ଆଗକୁ ସାଧାରଣ ନିର୍ବାଚନ ପାଖେଇ ଆସୁଥିବାବେଳେ ରବିବାର ଦିନ ଦିଗପହଣ୍ଡି ନିର୍ବାଚନ ମଣ୍ଡଳୀ ଭାରତୀୟ ଜନତା ପାର୍ଟି ତରଫରୁ ସ୍ଥାନୀୟ ବଜାରସାହି ଗାନ୍ଧୀ ଛକଠାରେ ଏକ ବିଶାଳ ବିଜୟ ସଂକଳ୍ପ ସମାବେଶ କାର୍ଯ୍ୟକ୍ରମ ଆୟୋଜିତ ହୋଇଯାଇଛି । ଆୟୋଜିତ ସମାବେଶରେ ଦିନିକିଆ ଗସ୍ତରେ ଆସିଥିବା କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମୁଖ୍ୟ ଅତିଥିଭାବେ ଯୋଗଦେଇଥିଲେ । ରବିବାର ମଧ୍ୟାହ୍ନ ସମୟରେ ଶ୍ରୀଯୁକ୍ତ ପ୍ରଧାନ ହେଲିକପ୍ଟର ଯୋଗେ ଦିଗପହଣ୍ଡି ଖେଳପଡିଆ ଠାରେ ଅବତରଣ କରିବା ପରେ ଦଳୀୟ କର୍ମୀ ଓ ନେତାମାନେ ପୁଷ୍ପଗୁଚ୍ଛ ଦେଇ ସମ୍ବର୍ଦ୍ଧିତ କରିଥିଲେ । ସେଠାରୁ ଏକ ବିରାଟ ଶୋଭାଯାତ୍ରାରେ ନଗର ପରିକ୍ରମା କରି ମନ୍ତ୍ରୀଙ୍କୁ ବଜାର ଠାରେ ଆୟୋଜିତ ହୋଇଥିବା ସଭାସ୍ଥଳକୁ ପାଛୋଟି ନେଇଥିଲେ । ମନ୍ତ୍ରୀ ପ୍ରଧାନ ନିଜ ଅଭିଭାଷଣରେ ରାଜ୍ୟ ସରକାରଙ୍କ କାର୍ଯ୍ୟକଳାପକୁ ଦୃଢ ନିନ୍ଦା କରିବା ସହ ବିଜେଡି ସରକାରଙ୍କ ସାଧାରଣ ଲୋକମାନଙ୍କ ଉପରେ ହେଉଥିବା ଦୁର୍ନୀତି , ଭ୍ରଷ୍ଟାଚାର , ଅନ୍ଯାୟ , ଅତ୍ୟାଚାର ଆଦିକୁ ଦମନ କରି ଆଗାମୀ ଦିନରେ ଦିଗପହଣ୍ଡି ନିର୍ବାଚନ ମଣ୍ଡଳୀ ତଥା ରାଜ୍ୟରେ ଏକ ସରକାର ଗଠନ କରିବା ପାଇଁ ଆହ୍ୱାନ ଦେଇଥିଲେ ଏବଂ ଅପ୍ରେଲ ୧୧ ତାରିଖରେ ହେବାକୁ ଥିବା ସାଧାରଣ ନିର୍ବାଚନରେ ବିଧାନସଭା ପ୍ରାର୍ଥୀନୀ ପିଙ୍କି ପ୍ରଧାନ ଓ ଲୋକସଭା ପ୍ରାର୍ଥୀ ଭୃଗୁ ବକ୍ସିପାତ୍ର ପାଇଁ ସାଧାରଣ ଜନତାଙ୍କୁ ମତଦାନ ନିମନ୍ତେ ଭିକ୍ଷା ଲୋଡିଥିଲେ ।
ସେହିପରି ପିଙ୍କି ପ୍ରଧାନ ନିଜକୁ ଏକ ଘାଇଲା ବାଘୁଣୀ ବୋଲି ପ୍ରକାଶ କରିଥିଲେ । ଆୟୋଜିତ ସଭାକାର୍ଯ୍ୟରେ ଅନ୍ୟମାନଙ୍କ ମଧ୍ୟରେ ଲୋକସଭା ପ୍ରାର୍ଥୀ ଭୃଗୁ ବକ୍ସିପାତ୍ର , ବିଧାନସଭା ପ୍ରାର୍ଥୀନୀ ପିଙ୍କି ପ୍ରଧାନ , ବବିତା ପାତ୍ର , ଶ୍ରୀକାନ୍ତ ପାଢ଼ୀ ,ମହନ୍ତ ଚିନ୍ମୟାନନ୍ଦ ଦାସ , ଅମୂଲ୍ୟ ଚୈଧୁରୀ , ପରେଶ ଚନ୍ଦ୍ର ରଥ, ମନୋଜ କୁମାର ପଣ୍ଡା , ସୁଭେନ୍ଦୁ ପାଢ଼ୀ , ଭବାନୀ ଶଙ୍କର ପଣ୍ଡା , ସିଦ୍ଧାନ୍ତ ଗଙ୍ଗଦେଓ , ଶ୍ରୀଧର ଦେଓ , ଅଶ୍ବିନୀ ସାହୁ , ବିଶାଳ ମହାନ୍ତି , ସୂର୍ଯ୍ୟ ନାରାୟଣ ସାହୁ , ବନଜା ପଣ୍ଡା , ବାପି ପ୍ରଧାନ ପ୍ରମୁଖ ସମ୍ମାନୀୟ ଅତିଥିଭାବେ ମଞ୍ଚାସିନ ଥିବାବେଳେ ସମସ୍ତ ମଣ୍ଡଳ ସଭାପତି ଓ ୫ହଜାରରୁ ଉର୍ଦ୍ଧ୍ବ ବିଜେପି କର୍ମୀ ଯୋଗ ଦେଇଥିଲେ ।