ଗ୍ରାମବାସୀଙ୍କ ସହ ନଦୀ ପାର ହୋଇ ଆଦିବାସୀ ଗାଁରେ ପହଞ୍ଚିିଲେ ଗଞ୍ଜାମ ଉପ ଜିଲ୍ଲାପାଳ ସିନ୍ଧେ ଦତ୍ତାତ୍ରେୟ ଭାଉସାହେବ । ପାତ୍ରପୁର ତହସିଲର ବାଘଲଟି ମଧ୍ୟମ ଜଳସେଚନ ପ୍ରକଳ୍ପ କାର୍ଯ୍ୟକାରୀ ହେବା ପରେ ଅନେକ ଆଦିବାସୀ ଗାଁ ଦୁର୍ଦ୍ଦିନରେ ଦିନ କାଟୁଛନ୍ତି । ପ୍ରକଳ୍ପରେ ପାଣି ଭର୍ତ୍ତି ହେବାପୂର୍ବରୁ ୮ଟି ଗ୍ରାଁର ଲୋକଙ୍କୁ ସ୍ଥାନାନ୍ତର କରାଯାଇ ଥଇଥାନ କରାଯାଇଥିଲା ।
ତେବେ ଜଳଭଣ୍ଡାର ଉପରେ ଅଂଶରେ ଥିବାରୁ ବେହରାପୁଟୁ, ଶିରିଶିଗଣ୍ଡ, ଏଲଗଲ ଓ ମାଡ଼ୁଆ ଗ୍ରାମର ଲୋକଙ୍କୁ ସ୍ଥାନାନ୍ତର କରାଯାଇନଥିଲା । ପ୍ରକଳ୍ପ ପରେ ତିତଲି ବାତ୍ୟା ସମୟରେ ଆଦିବାସୀ ଗ୍ରାମ ଗୁଡ଼ିକ ବ୍ୟାପକ କ୍ଷତିଗ୍ରସ୍ତ ହୋଇଥିଲା । ପ୍ରାକୃତିକ ବିପର୍ଯ୍ୟୟ ଏହି ଗ୍ରାମ ଗୁଡ଼ିକ ଉପରେ ଦାଉ ସାଧୁଥିଲା । ତେବେ ଗତ ୩୧ ତାରିଖରେ ବାଦଲଫଟା ବର୍ଷାରେ ଏଲଗଲ ଗାଁ ଭିତରକୁ ପାହାଡ଼ରୁ ପାଣି ପଶିଆସିଥିଲା ।
ବର୍ଷା ଜଳ ପ୍ରବେଶ ପରେ ଅତି ଦୟନୀୟ ଅବସ୍ଥାରେ କାଳ କାଟୁଥିଲେ ଗ୍ରାମବାସୀ । ଗାଁର ଲୋକଙ୍କ ଅସୁବିଧା ସମ୍ପର୍କରେ ଅବଗତ ହେବାପରେ ନଦୀନାଳ ପାର ହୋଇ ସ୍ଥିତି ପରଖିବା ପାଇଁ ନିଜେ ପହଞ୍ଚିଯାଇଥିଲେ ଉପ ଜିଲ୍ଲାପାଳ ।
ଉପଜିଲ୍ଲାପାଳ ତାଙ୍କ ଗସ୍ତ କାଳରେ ଆଦିବାସୀ ଲୋକଙ୍କ ସୁବିଧା ପାଇଁ ଡୁରୁବୁଡ଼ି ପଞ୍ଚାୟତର ଝଗଡ଼ାପଲ୍ଲୀ ଗାଁ ନିକଟ ଦେଇ ଯାଇଥିବା ପକ୍କା ରାସ୍ତା ନିକଟରେ ଥଇଥାନ୍ ଜମି ଚିହ୍ନଟ କରିଛନ୍ତି । ଉକ୍ତ ଜମିରେ ଲୋକଙ୍କୁ ଥଇଥାନ୍ କଲେ ସେମାନଙ୍କୁ ଗମନାଗମନ ସୁବିଧା ପାଇପାରିବେ । ଏହାବ୍ୟତିତ ମହିଳାଙ୍କୁ ବିଭିନ୍ନ ପ୍ରକାରର ସହାୟତା ଯୋଗାଇ ଦେବାସହ ଗାଁ ଗୁଡ଼ିକର ଉନ୍ନତି ପାଇଁ ପଦକ୍ଷେପ ନିଆଯିବ ବୋଲି କହିଛନ୍ତି ।