ଜେଲ୍ ଗଲେ ପିପିଲିର ବିଜେଡି ବିଧାୟକ ପ୍ରାର୍ଥୀ ପ୍ରଦୀପ ମହାରଥୀ। ଭୁବନେଶ୍ୱର ସ୍ୱତନ୍ତ୍ର କୋର୍ଟରେ ମହାରଥୀଙ୍କ ଜାମିନ ଉପରେ କୋର୍ଟ କୌଣସି ରାୟ ନଦେବାରୁ ତାଙ୍କୁ ଜେଲ ପଠାଇ ଦିଆଯାଇଛି। ୨୪ ତାରିଖରେ ଜାମିନ ଆବେଦନ ଉପରେ ଶୁଣାଣି ହେବ। ସେ ପର୍ଯ୍ୟନ୍ତ ମହାରଥୀ ଝାରପଡ଼ା ଜେଲରେ ରହିବେ ବୋଲି କୋର୍ଟ ନିର୍ଦ୍ଦେଶ ଦେଇଛନ୍ତି।ଏହାସହ ମହାରଥୀ ଜେଲ ଓ୍ୱାର୍ଡରେ ରହି ଚିକିତ୍ସିତ ହେବେ। ଆବଶ୍ୟକ ପଡ଼ିଲେ ଜେଲ କର୍ତ୍ତୃପକ୍ଷ ମହାରଥୀଙ୍କୁ ମେଡିକାଲ ସ୍ଥାନାନ୍ତର କରିପାରନ୍ତି।ରବିବାର ବିଳମ୍ବିତ ରାତିର ଘଟଣା। ହୁଙ୍କେଶ୍ୱରୀସ୍ଥିତ ଫାର୍ମ ହାଉସରେ ଚଢ଼ାଉ କରିଥିଲା ନିର୍ବାଚନ କମିଶନଙ୍କ ଫ୍ଲାଇଂ ସ୍କ୍ୱାଡ୍ ଏବଂ ଏସଏସଟି ଟିମ୍।ହେଲେ ମହାରଥୀଙ୍କ ଉପସ୍ଥିତିରେ ସ୍କ୍ୱାଡ୍ ଉପରେ ଆକ୍ରମଣ ହୋଇଥିବା ଅଭିଯୋଗ ହୋଇଥିଲା। ଏଥିରେ ମାଜିଷ୍ଟ୍ରେଟ ଦାୟିତ୍ୱରେ ଥିବା ରବିନାରାୟଣ ପାତ୍ର ଆହତ ହୋଇଥିଲେ।ଏନେଇ ସ୍କ୍ୱାଡ୍ ପକ୍ଷରୁ ପିପିଲି ଥାନାରେ ଏତଲା ଦିଆଯିବା ପରେ ଆଜି ଅପରାହ୍ଣରେ ମହାରଥୀଙ୍କୁ ଗିରଫ କରାଯାଇଥିଲା। ମହାରଥୀଙ୍କୁ କୋର୍ଟରେ ହାଜର କରିବା ପାଇଁ ନେଇଥିଲା ପୋଲିସ। ହେଲେ କୋର୍ଟ ନିଆଯିବା ବାଟରେ ସେ ବେହୋସ ହୋଇଯିବାରୁ ତାଙ୍କୁ ପିପିଲି ମେଡିକାଲରେ ଭର୍ତ୍ତି କରାଯାଇଥିଲା।ଚିକିତ୍ସିତ ହେବା ପରେ ମହାରଥୀଙ୍କୁ ଭୁବନେଶ୍ୱର ସ୍ୱତନ୍ତ୍ର କୋର୍ଟରେ ହାଜର କରାଯାଇଥିଲା। ଜାମିନ ଆବେଦନ କରିଥିଲେ ମହାରଥୀ। ହେଲେ ଜାମିନ ଆବେଦନ ଉପରେ କୌଣସି ରାୟ ପ୍ରକାଶ କରି ନାହାନ୍ତି କୋର୍ଟ।