Bhagyaprabha News Bureau
ଗଞ୍ଜାମ ଜିଲ୍ଲା ଦିଗପହଣ୍ଡି ବ୍ଲକ ଭ୍ରମରପୁର ପଞ୍ଚାୟତ ବାଲିଗଡ ଗ୍ରାମ ନିକଟରେ ଶନିବାର ଅପରାହ୍ନ ୩ ଘଣ୍ଟା ସମୟରେ କାଳବୈଶାଖୀ ପ୍ରଭାବରେ ଝଡ ତୋଫାନ ସହ ବଜ୍ରପାତ ହୋଇଥିଲା । ଏହି ବଜ୍ରପାତ ମାଡରେ ୧୪ ଟି ବଳଦ , ୨ ଟି ଗାଇ ଓ ୧ ବାଛୁରୀର ମୃତ୍ୟୁ ଘଟିଥିବା ଜଣାପଡିଛି । ସୂଚନାନୁସାରେ , ଅରଖପଦା ଗ୍ରାମର ନିରଞ୍ଜନ ଶବର , ଘାସି ଶବର , ଜୀବନା ଶବର , ସାଙ୍ଗିନି ଶବର , ସନିଆ ଶବର , ରାମଚନ୍ଦ୍ର ଶବର , ପୁନି ଶବର , ବାଲାଜୀ ଶବର , ସେଡେଙ୍ଗା ଶବର ଏବଂ ବାଲିଗଡ ଗ୍ରାମର ହାଡିଆ ଦଳେଇ , ମୋହନ ଦଳେଇ , ଲୁଲା ନାୟକ , ଜୁରିଆ ନାୟକ ଓ ସମ୍ଭାରୁ ନାୟକଙ୍କ ବଳଦ , ଗାଈ ଓ ବାଛୁରୀ ଏକ ଗଛମୂଳେ ଥିବା ବେଳେ ଏହି ବଜ୍ରପାତ ଘଟିଥିଲା । ଘଟଣାସ୍ଥଳରେ ସେମାନଙ୍କ ମୃତ୍ୟୁ ଘଟିଥିବା ବେଳେ ୨ ଟି ବାଛୁରୀ ଗୁରୁତର ହୋଇଥିବା ଜଣାପଡିଛି ।
ଆହତ ବାଛୁରୀ ୨ଟିକୁ ଦେଶୀ ଉପଚାରରେ ଗ୍ରାମବାସୀ ଚିକିତ୍ସା କରିବା ପରେ ସାମାନ୍ୟ ସୁସ୍ଥ ଥିବା ଜଣାପଡିଛି । ଗ୍ରାମବାସୀଙ୍କ ପକ୍ଷରୁ ଏନେଇ କେ . ନୂଆଗାଁ ଥାନାରେ ଏତଲା ଦିଆଯିବା ସହ ଦିଗପହଣ୍ଡି ତହସିଲଦାର ଅଦୈତ୍ୟ କୁମାର ସ୍ଵାଇଁଙ୍କୁ ଖବର ଦିଆଯାଇଥିଲା । ଭ୍ରମରପୁର ଗ୍ରାମର ସାମାଜିକ କର୍ମୀ ସୁଶାନ୍ତ କୁମାର ଷଡ଼ଙ୍ଗୀ ଘଟଣାସ୍ଥଳରେ ପହଞ୍ଚି ସବିଶେଷ ତଥ୍ୟ ସଂଗ୍ରହ କରି ଫେରିଛନ୍ତି । ସମସ୍ତ କ୍ଷତିଗ୍ରସ୍ତ ଚାଷୀଙ୍କୁ କ୍ଷତିପୂରଣ ପାଇଁ ସାଧାରଣରେ ଦାବି କରିଛନ୍ତି । ବମକୋଇ ପ୍ରାଣୀ ଉପ ଚିକିତ୍ସାଳୟରେ ଡା . ନିରଞ୍ଜନ ପଣ୍ଡାଙ୍କୁ ପଚାରିବାରୁ ବଜ୍ରପାତରେ ପ୍ରାଣୀଙ୍କ ମୃତ୍ୟୁ ଖବର ସେ ପାଇଛନ୍ତି । ରବିବାର ସକାଳେ ଏଲ୍. ଆଇ ବାଳକୃଷ୍ଣ ପ୍ରଧାନଙ୍କ ସହ ସେ ଘଟଣାସ୍ଥଳରେ ପହଞ୍ଚି ପ୍ରାଣୀଗୁଡିକର ମୃତଦେହ ଗୁଡିକୁ ବ୍ୟବଛେଦ କରାଇବେ ବୋଲି କହିଛନ୍ତି ।
