Kiran Behera
ଗଞ୍ଜାମ ଜିଲ୍ଲା ଦିଗପହଣ୍ଡି ବ୍ଲକ କେ . ନୂଆଗାଁ ଥାନା ଅର୍ନ୍ତଗତ ଗୈାଡଗାଁ ଗ୍ରାମରେ ବିବାହ କରିଥିବା ଲିଲି ନାବିକ ନାମ୍ନୀ ଜଣେ ମହିଳାଙ୍କ ନିଜ ବାପା ଘର ଭ୍ରମରପୁର ଗ୍ରାମରେ ସନ୍ଦେହଜନକ ମୃତ୍ୟୁ ହୋଇଥିବା ଜଣାପଡିଛି । ଖବରନୁଯାୟୀ , ମୃତ ଲିଲି ଗୌଡଗାଁର ସୁଦାମ ନାଇକଙ୍କୁ କିଛି ଦିନ ତଳେ ବିବାହ କରିଥିଲେ । ବିବାହର କିଛିଦିନ ପରେ ଉଭୟେ ସ୍ଵାମୀ - ସ୍ତ୍ରୀ ଭ୍ରମରପୁର ଗ୍ରାମରେ ଲିଲିଙ୍କ ବାପ ଘରେ ରହି ଦିନ ମଜୁରିଆ ଭାବେ କାମ କରୁଥିଲେ । ଲିଲିଙ୍କ ବାପା ମୃତ୍ୟୁବରଣ କରିସାରିଥିବାରୁ ଲିଲି ନିଜ ସ୍ବାମୀଙ୍କ ସହ ଭାଇ - ଭାଉଜଙ୍କ ସହ ହସ ଖୁସିରେ ରହୁଥିଲେ । ତେବେ ସୋମବାର ରାତି ପ୍ରାୟ ୯ ଟାରେ କୌଣସି କାରଣରୁ ଲିଲି ମାନସିକ ଭାରସାମ୍ୟ ହରାଇ କୀଟନାଶକ ଔଷଧ ସେବନ କରିଥିବା ବେଳେ ଗୁରୁତର ଅବସ୍ଥାରେ ପାତ୍ରପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା । ତେବେ ବିଳମ୍ବିତ ରାତିରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଥିଲା ବୋଲି ମୃତକଙ୍କ ସ୍ଵାମୀ ପୋଲିସକୁ ସୂଚନା ଦେଇଛନ୍ତି । ଅନ୍ୟପକ୍ଷରେ ପୋଲିସ ଖବରପାଇ ମଙ୍ଗଳବାର ସକାଳୁ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ପହଞ୍ଚି ମୃତଦେହ ଜବତ କରିଥିଲା । ଏନେଇ ଥାନା ଅପମୃତ୍ୟୁ ମାମଲା ନଂ.୯/୨୨ ଅନୁଯାୟୀ ମୃତଦେହକୁ ବ୍ୟବଚ୍ଛେଦ ନିମନ୍ତେ ବ୍ରହ୍ମପୁର ବଡ଼ ଡାକ୍ତରଖାନାକୁ ପଠାଯାଇଥିଲା । ସେଠାରେ ବ୍ୟବଚ୍ଛେଦ ପରେ ମୃତଦେହକୁ ପୋଲିସ ପରିବାର ଲୋକଙ୍କୁ ହସ୍ତାନ୍ତର କରିବା ପରେ ଶୋକାକୁଳ ପରିବେଶ ମଧ୍ୟରେ ଗାଁ ଶ୍ମଶାନରେ ଅନ୍ତିମ ସଂସ୍କାର କରାଯାଇଛି । ତେବେ ଶବ ବ୍ୟବଚ୍ଛେଦ ରିପୋର୍ଟ ମିଳିବା ପରେ ମୃତ୍ୟୁର ପ୍ରକୃତ କାରଣ ଜଣାପଡିବ ବୋଲି ପୋଲିସ ପକ୍ଷରୁ ସୂଚନା ଦିଆଯାଇଛି ।
