍ରରୁ ଖବରପାଇ ପୋଲିସ ଟିମ୍ ସହ ଉକ୍ତ ଘରେ ଚଢାଉ କରିଥିଲେ । ଏହି ସମୟରେ ବେଆଇନ ଭାବେ ମଦ ବିକ୍ରି କରୁଥିବା ମିଟୁଙ୍କୁ ପୋଲିସ କାବୁ କରିବା ସହ ପୋଲିସ ଘର ପରିସରରୁ ୫୦ ଲିଟର ଦେଶୀ ରନ୍ଧାମଦ , ୧୨ କେଜି ମହୁଲ ଓ ୨ କେଜି ପିଡ଼ିଆ ଜବତ କରିଥିଲା । ଏନେଇ ଥାନା ମାମଲା ନଂ ୧୧୫/୨୨ ଅନୁସାରେ ମକଦ୍ଦମା ରୁଜୁ କରାଯାଇ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଥିବା ବେଳେ ସେଠାରେ ଜାମିନ ଆବେଦନ ଖାରଜ ହେବାରୁ ଦିଗପହଣ୍ଡି ସବଜେଲ ହାଜତକୁ ପଠାଇ ଦିଆଯାଇଥିବା ଥାନା ଅଧିକାରୀ ଶ୍ରୀ ସ୍ବାଇଁ ସୂଚନା ପ୍ରଦାନ କରିଛନ୍ତି ।
