Bhagyaprabha News Bureau
ରାଜ୍ୟ ସାରା ତିନି ଦିନ ଧରି ଲଘୁଚାପ ବର୍ଷା ଲାଗି ରହିବା ଫଳରେ ଗାଁ ଠାରୁ ସହର ପର୍ଯ୍ୟନ୍ତ ସମସ୍ତେ ନାକେଦମ୍ ହୋଇଥିବା ବେଳେ ସେଥି ମଧ୍ୟରୁ ହିଞ୍ଜିଳିକାଟୁ ସ୍ୱୟଂଶାସିତ ବିଜ୍ଞାନ କଲେଜ ମଧ୍ୟ ବାଦ୍ ପଡ଼ିନାହିଁ । ହିଞ୍ଜିଳିକାଟୁ ଠାରେ ଥିବା ଏକମାତ୍ର ବିଜ୍ଞାନ ମହାବିଦ୍ୟାଳୟର ସ୍ଥିତି ଏବେ ବର୍ଷାରେ ବେହାଲ୍ ହୋଇଯାଇଛି । ତଳ ମହଲା ଠାରୁ ଉପର ମହଲା ପର୍ଯ୍ୟନ୍ତ ସମସ୍ତ କ୍ଲାସ୍ ରୁମ୍ ଓ ଅଫିସ ଜଳ ମଗ୍ନ ହୋଇ ରହିଛି । କଲେଜର ଉପର ମହଲା ଛାତରୁ ପାଣି ଗଳି କ୍ଲାସ୍ ରୁମ୍ ଗୁଡ଼ିକ ଜଳରେ ପରିପୂର୍ଣ୍ଣ ହୋଇ ରହିଛି । ଫଳରେ ପାଠ ପଢାରେ ବହୁ ସମସ୍ୟା ଦେଖାଦେଇଛି । ମହାବିଦ୍ୟାଳୟର ବିଭିନ୍ନ ବିଭାଗର କ୍ଲାସ୍ ରୁମ୍ ରେ ଦେଢ ଫୁଟ ଉଚ୍ଚତାରେ ପାଣି ଜମି ରହିବା ସହ ଟେବୁଲ୍ ବେଂଚ ଆଦି ପାଣିରେ ବୁଡ଼ି ରହିବା ସହ ଛାତ୍ରଛାତ୍ରୀଙ୍କ ସାର୍ଟିଫିକେଟ ଗୁଡ଼ିକ ମଧ୍ୟ ନଷ୍ଟ ହେବାର ଆଶଙ୍କା ରହିଛି । ଏହା ସହ ଛାତ୍ରଛାତ୍ରୀଙ୍କ ଗତ ଶନିବାରରୁ ହେବାକୁ ଥିବା ସେମିଷ୍ଟାର୍ ପରୀକ୍ଷା ବାତିଲ୍ ହୋଇଥିବା ବେଳେ ବର୍ତମାନ ସୁଦ୍ଧା ଜଳ ଜମି ରହିବା ଫଳରେ ବହୁ ସମସ୍ୟାର ସମ୍ମୁଖୀନ ହେଉଥିବା ଦେଖିବାକୁ ମିଳିଛି । ଏନେଇ କଲେଜ ଅଧ୍ୟକ୍ଷଙ୍କ ପଚାରିବାରୁ କଲେଜ ପଛ ପଟ ଭାଗ ଠାରୁ କ୍ଲାସ୍ ରୁମ ଖାଲରେ ଥିବା ଯୋଗୁଁ କ୍ଲାସ ରୁମ୍ ରେ ପାଣି ପଶିଯିବା କଥା କହିଥିଲେ । ଏହା ସହ କଲେଜର ଛାତରୁ ପାଣି ଗଳିବା ଦ୍ୱାରା ଉପର ମହଲା କ୍ଲାସ୍ ରୁମରେ ବସିବା ମଧ୍ୟ ସମ୍ଭବପର ନୁହେଁ ବୋଲି କହିଥିଲେ ।
