Kiran Behera
ଦୀର୍ଘ ୧୦ ଘଣ୍ଟା ଅତିବାହିତ ପରେ ଫାସିଗୁଡା ପଞ୍ଚାୟତ ବାଙ୍ଗରଡା ଗ୍ରାମର ନିଖୋଜ ଯୁବକ ବଳରାମ ଡାକୁଆଙ୍କ ମୃତଦେହ ବୁଧବାର ସକାଳୁ ଗ୍ରାମବାସୀଙ୍କ ସହାୟତାରେ ଉଦ୍ଧାର କରାଯାଇଥିବା ଜଣାପଡିଛି । ଘଟଣାସ୍ଥଳରେ ପାଟପୁର ପୋଲିସ ପହଞ୍ଚି ମୃତଦେହ ଜବତ କରି ଅପମୃତ୍ୟୁ ମାମଲା ରୁଜୁ କରି ତଦନ୍ତ ଚଳାଇଥିବା ଜଣାପଡ଼ିଛି । ଖବରନୁଯାୟୀ , ଗତକାଲି ଗଞ୍ଜାମ ଜିଲ୍ଲା ଦିଗପହଣ୍ଡି ବ୍ଳକ ଫାସିଗୁଡା ପଞ୍ଚାୟତ ପାଟପୁର ଥାନା ଅନ୍ତର୍ଗତ ବାଙ୍ଗରଡା ଗ୍ରାମ ପାର୍ଶ୍ବ ଦେଇ ପ୍ରବାହିତ ଘୋଡାହଡ ନଦୀର ଶାଖା ରାଉତରାୟ ନାଳକୁ ଜଗନ୍ନାଥ ସେଠୀ ଓ ବଳରାମ ମିଶି ଯାଇଥିଲେ । ତେବେ ଗତ କିଛିଦିନ ଧରି ଅପରାହ୍ନରେ ପ୍ରବଳ ବର୍ଷା ହେତୁ ନାଳରେ ପ୍ରବଳ ବର୍ଷାଜଳ ପ୍ରଖର ସ୍ରୋତରେ ପ୍ରବାହିତ ହେଉଥିଲା । ଏଭଳି ସମୟରେ ଅସାବଧାନତା କାରଣରୁ ପ୍ରଖର ଜଳ ସ୍ରୋତରେ ଦୁଇ ଯୁବକ ଭାସି ଯାଇଥିଲେ । ତେବେ ଗ୍ରାମବାସୀ ଜଗନ୍ନାଥଙ୍କୁ ଉଦ୍ଧାର କରିଥିବା ବେଳେ ବଳରାମ ନିଖୋଜ ରହିଥିଲେ । ଖବରପାଇ ଘଟଣାସ୍ଥଳରେ ଦିଗପହଣ୍ଡି ଓ ସାନଖେମୁଣ୍ଡି ଦମକଳ ବାହିନୀ କର୍ମଚାରୀ ପହଞ୍ଚି ନିଖୋଜ ବଳରାମଙ୍କୁ ଉଦ୍ଧାର ପାଇଁ ଆପ୍ରାଣ ଚେଷ୍ଟା କରିଥିଲେ ମଧ୍ୟ ସନ୍ଧ୍ୟା ପର୍ଯ୍ୟନ୍ତ କୈାଣସି ସନ୍ଧାନ ପାଇନଥିଲେ । ଗୋଟିଏ ପଟେ ଜଗନ୍ନାଥ ବର୍ତ୍ତମାନ ଚିକିତ୍ସାଧୀନ ରହିଥିବା ବେଳେ ଆଜି ସକାଳ ସାଢେ ୭ ଘଣ୍ଟା ସମୟରେ ବଳରାମର ମୃତଦେହ ନିକଟସ୍ଥ ଚେକଡ୍ଯାମ ପାଖରେ ଭାସୁଥିବା ଦେଖିବାକୁ ପାଇଥିଲେ । ତେବେ ଗ୍ରାମବାସୀ ଗଭୀର ଜଳରାଶି ମଧ୍ୟରେ ପଶି ପାଣିକୁ କାଟି ଉଦ୍ଧାର କରିଥିଲେ । ଏହାପରେ ପୋଲିସ ଶବ ଜବତ କରି ବ୍ୟବଚ୍ଛେଦ ସକାଶେ ବ୍ରହ୍ମପୁର ପଠାଇଥିବା ଜଣାପଡିଛି । ଘଟଣାପରେ ଫାସିଗୁଡା ସରପଞ୍ଚ ପ୍ରତିନିଧି ଶିବରାମ ପ୍ରଧାନ ଓ ପୂର୍ବତନ ସରପଞ୍ଚ ଦିଲୀପ ସେଠୀ ପହଞ୍ଚି ପରିବାରକୁ ସାନ୍ତ୍ଵନା ଦେବା ସରକାରୀ ସହାୟତା ଯୋଗାଇ ଦେବା ପାଇଁ ଗ୍ରାମବାସୀ ଦାବି କରିଛନ୍ତି ।
