Bhagyaprabha News Bureau
ଗଞ୍ଜାମ ଜିଲ୍ଲା ଦିଗପହଣ୍ଡି ବ୍ଳକ ଅନ୍ତର୍ଗତ ଭୀମପୁର ବ୍ରାହ୍ମଣ ଶାସନ ଗ୍ରାମରେ ଗୁରୁବାର ଠାରୁ ଆରମ୍ଭ ହୋଇଯାଇଛି ଗୋପୀନାଥ ମନ୍ଦିର ଶତବାର୍ଷିକ ଉତ୍ସବ । ଏହି ଉତ୍ସବ ପାଇଁ ଗ୍ରାମବାସୀଙ୍କ ପକ୍ଷରୁ ଗ୍ରାମର ଦେଉଳବନ୍ଧରୁ ଅଣାଯାଇଛି ଜଳକଳଶ । ବ୍ରାହ୍ମଣ ପୁରୋହିତ ମାନଙ୍କ ବେଦ ମନ୍ତ୍ରଧ୍ୱନିର ତାଳେ ତାଳେ ଜଳକଳଶ ଅଣାଯିବାପରେ ମନ୍ଦିର ନିକଟରେ ଆରମ୍ଭ ହୋଇଥିବା ବିଶ୍ୱଶାନ୍ତିଯଜ୍ଞସ୍ଥଳରେ କରାଯାଇଛି ଘଟସ୍ଥାପନ । ଗୁରୁବାର ଦିନ ଜଳକଳଶ ଶୋଭାଯାତ୍ରା ଘଟସ୍ଥାପନ ଦୀକ୍ଷାଗ୍ରହଣ ଅଙ୍କୁରାରୋପମ ଇତ୍ୟାଦି କାର୍ଯ୍ୟକ୍ରମ ଆରମ୍ଭ ହୋଇଛି । ଶୁକ୍ରବାରଠାରୁ କର୍ମାରମ୍ଭ ହେବ । ଉତ୍ସବ ରବିବାର ଦିନ ପୂର୍ଣ୍ଣାହୁତି ହେବ । ଏହି ଅବସରରେ ନାମଯଜ୍ଞ , ଘୃତଯଜ୍ଞ, ଅର୍ଣ୍ଣଯଜ୍ଞ ପ୍ରବଚନ ସହିତ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ କରାଯାଉଛି । ଗ୍ରାମର ବରିଷ୍ଠ ପୁରୋହିତ ପଣ୍ଡିତ ମଧୁସୁଦନ ରଥ ଶର୍ମାଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଶତବାର୍ଷିକ ଉତ୍ସବ ପାଳନ ଚାଲିଛି । କର୍ତ୍ତାରୂପେ ଗ୍ରାମର ବୟୋଜ୍ୟେଷ୍ଠ ବ୍ରହ୍ମା ହରିହର ବ୍ରହ୍ମା ଦାୟିତ୍ୱରେ ରହିଛନ୍ତି । ଗ୍ରାମର ବରିଷ୍ଠ ବୈଦିକ ସଂସ୍କୃତି ସଂରକ୍ଷକ ଲଳିତମୋହନ ଦାଶଙ୍କ ନେତୃତ୍ୱରେ ପୁରୋହିତ ପଣ୍ଡିତ ନାରାୟଣ ଦାଶ , ଗୋବର୍ଦ୍ଧନ ରଥ , ସଦାନନ ରଥ , ଅସିତ କୁମାର ରଥ ପ୍ରମୁଖ ଯାଜ୍ଞିକ ପଣ୍ଡିତ ଦାୟିତ୍ୱ ବହନ କରି ପରିଚାଳନା କରୁଛନ୍ତି । ଶତବାର୍ଷିକ ଉତ୍ସବ କମିଟି ପକ୍ଷରୁ ସଚ୍ଚିଦାନନ୍ଦ ମିଶ୍ର , ନବୀନ ରଥ , ଶିବପ୍ରସାଦ ରଥ , ରଞ୍ଜନ ରଥ , ମୁକୁନ୍ଦ ରଥ ପ୍ରମୁଖ ପରିଚାଳନାରେ ସହଯୋଗ କରୁଥିବା ଜଣାପଡିଛି । ଉତ୍ସବ ଦେଖିବା ପାଇଁ ପ୍ରବଳ ଜନସମାଗମ ହୋଇଛି ।
