ଭିଜିଲାନ୍ସ ଜାଲରେ ପଡିଲେ ସରକାରୀ କର୍ମଚାରୀ । ଝାରସୁଗୁଡା ଜିଲ୍ଲା ପଞ୍ଚାୟତ କାର୍ଯ୍ୟାଳୟର ବରିଷ୍ଠ କିରାଣୀ ବେଣୁଧର ଛଚାନଙ୍କ ବାସଭବନ ସମେତ ୪ଟି ସ୍ଥାନରେ ଆୟ ବହିର୍ଭୂତ ଠୁଳ ମାମଲାରେ ଭିଜିଲାନ୍ସର ଚଢାଉ ଜାରି ରହିଛି ।ବେଣୁଧରଙ୍କ ବଢେଇମୁଣ୍ଡା ସମେତ ପୈତୃକ ଗ୍ରାମ କୋଲବିର ବ୍ଲକ୍ ଐତାପଡା, ଶ୍ବଶୁରଘର ଓ ଅଫିସ କାର୍ଯ୍ୟାଳୟରେ ଭିଜିଲାନ୍ସ ଡିଏସପିଙ୍କ ନେତୃତ୍ବରେ ସମ୍ବଲପୁର, ବରଗଡ, ଝାରସୁଗୁଡା ଓ ସୁନ୍ଦରଗଡ ଟିମ୍ ଆଜି ଭୋରରୁ ଚଢାଉ କରିବା ପରେ ବେଣୁଧରଙ୍କ ଗୋଟିଏ ୩ ମହଲା କୋଠା ସହ ଟଙ୍କା, ସୁନାଗହଣା ଓ ବ୍ୟାଙ୍କ ପାସବୁକ, ଫିକ୍ସଡ୍ ଡିପୋଜିଟ୍ ସଂପର୍କରେ ତଥ୍ୟ ଅନୁସନ୍ଧାନ ଜାରି ରଖିଛି ।ପ୍ରାୟ ୫ ବର୍ଷ ତଳେ ବେଣୁଧର ଝାରସୁଗୁଡା ତହସିଲରେ କାର୍ଯ୍ୟରତ ଥିବାବେଳେ ଭିଜିଲାନ୍ସ ଗିରଫ କରିଥିଲା । ଭିଜିଲାନ୍ସର ଚଢାଉ ସଂପର୍କରେ ବେଣୁଧର ଛଚାନ୍ କହିଛନ୍ତି ତାଙ୍କ ବିରୋଧରେ କେହି ଷଡଯନ୍ତ୍ର କରି ତାଙ୍କୁ ଫସାଇଦେଇଛି ।