Bhagyaprabha News Bureau
ଗଞ୍ଜାମ ଜିଲ୍ଲା ଦିଗପହଣ୍ଡି ବ୍ଲକରେ ଗତ ୬ ତାରିଖ ଅପରାହ୍ନରେ କେ . ନୂଆଗାଁ ଥାନା ଅର୍ନ୍ତଗତ ବୀର ଲକ୍ଷ୍ମୀନାରାୟଣପୁର ଗ୍ରାମରେ ହୀରା ବ୍ଯବସାୟୀ ସୁବାସ ଚନ୍ଦ୍ର ପଣ୍ଡାଙ୍କୁ ହୋଇଥିବା ଗୁଳିମାଡ଼ ଘଟଣାରେ ନୂଆଗାଁ ପୋଲିସ ୪ ଜଣ ଅଭିଯୁକ୍ତଙ୍କୁ ଗିରଫ କରିଥିବା ଜଣାପଡ଼ିଛି । ଗିରଫ ଅଭିଯୁକ୍ତମାନେ ହେଲେ ପାତ୍ରପୁର ଗ୍ରାମର ଏ . ସନ୍ତୋଷ , ମର୍ଦ୍ଦରାଜପୁର ଗ୍ରାମର ମାଧବ ପାଣିଗ୍ରାହୀ , ବ୍ରହ୍ମପୁର ଗୋଷାଣୀ ନୂଆଗାଁର ହିମାଂଶୁ ସାହୁ ଏବଂ ବଡ଼ବଜାର ଥାନା ଗଣେଶ ନଗରର ପ୍ରଦୀପ ସୁବୁଦ୍ଧି ବୋଲି ଜଣାପଡିଛି । ନୂଆଗାଁ ଥାନା କେସ ନଂ - ୧୦୮/୧୯ ଅନୁଯାୟୀ ୪ ଅଭିଯୁକ୍ତଙ୍କୁ ଗିରଫ କରାଯାଇ ଦିଗପହଣ୍ଡି କୋର୍ଟ ଚାଲାଣ କରାଯାଇଥିଲା । ସେଠାରେ ଜାମିନ ନାମଞ୍ଜୁର ଅଭାବରୁ ଦିଗପହଣ୍ଡି ସବଜେଲ ହାଜତକୁ ପଠାଇ ଦିଆଯାଇଛି । ସୂଚନା ଅନୁସାରେ , ଗତ ୬ ତାରିଖ ଅପରାହ୍ନରେ ହୀରା ବ୍ଯବସାୟୀ ସୁବାସ ପଣ୍ଡାଙ୍କୁ ଅଭିଯୁକ୍ତମାନେ କୈଶଳକ୍ରମେ ଘରଠାରୁ ପ୍ରାୟ ୫୦ ମିଟର ଦୂରକୁ ଡ଼ାକିନେଇ ଗୁଳିକରି ସେଠାରୁ ଚାଲିଯାଇଥିଲେ । ଗୁଳିମାଡରେ ସୁବାସଙ୍କ ଆଖିରେ ଗଭୀର କ୍ଷତ ଲାଗିଥିଲା । ଚିକିତ୍ସାଧୀନ ଅବସ୍ଥାରେ ତାଙ୍କ ଝିଅର ଏତଲା କ୍ରମେ ପୋଲିସ ମାମଲା ରୁଜୁ କରିଥିଲା ।
