ଗ୍ରାମାଞ୍ଚଳ ଯେପରିକି ନକଲି ପୁଡ଼ିଆ ବ୍ୟବସାୟୀଙ୍କ ପାଇଁ ସଂରକ୍ଷିତ ସ୍ଥଳ ପାଲଟି ଯାଇଛି। ଗୁଟକା, ପୁଡ଼ିଆ ପରି ଦ୍ରବ୍ୟକୁ ସରକାର ବନ୍ଦ କରିବାକୁ ନିର୍ଦ୍ଦେଶ ଦେଇଥିବା ବେଳେ ବର୍ତ୍ତମାନ ମଧ୍ୟ କିଛି ଅସାଧୁ ବ୍ୟବସାୟୀ ଏଥିରେ ଲିପ୍ତ ରହିଛନ୍ତି। ଵ୍ରହ୍ମପୁର ସଦର ପୋଲିସ ପକ୍ଷରୁ ଏକ ନକଲି ପୁଡ଼ିଆ କାରଖାନା ଠାବ କରି ବହୁ ସାମଗ୍ରୀ ସହ ମସିନ ଜବତ କରିଥିବା ବେଳେ ଏହି ଘଟଣାର ମାତ୍ର କିଛି ଦିନ ପରେ ଆଜି ପୁଣିଥରେ ସହର ଉପକଣ୍ଠରେ ଗୋଳନ୍ଥରା ପୋଲିସ ପକ୍ଷରୁ ଅନ୍ୟ ଏକ ନକଲି ପୁଡ଼ିଆ କାରଖାନା ଠାବ କରାଯାଇଛି। କାରଖାନା ଠାବ ହେବାପରେ ଵ୍ରହ୍ମପୁର ବଡ ବଜାର ଅଂଚଳରେ ଏକ ଗୋଦାମ ରେ ମଧ୍ୟ ମାତ୍ରାଧିକ ପୁଡ଼ିଆ ଲୁଚାଇ ରଖିଥିବ ଜାଣିବାକୁ ପାଇଥିଲା ପୋଲିସ।ଏହାପରେ ସଦର ଏସ୍ଡିପିଓଙ୍କ ନେତୃତ୍ୱରେ ଗୋଳନ୍ଥରା ଓ ଵ୍ରହ୍ମପୁର ବଡ ବଜାର ଥାନାର ଏକ ମିଳିତ ଟିମ ସ୍ଥାନୀୟ ଦେଶୀ ବେହେରା ସାହିରେ ଚଢ଼ାଉ କରିଥିଲେ। ଚଢ଼ାଉ ସମୟରେ ଉକ୍ତ ଗୋଦାମରୁ ୧୫ ବସ୍ତା ନକଲି ପୁଡ଼ିଆ ଜବତ ହୋଇଥିଲା। ଏତେ ପରିମାଣରେ ଗୁଟକା ତିଆରି ମସିନ ଓ ସାମଗ୍ରୀ କେଉଁଠୁ ଆସୁଛି ତାହା ବର୍ତ୍ତମାନ ପୋଲିସ ପାଇଁ ବଡ଼ ପ୍ରଶ୍ନବାଚି ସୃଷ୍ଟି କରିଛି।