ବ୍ରହ୍ମପୁର ସ୍ଥାନୀୟ ମହାମୟୀ ମହିଳା ମହାବିଦ୍ୟାଳୟରେ ଛାତ୍ରୀ ମାନେ କ୍ୟାମ୍ପସକୁ ସ୍ମାର୍ଟଫୋନ ଆଣିବା ଉପରେ ଗତ ୩୦ ତାରିଖରୁ କଟକଣା ଜାରି କରିଥିଲେ କଲେଜ ଅଧକ୍ଷ । ଏହାକୁ ନେଇ ଆଜି କଲେଜ ପରିସରରେ ଛାତ୍ରୀ ମାନଙ୍କ ତରଫରୁ ତୀବ୍ର ଅସନ୍ତୋଷ ଦେଖା ଦେଇଛି। ଏହି ଘଟଣାକୁ ନେଇ ସୋମବାର ଦିନ ଶତାଧିକ ଛାତ୍ରୀ ଦସ୍ତଖତ ସଂଗୃହିତ ଏକ ଦାବିପତ୍ର ଅଧ୍ୟକ୍ଷ ଏସ.ନାରାୟଣ ରାଓଙ୍କୁ ପ୍ରଦାନ କରିବାକୁ ଯାଇଥିଲେ। ତେବେ ଅଧକ୍ଷ ଦାବିପତ୍ର ଗ୍ରହଣ କରିବାକୁ ମନା କରିଦେଇଥିବା ବେଳେ ଅଭିଭାବକଙ୍କୁ ଡାକିବା ପାଇଁ କହିଥିଲେ। ଏହାକୁ ଛାତ୍ରୀମାନେ ବିରୋଧ କରିଥିଲେ। ବର୍ତ୍ତମାନ ସମୟକୁ ଡିଜିଟାଲ ଯୁଗ ବୋଲି କୁହାଯାଉଛି। ହେଲେ ସ୍ମାର୍ଟଫୋନ ବ୍ୟବହାର ଉପରେ କଟକଣା ଜାରି କରି ଛାତ୍ରୀଙ୍କୁ ଅଜ୍ଞାନତାର ଅନ୍ଧାରକୁ ଠେଲି ଦିଆଯାଉଛି ବୋଲି ସେମାନେ ଅଭିଯୋଗ କରିଥିଲେ। ଏହାକୁ ନେଇ ଉତେଜନା ଲାଗି ରହିଥିଲା। ତେବେ ଅଧ୍ୟକ୍ଷ ରାଓ କୌଣସି ଦାବି ମାନିବାକୁ ରାଜି ହୋଇନଥିଲେ। ଅଧ୍ୟକ୍ଷ ରାଓ କହିଛନ୍ତି ଯେ, ଶନିବାର ଠାରୁ ସ୍ମାର୍ଟଫୋନ ବ୍ୟବହାର ଉପରେ କଟକଣା ଲାଗୁ ହୋଇଛି ଏବଂ ସେବେଠାରୁ କ୍ୟାମ୍ପସରେ ଶୃଙ୍ଖଳା ଅଛି। ପିଲାମାନେ ଅଧିକ ସଂଖ୍ୟାରେ କ୍ଲାସକୁ ଆସୁଛନ୍ତି। ଏଣୁ କଟକଣା ପ୍ରତ୍ୟାହାର କରାଯିବ ନାହିଁ ବୋଲି ସେ କହିଛନ୍ତି।