ସାରା ଓଡ଼ିଶା ଏବେ ଜାଡ଼ରେ ଥରୁଥିବା ବେଳେ ଗଞ୍ଜାମ ଜିଲ୍ଲାର ଦିଗପହଣ୍ଡି ସହର ସମେତ ଆଖପାଖ ଗ୍ରାମାଞ୍ଚଳ ଓ ପାହାଡିଆ ନିକଟବର୍ତ୍ତୀ ଗ୍ରାମରେ ମଧ୍ୟ ପ୍ରବଳ ଶୀତ ଅନୁଭୂତ ହେଉଥିବା ପରିଲକ୍ଷିତ ହୋଇଛି । ବିଭିନ୍ନ ସ୍ଥାନରେ ଗତ ଦୁଇ ଦିନ ହେଲା ତୁଷାରପାତ ଲାଗିରହିଛି। ରାତିରେ ଥଣ୍ଡାର ପ୍ରକୋପ ଏତେ ଅଧିକ ରହୁଛି ଯେ ଲୋକ ଘରୁ ବାହାରିବାକୁ ଡରୁଛନ୍ତି। ଓଡ଼ିଶାରେ ଲୋକ କାଶ୍ମୀର ଭଳି ଥଣ୍ଡା ଅନୁଭବ କରୁଛନ୍ତି। ଏପରିକି ଦିଗପହଣ୍ଡି ନିକଟରେ ରହିଥିବା କେରାଣ୍ଡିମାଳ ପର୍ବତ ପାର୍ଶ୍ଵରେ ରହିଥିବା ବଡଡୁମ୍ବୁଳା , ଝରିପଦର , ବି. ତୁରୁବୁଡି ପ୍ରମୁଖ ଭଳି ଅନେକ ସ୍ଥାନରେ ଅସମ୍ଭାଳ ଶୀତ ଅନୁଭୂତ ହେଉଥିବା ଜଣାପଡିଛି । ପାରଦର ତାପମାତ୍ରା ହଠାତ୍ କମିଯିବା ଫଳରେ ଶୀତର ପ୍ରକୋପ ବଢିବାରେ ଲାଗିଛି । ଯାହାଫଳରେ ଦିନବେଳେ ପ୍ରବଳ ଥଣ୍ଡା ପବନ ବହିବା ସହ ସନ୍ଧ୍ୟାରେ ଜାଡ ପଡୁଥିବା ଦେଖାଯାଇଛି ଏବଂ ଜନଜୀବନ ଅସ୍ତବ୍ୟସ୍ତ ହୋଇଯାଇଛି।