ଗଞ୍ଜାମ ଜିଲ୍ଲା ଦିଗପହଣ୍ଡି ବ୍ଲକ କୃଷି ଜିଲ୍ଲା ଅଧିକାରୀଙ୍କ କାର୍ଯ୍ୟାଳୟ ପରିସରରେ ଗୁରୁବାର ଦିନ କୃଷିରଥ ପରିକ୍ରମା କାର୍ଯ୍ୟକ୍ରମର ଶୁଭାରମ୍ଭ ହୋଇଥିବା ବେଳେ ଦିଗପହଣ୍ଡି ତହସିଲଦାର ଅଦୈତ୍ୟ କୁମାର ସ୍ୱାଇଁ ସବୁଜ ପତାକା ଦେଖାଇ ଉଦଘାଟନ କରିଥିବା ଜଣାପଡ଼ିଛି । ଖବରପ୍ରକାରେ , କୃଷକମାନଙ୍କ ପାଇଁ ଉଦ୍ଦିଷ୍ଟ ସରକାରୀ ଯୋଜନା ଗୁଡ଼ିକର ପ୍ରଚାର ପ୍ରସାର ସକାଶେ ତଥା ଚାଷୀଙ୍କୁ ସଚେତନ କରାଇବା ନିମନ୍ତେ ଏହି ରଥ ଦିଗପହଣ୍ଡି ବ୍ଲକର ବିଭିନ୍ନ ଗ୍ରାମକୁ ପରିଭ୍ରମଣ କରି ନୃତ୍ୟ ପରିବେଷଣ ମାଧ୍ୟମରେ ଏହି କାର୍ଯ୍ୟକ୍ରମ ୬ ଦିନ ବ୍ୟାପି ଚାଲିବ ବୋଲି ଜଣାପଡିଛି । ବିଭିନ୍ନ ପଞ୍ଚାୟତକୁ ଏହି କୃଷି ରଥ ପରିକ୍ରମା କରି କୃଷକମାନଙ୍କୁ ସଚେତନ କରାଇବା , ନିୟମିତ ଭାବରେ ଜମିର ମାଟି ପରୀକ୍ଷା କରିବା , ଫସଲ ଉତ୍ପାଦନର ଅଭିବୃଦ୍ଧି ଓ ସାର ପ୍ରୟୋଗ ଉପରେ ଚାଷୀମାନଙ୍କୁ ଅବଗତ କରାଯିବ ବୋଲି ଜଣାପଡିଛି । ଏଥିସହ ନାଟକ ପରିବେଷଣ ସମୟରେ କୋଭିଡ ନିୟମକୁ କଡାକଡି ଭାବରେ ପାଳନ କରିବା ପାଇଁ ସମ୍ପୃକ୍ତ କଳାକାରମାନଙ୍କୁ ନିର୍ଦ୍ଦେଶ ଦିଆଯାଇଛି । ପ୍ରତ୍ୟେକ ପଞ୍ଚାୟତର କୃଷକ ସାଥୀମାନଙ୍କୁ ଏହି କାର୍ଯ୍ୟକ୍ରମ ସଂପର୍କରେ ଆଗୁଆ ସୂଚନା ଦିଆଯାଇଛି । ଏହି କାର୍ଯ୍ୟକ୍ରମ ଶୁଭାରମ୍ଭ ବେଳେ ବ୍ଲକ କୃଷି ଅଧିକାରୀ ଆନନ୍ଦ ଚନ୍ଦ୍ର ସାସମଲ , ସହକାରୀ କୃଷି ଅଧିକାରୀ ପଦାରବିନ୍ଦ ସାହୁଙ୍କ ସମେତ ଅନ୍ୟ ସମସ୍ତ କର୍ମଚାରୀମାନେ ଉପସ୍ଥିତ ଥିଲେ ।