ଶ୍ରାବଣ ମାସର ଶେଷ ସୋମବାର ଅବସରରେ ଆଜି ଦିଗପହଣ୍ଡି ବ୍ଳକ ଅନ୍ତର୍ଗତ ବିଭିନ୍ନ ଶୈବପୀଠରେ ବୋଲବମ ଭକ୍ତଙ୍କ ପ୍ରବଳ ଭିଡ଼ ଦେଖିବାକୁ ମିଳିଥିଲା । ଏହି ଅବସରରେ ଗତ ଦୁଇଦିନ ଧରି ଲଘୁଚାପଜନିତ ବର୍ଷା ସ୍ଥାନୀୟ ଅଞ୍ଚଳରେ ଲାଗି ରହିଥିଲେ ମଧ୍ୟ ବର୍ଷାମାଡକୁ ଖାତିରି ନକରି ଜଳାଭିଷେକ ଲାଗି ଶୈବପୀଠ ଗୁଡିକରେ କାଉଡିଆଙ୍କ ମଧ୍ୟରେ ଲମ୍ବା ଲାଇନ ସହ ଉତ୍ସାହ ଦେଖିବାକୁ ମିଳିଥିଲା । ଖବରନୁଯାୟୀ , ଗତ ଦୁଇବର୍ଷ ଧରି ମହାମାରୀ କରୋନା ଯୋଗୁଁ ପ୍ରଶାସନର ନିର୍ଦ୍ଦେଶ କ୍ରମେ ଜଳଯାତ୍ରା ବନ୍ଦ ରହିଥିବା ବେଳେ ଚଳିତ ବର୍ଷ ବୋଲବମ୍ ଭକ୍ତଙ୍କ ମଧ୍ୟରେ ଜଳାଭିଷେକ କରିବା ଦ୍ୱାରା ମାନସିକ ପୂର୍ଣ୍ଣ ହୋଇଥାଏ ବୋଲି ବିଶ୍ଵାସ ରଖି କାନ୍ଧରେ ବାହୁଙ୍ଗୀ ଧରି ବିଭିନ୍ନ ନଦୀରୁ ଜଳ ଉଠାଇ ଜଳଯାତ୍ରା କରି ଶୈବପୀଠକୁ ଯାଇଥାନ୍ତି । ଚଳିତ ବର୍ଷ ଦିଗପହଣ୍ଡି ଅଞ୍ଚଳର ପ୍ରମୁଖ ଶୈବପୀଠ ଖମ୍ବାରୀ ଗାଁ ର ଉଜଳେଶ୍ବର , କମଳାପୁରର କାଶୀ ବିଶ୍ଵନାଥ , ବଡପଦାର ଉଦୟନାଥେଶ୍ବର , ଦିଗପହଣ୍ଡି ସହରର ଗୁପ୍ତେଶ୍ୱର , ନୀଳକଣ୍ଠେଶ୍ଵର ସମେତ ଆଖପାଖ ଶୈବପୀଠରେ ଭିଡ଼ ପରିଲକ୍ଷିତ ହୋଇଥିଲା । ଏଥିସହ ଦିଗପହଣ୍ଡି ଅଞ୍ଚଳର ଶିବଶଙ୍କର ବୋଲବମ୍ ସଂଘ ଓ ଆଖପାଖ ଗ୍ରାମାଞ୍ଚଳ ମାନଙ୍କରୁ ବିଭିନ୍ନ କାଉଡିଆ ମାନେ ଗତକାଲି ନିକଟସ୍ଥ ନଦୀ ମାନଙ୍କରୁ ଗଙ୍ଗାମାତାଙ୍କୁ ଆହ୍ବାନ କରି ମହାଦେବଙ୍କୁ ପୂଜାର୍ଚ୍ଚନା କରି ପ୍ରବଳ ବର୍ଷାରେ ଭିଜି ଆଜି ଜଳାଭିଷେକ କରିଥିବା ଜଣାପଡିଛି ।