କ୍ରିକେଟ ବିଶ୍ୱକପରେ ଆଜି ଅପରାହ୍ନ ୩ଟାରେ ମଞ୍ଚେଷ୍ଟରର ଓଲ୍ଡ ଟ୍ରାଫୋର୍ଡରେ ଭାରତ ଓ ୱେଷ୍ଟଇଣ୍ଡିଜ୍ ମଧ୍ୟରେ ମ୍ୟାଚ ଅନୁଷ୍ଠିତ ହେବ । ଆଜିର ମ୍ୟାଚ ଜିତି ଭାରତ ସେମି ଫାଇନାଲ୍ ରାସ୍ତା ନିଶ୍ଚିତ କରିବା ଲକ୍ଷ୍ୟରେ ରହିଛି ମେନ୍ ଇନ୍ ବ୍ଲ୍ୟୁ । ସୁଚନାଯୋଗ୍ୟ, ବର୍ତ୍ତମାନ ସୁଦ୍ଧା ଟିମ୍ ଇଣ୍ଡିଆ ୫ଟି ମ୍ୟାଚରୁ ୯ ପଏଣ୍ଟ ପାଇଁ ବିଶ୍ୱକପ୍ ପଏଣ୍ଟ ତାଲିକାର ତୃତୀୟ ସ୍ଥାନରେ ରହିଛି। ଦକ୍ଷିଣ ଆଫ୍ରିକା, ଅଷ୍ଟ୍ରେଲିଆ, ପାକିସ୍ତାନ ଓ ଆଫଗାନିସ୍ତାନକୁ ଧୂଳି ଚଟେଇଛି କୋହଲି ବାହିନୀ। କେବଳ ନ୍ୟୁଜିଲାଣ୍ଡ ବିପକ୍ଷ ମ୍ୟାଚ୍ ବର୍ଷା ପାଇଁ ବାତିଲ ହୋଇଥିଲା। ସେପଟେ ଟକ୍କର ଦେବାକୁ ସମସ୍ତ ଦକ୍ଷତା ରଖିଛି ୱେଷ୍ଟଇଣ୍ଡିଜ। ଏପର୍ଯ୍ୟନ୍ତ ବିଶ୍ୱକପରେ ୬ଟି ମ୍ୟାଚ ଖେଳିଥିବା ବେଳେ ଗୋଟିଏ ବିଜୟ ଓ ୪ଟି ପରଜାୟ ସହ ପଏଣ୍ଟ ତାଲିକାରେ ଅଷ୍ଟମ ସ୍ଥାନରେ ରହିଛି କାରାବେୟାନ୍ ଦଳ।କିନ୍ତୁ ପ୍ରତି ମ୍ୟାଚରେ ପ୍ରତିପକ୍ଷ ଟିମ୍କୁ କଡ଼ା ଚ୍ୟାଲେଞ୍ଜ ଦେଇଛି।ନ୍ୟୁଜିଲାଣ୍ଡ ବିପକ୍ଷ ମ୍ୟାଚରେ ମାତ୍ର ୫ ରନରେ ହାରିଥିଲା ୱେଷ୍ଟଇଣ୍ଡିଜ। ତେଣୁ ଆଜିର ମ୍ୟାଚରେ ରୋମାଞ୍ଚକର ମୁକାବିଲା ଦେଖିବାକୁ ମିଳିପାରେ। ୧୯୭୯ରୁ ଆଜି ପର୍ଯ୍ୟନ୍ତ ବିଶ୍ୱକପର ୪୦ ବର୍ଷ ଇତିହାସରେ ଭାରତ-ୱେଷ୍ଟଇଣ୍ଡିଜ୍ ମାତ୍ର ୮ ଥର ମୁହାଁମୁହିଁ ହୋଇଛନ୍ତି। ଭାରତ ୫ଥର ବିଜୟୀ ହୋଇଥିବା ବେଳେ କାରାବେୟାନ୍ ଟିମ୍ ଜିତିଛି ମାତ୍ପ ୨ଟି ମ୍ୟାଚ୍। ୧୯୯୬ ବିଶ୍ୱକପ ପରଠୁ ୱେଷ୍ଟଇଣ୍ଡିଜ ବିପକ୍ଷରେ କେବେ ବି ମ୍ୟାଚ୍ ହାରି ନାହିଁ ଭାରତ।