ଗଞ୍ଜାମ ଜିଲ୍ଲାର ପାଟପୁର ଥାନା ତପ୍ତପାଣି ଘାଟି ଏକ ପର୍ଯ୍ୟଟନ ସ୍ଥଳୀ ଭାବରେ ପରିଚିତ ହୋଇଥିବା ବେଳେ ଏହି ଘାଟିର ଅଙ୍କାବଙ୍କା ରାସ୍ତାଟି ଦୁର୍ଘଟଣାର ହଟସ୍ପଟ ଭାବେ ପରିଗଣିତ ହୋଇଥାଏ । ଚଳିତ ବର୍ଷ ଆରମ୍ଭରୁ ଏହି ଘାଟି ରାସ୍ତାରେ ଦୁଇ ଚକିଆ ଯାନ ଠାରୁ ଆରମ୍ଭ କରି ଚାରିରୁ ଉର୍ଦ୍ଧ୍ବ ଚକିଆ ଯାନ ଗୁଡିକ ଯାତାୟାତ କରୁଥିବା ସମୟରେ ଗାଡ଼ି ଚାଳକ ମାନେ ଭାରସାମ୍ୟ ହରାଇ ଦୁର୍ଘଟଣାର ସମ୍ମୁଖୀନ ହେଉଛନ୍ତି । ଏଥିରେ ଅନେକ ଲୋକଙ୍କ ଜୀବନ ହାନି ହୋଇଥିବା ବେଳେ କେତେକଙ୍କ ମୃତ୍ୟୁ ମଧ୍ୟ କରି ସାରିଛି । ତେବେ ମଙ୍ଗଳବାର ଅପରାହ୍ନରେ ପୁଣିଥରେ ତପ୍ତପାଣି ଦିଗପହଣ୍ଡି ରାସ୍ତାର ପାଳୁଖୋଳା ନିକଟରେ ଏକ ବାଇକ (ଓଡି୦୨ ଏଏସ ୩୬୧୪) ଦୁର୍ଘଟଣା ଗ୍ରସ୍ତ ହୋଇଥିବା ବେଳେ ତିନିଜଣ ଯୁବକ ଗୁରୁତର ଆହତ ହୋଇଥିବା ଜଣାପଡିଛି । ଆହତ ଯୁବକ ମାନେ ଦିଗପହଣ୍ଡି ବସଷ୍ଟାଣ୍ଡର ସୁଶାନ୍ତ କୁମାର ସାହୁ (୨୬) , ରାଜନଗର ସାହିର ଶ୍ରୀଧର ମେକାପ (୨୫) ଏବଂ ଦିଗପହଣ୍ଡିରେ ରହୁଥିବା ଡେଙ୍ଗାଓସ୍ତା ଗ୍ରାମର ନିଳାଞ୍ଚଳ ବିଷୋୟୀ (୨୬) ବୋଲି ଜଣାପଡିଛି । ଖବରନୁଯାୟୀ , ତିନି ଯୁବକ ମିଶି ନିଜ ଆପାଚେ ବାଇକରେ ଦିଗପହଣ୍ଡି ଅଭିମୁଖେ ଫେରୁଥିବା ବେଳେ ଘାଟିରେ ନିୟନ୍ତ୍ରଣ ହରାଇ ଦୁର୍ଘଟଣାର ସମ୍ମୁଖୀନ ହୋଇଥିବା କୁହାଯାଇଛି । ଦିଗପହଣ୍ଡିରୁ ୧୦୮ ଆମ୍ବୁଲାନ୍ସ ଘଟଣା ସ୍ଥଳରେ ପହଞ୍ଚି ଆହତମାନଙ୍କୁ ଉଦ୍ଧାର କରିଥିଲା ।ସେମାନଙ୍କୁ ଦିଗପହଣ୍ଡି ଗୋଷ୍ଠି ସ୍ବାସ୍ଥ୍ଯକେନ୍ଦ୍ରରେ ପ୍ରାଥମିକ ଚିକିତ୍ସା କରାଯିବା ପରେ ଅବସ୍ଥା ଗୁରୁତର ରହିଥିବାରୁ ବ୍ରହ୍ମପୁର ବଡ ମେଡିକାଲକୁ ପଠାଇ ଦିଆଯାଇଥିବା ଜଣାପଡିଛି ।