Kiran Behera
ଗଞ୍ଜାମ ଜିଲ୍ଲା ଦିଗପହଣ୍ଡି ଥାନା ଅଧିନସ୍ଥ ଆଙ୍କୋରଡା ପଞ୍ଚାୟତ ନବରଙ୍ଗପୁର ଗ୍ରାମରେ ରବିବାର ରାତି ୯ ଘଣ୍ଟା ସମୟରେ ସାମାନ୍ୟ ବଚସାକୁ ନେଇ ବିଜୟ କୁମାର ଗୈାଡ ଓରଫ୍ ତୋଫାନ ନାମକ ଜଣେ ଯୁବକଙ୍କ ଛୁରା ମାଡ଼ରେ ଜଣେ ଯୁବକଙ୍କ ମୃତ୍ୟୁ ହୋଇଥିବା ବେଳେ ଅନ୍ୟଜଣେ ଗୁରୁତର ହୋଇ ବ୍ରହ୍ମପୁର ବଡମେଡିକାଲରେ ମୃତ୍ୟୁ ସହ ସଂଗ୍ରାମ କରୁଥିବା ଜଣାପଡିଛି । ମୃତକ ଜଣକ ହେଲେ ଉକ୍ତ ଗ୍ରାମର ବାବୁ ଗୈାଡ ଓ ଗୁରୁତର ହେଲେ ତାଙ୍କ ସହଯୋଗୀ ପ୍ରଦୀପ ସାହୁ ବୋଲି ସୂଚନା ମିଳିଛି । ଖବରନୁଯାୟୀ , ଦିଗପହଣ୍ଡି ଥାନା ଅଞ୍ଚଳରେ ଗତ ପଞ୍ଚାୟତ ନିର୍ବାଚନକୁ ନେଇ ବିଭିନ୍ନ ସ୍ଥାନରେ ରାଜନୈତିକ ପରବର୍ତ୍ତୀ ହିଂସା ଦେଖିବାକୁ ମିଳିଥିବା ବେଳେ ବର୍ତ୍ତମାନ ସ୍ଥାନୀୟ ପୋଲିସ ପ୍ରଶାସନ ପାଇଁ ଏକ ପ୍ରକାର ମୁଣ୍ଡ ବ୍ୟଥାର କାରଣ ପାଲଟିଛି । ଗତ ଏକମାସ ପୂର୍ବେ ଏହି ରାଜନୈତିକ ଶତ୍ରୁତାକୁ ନେଇ ପାଳଝାଡି ଗ୍ରାମର ଦୁଇ ବିଜେଡି ନେତାଙ୍କୁ ନିର୍ମମ ଭାବେ ହତ୍ୟା କରାଯାଇଥିଲା । ଆଜି ପୁଣିଥରେ ଏଭଳି ଘଟଣା ଘଟିବା ପରେ ପୋଲିସ ପାଇଁ ଆଉ ଏକ ଚ୍ୟାଲେଞ୍ଜ ସୃଷ୍ଟି ହୋଇଥିବା ଜଣାପଡିଛି । ରବିବାର ରାତିରେ ମୃତ ବାବୁ ଓ ପ୍ରଦୀପ ଏକ ବାଇକ ଯୋଗେ ଗ୍ରାମକୁ ଯାଉଥିବା ବେଳେ ପୂର୍ବରୁ ଗ୍ରାମ ରାସ୍ତାରେ ଠିଆ ହୋଇଥିବା ଅଭିଯୁକ୍ତ ତୋଫାନ ଜାଣିଶୁଣି ବାବୁଙ୍କୁ ଗାଡ଼ି ମଡ଼େଇ ଦେବୁ କି ବୋଲି କହିଥିଲା । ଏଥିରେ ବାବୁ କାହିଁକି ତୋତେ ମଡାଇବି ବୋଲି କହିବା ସହ ଶେଷରେ ଥଟ୍ଟାରେ କହିଥିଲା ବାଜିଲେ ବାଜିବ । ଏତିକି କହିବା ତୋଫାନକୁ କହିଥିଲା କାହିଁକି ଅଯଥାରେ ମାଡ ଲାଗୁଛୁ । ଏହାପରେ ଉଭୟଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା । ଏହାପରେ ଉଭୟ ଉଭୟଙ୍କ ତଣ୍ଟିକୁ ଧରାଧରି ହୋଇଥିଲେ । ତେବେ ଅଭିଯୁକ୍ତ ତୋଫାନ ପୂର୍ବରୁ ଧରିଥିବା ଏକ ଧାରୁଆ ଛୁରୀ ସାହାଯ୍ୟରେ ବାବୁର ବେକ ସମେତ ଶରୀରର ବିଭିନ୍ନ ସ୍ଥାନରେ ଆକ୍ରମଣ କରିଥିଲା । ଏହି ସମୟରେ ବାବୁଙ୍କୁ ଛଡ଼ାଇବାକୁ ଯାଇଥିବା ପ୍ରଦୀପକୁ ମଧ୍ୟ ତୋଫାନ ଛାଡି ନଥିଲା । ଏହାଦେଖି ତୋଫାନର ମାଆ ଛଡ଼ାଇବାକୁ ଆସିଥିବା ବେଳେ ଛୁରୀ ବାଜି ହାତ କଟି ଯାଇଥିଲା । ଘଟଣାପରେ ଗ୍ରାମବାସୀ ପହଞ୍ଚି ବାବୁ ଓ ପ୍ରଦୀପଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ଦିଗପହଣ୍ଡି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଇଥିଲେ ମଧ୍ୟ ଅବସ୍ଥା ସଂକଟାପନ୍ନ ହେବାରୁ ବ୍ରହ୍ମପୁର ବଡମେଡିକାଲ ସ୍ଥାନାନ୍ତରିତ କରାଯାଇଥିଲା । ତେବେ ବ୍ରହ୍ମପୁର ବଡମେଡିକାଲ ଡାକ୍ତର ବାବୁଙ୍କୁ ମୃତ ଘୋଷଣା କରିଥିବା ବେଳେ ପ୍ରଦୀପଙ୍କୁ ଚିକିତ୍ସା ନିମନ୍ତେ ଭର୍ତ୍ତି କରାଇଥିଲେ । ତେବେ ଏହି ମାମଲାରେ ଦିଗପହଣ୍ଡି ପୋଲିସ ଥାନା ଅଧିକାରୀ ଦିପ୍ତୀରଞ୍ଜନ ବେହେରା ମେଡିକାଲରେ ପହଞ୍ଚି ଘଟଣାର ତଦନ୍ତ କରୁଥିବା ବେଳେ ଅଭିଯୁକ୍ତ ତୋଫାନ ଘଟଣାସ୍ଥଳରୁ ଫେରାର ରହିଥିବା ଜଣାପଡିଛି ।
