Gouri Shankar Mishra
ବ୍ରହ୍ମପୁର ମହାନଗର ନିଗମ ଦ୍ୱାରା ଗାଈ ମାଲିକଙ୍କୁ ଯେତେ ସଚେତନତା କଲେ ମଧ୍ୟ ଗାଈ ମାଲିକମାନେ ଗୋଟିଏ କାନରେ ଶୁଣି ଅନ୍ୟ କାନରେ ଛାଡ଼ି ଦେଉଥିବା ଦେଖିବାକୁ ମିଳୁଛି । ସହରର ବିଭିନ୍ନ ସମସ୍ୟା ମଧ୍ୟରେ ରାସ୍ତାରେ ବୁଲୁଥିବା ବୁଲା ଗାଈଗୋରୁଙ୍କ ସମସ୍ୟା ସବୁଠାରୁ ଅଧିକ । କେତେବେଳେ ଦୁର୍ଘଟଣା ତ ଆଉ କେତେବେଳେ ଅନାବନା ଖାଦ୍ୟ ଖାଇ ମୃତ୍ୟୁ ମୁଖରେ ପଡିଥାନ୍ତି ଏହି ନିରୀହ ପଶୁ ମାନେ । ଆଜି ଏଭଳି ଏକ ଅଭାବନୀୟ ଦୃଶ୍ୟ ଦେଖିବାକୁ ମିଳିଥିଲା ବିଜିପୁର ସନ୍ତୋଷୀ ମା' ନିକଟସ୍ଥ ନିଳକଣ୍ଠ ନଗର ୧ମ ଗଳିରେ । ମିଳିଥିବା ସୂଚନା ଅନୁଯାୟୀ ବିଷାକ୍ତ ଖାଦ୍ୟ ଖାଇ ଏକ ବାଛୁରୀ ମୃତ୍ୟୁ ସହ ସଂଗ୍ରାମ କରୁଥିବା ଆଇନଜୀବୀ ତଥା ସମାଜସେବୀ ରବୀନ୍ଦ୍ର କୁମାର ସାହୁଙ୍କ ନଜରକୁ ଆସିଥିଲା। ସେ ହତ୍ ବାକ୍ ହୋଇ କାଳବିଳମ୍ବ ନକରି ଘଟଣା ସଂମ୍ପର୍କରେ ପଶୁପ୍ରେମୀ ଲଲାଟେନ୍ଦୁ ଚୌଧୁରୀଙ୍କ ଦୃଷ୍ଟି ଗୋଚର କରିବା ପରେ, ସେ ପଶୁ ଚିକିତ୍ସାଳୟର ଡାକ୍ତର ବିଭୁ ପ୍ରସାଦ ପଣ୍ଡାଙ୍କ ସହ ଯୋଗାଯୋଗ କରିଥିଲେ। ଖବର ପାଇ ତୁରନ୍ତ ପଶୁ ଆମ୍ବୁଲାନ୍ସ କର୍ମଚାରୀ ଘଟଣା ସ୍ଥଳରେ ପହଞ୍ଚିବା ଫଳରେ ବାଛୁରୀଟିର ଜୀବନ ବଞ୍ଚି ଯାଇଥିଲା। ଏଥିରେ ଶ୍ରୀ ଚୌଧୁରୀଙ୍କ ସମେତ ସ୍ବେଛାସେବୀ ଶକ୍ତି ରଞ୍ଜନ ସାହୁ, କାହ୍ନା ପଣ୍ଡା ଏବଂ ବହୁ ସ୍ଥାନୀୟ ବାସିନ୍ଦା ଉପସ୍ଥିତ ରହି ଚିକିତ୍ସାରେ ସହଯୋଗ କରିଥିଲେ। ସମାଜସେବୀ ରବୀନ୍ଦ୍ରଙ୍କ ଏହି ମହାନ କାର୍ଯ୍ୟକୁ ୨୬ନମ୍ବର ୱାର୍ଡବାସୀ ଭୂରି ଭୂରି ପ୍ରଶଂସା କରିଛନ୍ତି ।
