ଗଞ୍ଜାମ ଜିଲ୍ଲା ଦିଗପହଣ୍ଡି ତହସିଲ ଅଧିନସ୍ଥ ନିମଖଣ୍ଡିପେଣ୍ଠ ରାଜସ୍ବ ନିରୀକ୍ଷକ କାର୍ଯ୍ୟାଳୟରୁ ସୋମବାର ବିଳମ୍ବିତ ରାତିରେ କୈାଣସି ଦୁବୃର୍ତ୍ତ ମାନେ ମୁଖ୍ୟ ଫାଟକ ତାଲା ଭାଙ୍ଗି ୯୦ ହଜାର ଟଙ୍କା ଲୁଟି ନେଇଥିବା ଜଣାପଡିଛି । ଖବରପ୍ରକାରେ , ସୋମବାର ଦିନ ସ୍ଥାନୀୟ ରାଜସ୍ବ ନିରୀକ୍ଷକ ବିଘ୍ନେଶ୍ୱର ଆଚାର୍ଯ୍ୟ , ସହକାରୀ ରାଜସ୍ବ ନିରୀକ୍ଷକ ଭଗବାନ ପାତ୍ର ନିଜ କାର୍ଯ୍ୟ ସାରି ସନ୍ଧ୍ୟା ୫ ଟାରେ କାର୍ଯ୍ୟାଳୟର ସମସ୍ତ ତାଲା ବନ୍ଦ କରି ଚାଲି ଯାଇଥିଲେ । ତେବେ ବିଳମ୍ବିତ ରାତିରେ ଦୁବୃର୍ତ୍ତ ମାନେ ପାଚେରୀ ଡେଇଁ ମୁଖ୍ୟ ଫାଟକ ତାଲା କଟର ମେସିନ ସାହାଯ୍ୟରେ କାଟି କାର୍ଯ୍ୟାଳୟ ଭିତରକୁ ପ୍ରବେଶ କରିଥିବା ଜଣାପଡ଼ିଛି । ଏହାପରେ ବିଦ୍ୟୁତ ସରବରାହ ମଧ୍ୟ କାଟି ଡ୍ରୋ ଭିତରେ ରହିଥିବା ସମସ୍ତ ଆଲମାରୀ ଚାବି ନେଇ ଆଲମାରୀ ଖୋଲିବା ପରେ କାଗଜପତ୍ର ଘଣ୍ଟାଘଣ୍ଟି କରିଛନ୍ତି । ତେବେ ଅନ୍ୟ ରୁମରେ ଥିବା ଲକର ଚାବି ଭାଙ୍ଗି ସେଥିରେ ଥିବା ୯୦ ହଜାର ଟଙ୍କା ଲୁଟି ପଛ କବାଟ ଭାଙ୍ଗି ପଳାଇଥିବା ଅଭିଯୋଗ ହୋଇଛି । କାର୍ଯ୍ୟାଳୟ ପରିସରରେ ଥିବା ସମସ୍ତ କାଗଜପତ୍ର ଓ ଲାପଟପ୍ ଅନ୍ୟାନ୍ୟ ମୂଲ୍ୟବାନ ସାମଗ୍ରୀ ଥିଲେ ମଧ୍ୟ ସେଗୁଡିକୁ ଦୁର୍ବୃତ୍ତ ମାନେ ନେଇନଥିବା ଜଣାପଡିଛି । ମଙ୍ଗଳବାର ସକାଳୁ ପ୍ରତ୍ୟେକ ଦିନ ଭଳି କର୍ମଚାରୀ ପ୍ରକାଶ ମଲ୍ଲିକ କାର୍ଯ୍ୟାଳୟ ତାଲା ଖୋଲିବା ପାଇଁ ଯିବା ସମୟରେ ତାଲା ଭାଙ୍ଗିଥିବା ଜାଣି ସ୍ଥାନୀୟ ରାଜସ୍ବ ନିରୀକ୍ଷକ ଶ୍ରୀ ଆଚାର୍ଯ୍ୟଙ୍କୁ ଜଣାଇଥିଲେ । ଏହାପରେ ସ୍ଥାନୀୟ ତହସିଲଦାର ଅଦ୍ଵୈତ କୁମାର ସ୍ବାଇଁଙ୍କ ନେତୃତ୍ୱରେ ଏକ ଟିମ୍ ଘଟଣାସ୍ଥଳରେ ପହଞ୍ଚି ଦିଗପହଣ୍ଡି ପୋଲିସ ଥାନାରେ ଖବର ଦେଇଥିଲେ । ଖବରପାଇ ଦିଗପହଣ୍ଡି ପୋଲିସ ଘଟଣାସ୍ଥଳରେ ପହଞ୍ଚି ଘଟଣାର ଅନୁଧ୍ୟାନ କରି ଫେରିଥିବା ଜଣାପଡିଛି ।