ଶନିବାର ସନ୍ଧ୍ୟାରେ ଗଞ୍ଜାମ ଜିଲ୍ଲାର ପାଟପୁର ଥାନା ଅନ୍ତର୍ଗତ ପୋଡାମାରି ହାଡିସାହି ନିକଟରେ ଏକ କାର ଧକ୍କାରେ ଜଣେ ବାଇକ ଚାଳକ ଗୁରୁତର ଆହତ ହୋଇଥିବା ଜଣାପଡିଛି । ଗୁରୁତର ଚାଳକ ଜଣକ ହେଲେ ସାନଖେମୁଣ୍ଡି ବ୍ଲକ ଛଣମେରୀ ପଞ୍ଚାୟତ ଖଣ୍ଡଦେଉଳି ଗ୍ରାମର ବ୍ରଜ ସେଠୀଙ୍କ ପୁଅ ପ୍ରମୋଦ ସେଠୀ (୩୫) ବୋଲି ଜଣାପଡିଛି । ଖବର ପ୍ରକାରେ , ଗୁରୁତର ପ୍ରମୋଦ ଗଜପତି ଜିଲ୍ଲାର ମୋହନା ଅଞ୍ଚଳରେ ବ୍ଯବସାୟ କରନ୍ତି । ଶନିବାର ରଜ ସଂକ୍ରାନ୍ତି ଥିବାରୁ ନିଜ ଗ୍ରାମକୁ ଆସି ସନ୍ଧ୍ୟାରେ ନିଜ ଗ୍ଳେମର ବାଇକ (ଓଡି୦୭କ୍ଯୁ ୪୯୦୫) ଯୋଗେ ମୋହନା ଫେରୁଥିବା ସମୟରେ ବିପରୀତ ଦିଗ ଚନ୍ଦ୍ରଗିରିରୁ ବ୍ରହ୍ମପୁର ଅଭିମୁଖେ ଯାଉଥିବା କାର ( ଓଡି ୦୨ ପି ୯୬୭୧) ପ୍ରମୋଦଙ୍କୁ ଧକ୍କ ଦେଇଥିଲା । ଘଟଣାସ୍ଥଳରୁ ଗୁରୁତର ଅବସ୍ଥାରେ ପରିବାର ଲୋକଙ୍କ ଦ୍ୱାରା ଉଦ୍ଧାର କରାଯାଇ ପ୍ରମୋଦଙ୍କୁ ପ୍ରଥମେ ଦିଗପହଣ୍ଡି ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଇଥିଲେ । କିନ୍ତୁ ଅବସ୍ଥା ଗୁରୁତର ଥିବାରୁ ୧୦୮ ଆମ୍ବୁଲାନ୍ସ ଯୋଗେ ବ୍ରହ୍ମପୁର ବଡମେଡିକାଲକୁ ପଠାଇ ଦିଆଯାଇଛି ।