ଗଞ୍ଜାମ ଜିଲ୍ଲା ଦିଗପହଣ୍ଡି ଥାନା ଅଧିନସ୍ଥ ବିଜୟ ପଦ୍ମନାଭପୁର ଗ୍ରାମର ସୁଜାତା ସେଠୀ ନାମକ ଜଣେ ମହିଳା ଶଶୁର ଘର ଲୋକଙ୍କ ଯୈାତୁକ ଜନିତ ଯନ୍ତ୍ରଣା ସହିନପାରି ଆତ୍ମହତ୍ୟା ମାମଲାରେ ଦିଗପହଣ୍ଡି ପୋଲିସ ସୁଜାତାଙ୍କ ଶାଶୁ ଶାନ୍ତି ସେଠୀଙ୍କୁ ଗିରଫ କରି ସୋମବାର ଦିନ କୋର୍ଟ ଚାଲାଣ କରିଥିବା ଜଣାପଡିଛି । ତେବେ ସେଠାରେ ଜାମିନ ଆବେଦନ ନାମଞ୍ଜୁର ହୋଇଯିବାରୁ ତାଙ୍କୁ ସବଜେଲ୍ ହାଜତକୁ ପଠାଇ ଦିଆଯାଇଛି । ସୂଚନାଯୋଗ୍ୟ , ମୃତା ସୁଜାତା ୨୦୧୭ ମସିହାରେ ନିଜ ଗ୍ରାମର ଚିତ୍ତରଞ୍ଜନ ସେଠୀ ନାମକ ଜଣେ ଯୁବକକୁ ଭଲପାଇ ଆସୁଥିବା ବେଳେ ପରିବାର ଲୋକଙ୍କ ଇଚ୍ଛା ବିରୁଦ୍ଧରେ ଦୁହେଁ ଘରଛାଡି ମହୁରୀ କାଳୁଆ ମନ୍ଦିରରେ ପ୍ରେମବିବାହ କରିଥିଲେ । ପ୍ରେମ ବିବାହ ପରେ ଦୁହେଁ ଗୋକର୍ଣ୍ଣପୁର ଓ ପରେ ଦିଗପହଣ୍ଡି କାନାରା ବ୍ଯାଙ୍କ ସମ୍ମୁଖ ଏକ ଭଡାଘରେ ରହି ଆସୁଥିଲେ ।ତେବେ ବିଭିନ୍ନ ସମୟରେ ଯୌତୁକ ପାଇଁ ତାଙ୍କ ଶାଶୁ ଶାନ୍ତି ସୁଜାତାଙ୍କୁ ଶାରୀରିକ ଓ ମାନସିକ ନିର୍ଯ୍ୟାତନା ଦେଉଥିବା ଅଭିଯୋଗ ହୋଇଥିଲା । ଗତ ୨୯ ନଭେମ୍ବର ୨୦୨୦ରେ ନିର୍ଯ୍ୟାତନା ଅସହ୍ୟ ହେବାରୁ ସୁଜାତା ସିଲିଂଫ୍ଯାନରେ ଶାଢୀ ଲଗାଇ ଆତ୍ମହତ୍ୟା କରିଥିଲେ । ଘଟଣାରେ ଦିଗପହଣ୍ଡି ଥାନା କେଶ୍ ନମ୍ବର ୨୮୮/୨୦ ପ୍ରକାରେ ପୂର୍ବରୁ ସ୍ବାମୀ ଚିତ୍ତରଞ୍ଜନଙ୍କୁ ପୋଲିସ ଗିରଫ କରି କୋର୍ଟ ଚାଲାଣ କରିଥିବା ବେଳେ ଆଜି ସୁଜାତାଙ୍କ ଶାଶୁ ଶାନ୍ତିଙ୍କୁ ଗିରଫ କରିଥିବା ଜଣାପଡିଛି ।