Bhagyaprabha News Bureau
ଦିନେ ପାଖରେ ପଇସା ନ ଥିବାରୁ କଲେଜରେ ନାଁ ଲେଖାଇ ପାରୁ ନ ଥିଲେ । କିନ୍ତୁ ଆଜି ସେ ଆମେରିକା ନାସାର ବୈଜ୍ଞାନିକ ହେବାକୁ ଯାଉଛନ୍ତି । କେବଳ କଠିନ ପରିଶ୍ରମ ଏବଂ ନିଜର ଦୃଢ଼ ଇଚ୍ଛା ଶକ୍ତି ବଳରେ ସବୁ ଅସମ୍ଭବକୁ ସମ୍ଭବ କରି ଦେଖାଇଛନ୍ତି ଯାଜପୁର ଧର୍ମଶାଳା ରାଇଛନ୍ଦା ଗ୍ରାମର ହେମନ୍ତ କୁମାର ଓଝା ।ରାଇଛନ୍ଦାର ଜଣେ ଦିନ ମଜୁରି ଲାଗି ପଥର କାଟୁଥିବା ଅର୍ଜୁନ ଓଝା ଓ ସାବିତ୍ରୀ ଓଝାଙ୍କ ସାନ ପୁଅ ହେମନ୍ତ (୨୫)ଙ୍କୁ ଆମେରିକା ନାସାରେ ଯୋଗ ଦେବାକୁ ଚିଠି ଆସିଛି । ଦିନରେ ଅର୍ଥାଭାବରୁ ହେମନ୍ତ ୨୦୦୯ରେ ମାଟ୍ରିକ ପାସ କରିବା ପରେ କଲେଜରେ ନାଁ ଲେଖାଇ ପାରି ନ ଥିଲେ । କିନ୍ତୁ ତାଙ୍କର ବୈଜ୍ଞାନିକ ହେବାର ନିଶା ତାଙ୍କୁ ଅଟକାଇ ପାରି ନ ଥିଲା । ଶେଷରେ ସେ ଟ୍ୟୁସନ୍ କରି କଲେଜରେ ନାଁ ଲେଖାଇଥିଲେ । ଏହା ପରେ ସେ ଆଉ ପଛକୁ ଚାହିଁ ନ ଥିଲେ । ରେଭନ୍ସାରେ ଯୁକ୍ତ ତିନି ପରେ ମାଡ୍ରାସ୍ ଆଇଆଇଟିରେ ଇଣ୍ଟିଗ୍ରେଟେଡ଼୍ ପିଏଚ୍ଡି କରିଥିଲେ । ବିଭିନ୍ନ ପ୍ରକଳ୍ପ ପରେ ସେ ଜଳବାୟୁ ପରିବର୍ତ୍ତନ ଓ ସେଟେଲାଇଟ୍ ମେସେଜ୍ ପ୍ରୋଜେକ୍ଟ କରିଥିଲେ । ଯାହା ନାସାରେ ପ୍ରଥମ ସ୍ଥାନ ଅଧିକାର କରିଥିଲା । ଏହା ପରେ ତାଙ୍କୁ ଆମେରିକାର ନାସାରୁ କନିଷ୍ଠ ବୈଜ୍ଞାନିକ ପାଇଁ ଚିଠି ଆସିଛି । ଆସନ୍ତା ମାର୍ଚ୍ଚ ୧୩ରେ ନାସାରେ ଯୋଗ ଦେବାକୁ କୁହାଯାଇଛି ।ତେବେ ଏଭଳି ଏକ ଖବର ହେମନ୍ତ ଓ ତାଙ୍କ ପରିବାର ଲୋକ ଖୁସିରେ ଆତ୍ମହରା ହୋଇପଡ଼ିଛନ୍ତି । ତେବେ ହେମନ୍ତ ଆଗାମି ଦିନରେ ଏଲିୟନ୍ଙ୍କ ଉପରେ ଗବେଷଣା କରିବାକୁ ଚାହୁଁଛନ୍ତି ବୋଲି କହିଛନ୍ତି । ପୁଅ ଆଗାମୀ ଦିନରେ ଓଡ଼ିଶାର ନାଁକୁ ଆହୁରି ଉଚ୍ଚସ୍ତରକୁ ନେଉବୋଲି ଆଶା ରଖିଛନ୍ତି ତାଙ୍କ ବାପା ଅର୍ଜୁନ ଓଝା ।
