ସରକାରୀ ବ୍ୟାଙ୍କଗୁଡ଼ିକ ମଧ୍ୟରେ ହେବାକୁ ଯାଉଥିବା ମିଶ୍ରଣକୁ ବିରୋଧ କରି ଆଜି ଦୁଇଟି କର୍ମଚାରୀ ସଂଘ 'ସର୍ବଭାରତୀୟ ବ୍ୟାଙ୍କ କର୍ମଚାରୀ ସଂଘ ଓ ଭାରତୀୟ ବ୍ୟାଙ୍କ କର୍ମଚାରୀ ମହାସଂଘ ତରଫରୁ ସାରା ଦେଶରେ ୨୪ ଘଣ୍ଟିଆ ଧର୍ମଘଟ କରାଯାଇଛି ।ଏହି ଧର୍ମଘଟକୁ କେନ୍ଦ୍ରୀୟ ଶ୍ରମିକ ସଂଗଠନ ଓ ସର୍ବଭାରତୀୟ ଶ୍ରମିକ ସଂଗଠନ କଂଗ୍ରେସ ସମର୍ଥନ ପ୍ରଦାନ କରିଛନ୍ତି।ବ୍ୟାଙ୍କ ଅଫ୍ ମହାରାଷ୍ଟ୍ର ଓ ସିଣ୍ଡିକେଟ୍ ବ୍ୟାଙ୍କ ଏହି ଧର୍ମଘଟକୁ ନେଇ ଚିନ୍ତା ପ୍ରକଟ କରିଛନ୍ତି। ଏଆଇବିଇଏର ସାଧାରଣ ସମ୍ପାଦକ ଭେଙ୍କଟଚଲମ୍ କହିଛନ୍ତି ଯେ, ଶ୍ରମ ମନ୍ତ୍ରଣାଳୟର କେନ୍ଦ୍ରୀୟ ଶ୍ରମ କମିସନରଙ୍କ ସହ ଦିଲ୍ଲୀରେ ଆଲୋଚନା ହୋଇଥିଲା। ଏଥିରେ ଭାରତୀୟ ବ୍ୟାଙ୍କ ସଂଘ (ଆଇବିଏ) ଓ ଅର୍ଥ ମନ୍ତ୍ରଣାଳୟ ଏବଂ ଆର୍ଥିକ ସେବା ବିଭାଗର ପ୍ରତିନିଧି ଅଂଶଗ୍ରହଣ କରିଥିଲେ।ଧର୍ମଘଟ ନକରିବାକୁ ଆଇବିଏ ତରଫରୁ କର୍ମଚାରୀ ସଂଘଙ୍କୁ ଅନୁରୋଧ କରାଯାଇଥିଲା। କିନ୍ତୁ ସଂଘ ଯେଉଁ ଦାବି ଉପସ୍ଥାପନ କରିଥିଲେ ତାହାକୁ ସମାଧାନ କରିବା ଲାଗି ଆଇବିଏ କୌଣସି ପଦକ୍ଷେପ ଗ୍ରହଣ କରିନଥିଲା। ବୈଠକରୁ କୌଣସି ସକାରାତ୍ମକ ଫଳ ନମିଳିବାରୁ ପୂର୍ବ ନିର୍ଦ୍ଧାରିତ ସୂଚୀ ଅନୁଯାୟୀ ଧର୍ମଘଟ କରିବାକୁ ଆମେ ନିଷ୍ପତ୍ତି ନେଇଛୁ ବୋଲି ସେ କହିଛନ୍ତି।