ଆନ୍ଧ୍ରପ୍ରଦେଶରେ ଗତ ୨ ତାରିଖରୁ ନବମ ଓ ଦଶମ ଶ୍ରେଣୀ ଛାତ୍ରଛାତ୍ରୀଙ୍କ ପାଠପଢ଼ା ଲାଗି ସ୍କୁଲ ଖୋଲିଛି । କିନ୍ତୁ ସ୍କୁଲ ଖୋଲିବାର ମାତ୍ର ୩ ଦିନ ଭିତରେ ୨୬୨ ଜଣ ଛାତ୍ରଛାତ୍ରୀ ଓ ୧୬୦ ଜଣ ଶିକ୍ଷକ/ଶିକ୍ଷୟିତ୍ରୀ କରୋନା ସଂକ୍ରମିତ ହୋଇଛନ୍ତି। ଅନ୍ୟପକ୍ଷରେ ଏହା ସେଭଳି ଚିନ୍ତାଜନକ ବିଷୟ ନୁହେଁ ବୋଲି ରାଜ୍ୟର ସ୍କୁଲ ଶିକ୍ଷା କମିଶନର ଭି. ଚିନ୍ନା ବୀରଭଦ୍ରୁଡୁ କହିଛନ୍ତି ।ତାଙ୍କ କହିବାନୁଯାୟୀ ପ୍ରାୟ ୪ ଲକ୍ଷ ଛାତ୍ରଛାତ୍ରୀ ସ୍କୁଲ ଆସୁଛନ୍ତି । କିନ୍ତୁ ସେମାନଙ୍କ ମଧ୍ୟରେ ସଂକ୍ରମଣ ହାର ବହୁତ କମ୍ । ଏପରିକି ଏହା ୦.୧ ପ୍ରତିଶତ ମଧ୍ୟ ନୁହେଁ । ତା'ଛଡା ସ୍କୁଲରେ ବ୍ୟାପକ ସୁରକ୍ଷା ଓ ସତର୍କତା ବ୍ୟବସ୍ଥା ମଧ୍ୟ ଗ୍ରହଣ କରାଯାଉଛି । ପ୍ରତି ଶ୍ରେଣୀରେ ୧୫/୧୬ ଜଣ ଛାତ୍ରଛାତ୍ରୀଙ୍କ ବସିବାର ବ୍ୟବସ୍ଥା କରାଯାଇଛି ।ରାଜ୍ୟରେ ଏବେ ନବମ ଦଶମରେ ୯ ଲକ୍ଷ ୭୫ ହଜାର ଛାତ୍ରଛାତ୍ରୀ ପଢ଼ୁଛନ୍ତି । ସ୍କୁଲ ଖୋଲିବା ପରେ ସେମାନଙ୍କ ମଧ୍ୟରୁ ୩ ଲକ୍ଷ ୯୩ ହଜାର ଛାତ୍ରଛାତ୍ରୀ ପଢ଼ିବାକୁ ଆସୁଛନ୍ତି । ସେହିଭଳି ରାଜ୍ୟରେ ୧ ଲକ୍ଷ ୧୧ ହଜାର ଶିକ୍ଷକ/ଶିକ୍ଷୟିତ୍ରୀ ରହିଥିବା ସରକାରୀ ସୂତ୍ରରୁ ଜଣାପଡିଛି ।