ଗଞ୍ଜାମ ଜିଲ୍ଲା ପାଟପୁର ଥାନା ଅନ୍ତର୍ଗତ ପତାଗଡ ଗ୍ରାମରେ ଜଣେ ବିବାହିତ ମହିଳାଙ୍କୁ ତାଙ୍କ ଶଶୁର ଘର ଲୋକେ ଅଧିକ ଯୌତୁକ ଦାବିରେ ଶାରିରୀକ ନିର୍ଯ୍ୟାତନା ଦେବା ସହ ହତ୍ୟା କରିଥିବା ଅଭିଯୋଗ ହୋଇଥିବା ଜଣାପଡିଛି । ନିର୍ଯ୍ୟାତନାର ଶିକାର ହୋଇ ପ୍ରାଣ ହରାଇଥିବା ମହିଳା ଜଣକ ସାନଖେମୁଣ୍ଡି ବ୍ଳକ ପତାଗଡ ଗ୍ରାମର ରିଣ୍ଟୁ ଗୌଡଙ୍କ ପତ୍ନୀ ରାଧା ଗୌଡ ବୋଲି ଜଣାପଡିଛି । ଗଜପତି ଜିଲ୍ଲା ମୋହନା ଥାନା ଚାନ୍ଦିପୁଟ ଗ୍ରାମର ହରି ପାତ୍ରଙ୍କ ଝିଅ ରାଧା ଗତ ୪ ବର୍ଷ ତଳେ ସାନଖେମୁଣ୍ଡି ବ୍ଳକ ପତାଗଡ ଗ୍ରାମର ରିଣ୍ଟୁ ଗୌଡ ନାମକ ଯୁବକକୁ ବୈଦିକ ରୀତିନୀୟମ ଅନୁସାରେ ବାହା ହୋଇଥିଲେ । କିଛି ବର୍ଷ ବୈବାହିକ ଜୀବନ ଶାନ୍ତିପୂର୍ଣ୍ଣ ଭାବେ ଚାଲିଥିଲା ବେଳେ ଗତ କିଛି ମାସ ହେଲା ଶଶୁର ଘର ଲୋକେ ରାଧାକୁ ଅଧିକ ଯୌତୁକ ଦାବି କରି ନିର୍ଯ୍ୟାତନା କରୁଥିବା କହିଛନ୍ତି ବାପା ହରି ପାତ୍ର । ସବୁ ସିମା ପାର କରି ଶେଷରେ ଝିଅଙ୍କୁ ହତ୍ୟା କରିଥିବା ନେଇ ପାଟପୁର ଥାନାରେ ରିଣ୍ଟୁଙ୍କ ପରିବାର ବର୍ଗଙ୍କ ବିରୁଦ୍ଧରେ ଏକ ଲିଖିତ ଅଭିଯୋଗ କରିଛନ୍ତି । ହତ୍ୟାର କାରଣ ଜଣା ପଡିନଥିବା ବେଳେ ତଦନ୍ତ ଜାରୀ ରହିଥିବା ସୂଚନା ଦେଇଛନ୍ତି ଥାନା ଅଧିକାରୀ ।