Kiran Behera
ବଙ୍ଗୋପସାଗରରେ ସୃଷ୍ଟି ସାମୁଦ୍ରିକ ଝଡ ୟସ ବାତ୍ୟାର ରୂପ ଧାରଣ କରିବା ସହ କ୍ଷିପ୍ର ଗତିରେ ବଢୁଥିବା ଜଣାପଡିଛି । ଏହା ଆସନ୍ତା କାଲି ସ୍ଥଳଭାଗ ଛୁଇଁବ ବୋଲି ପାଣିପାଗ ବିଭାଗ ପକ୍ଷରୁ ସୂଚନା ଦିଆଯାଇଛି । ସାମୁଦ୍ରିକ ଝଡ ୟସର ପ୍ରଭାବ ଗଞ୍ଜାମ ଜିଲ୍ଲାରେ ଆଂଶିକ ଭାବରେ ପଡୁଥିଲେ ମଧ୍ୟ ଜିଲ୍ଲା ପ୍ରଶାସନ ସମସ୍ତ ବ୍ଳକ ପ୍ରଶାସନ ଅଧିକାରୀଙ୍କୁ ନିଜ ନିଜ ଅଞ୍ଚଳର ଲୋକମାନଙ୍କୁ କିପରି ସୁରକ୍ଷିତ ଭାବେ ରଖାଯାଇପାରିବ ଏନେଇ ସର୍ତକ ମଧ୍ୟ କରିଛନ୍ତି । ମଙ୍ଗଳବାର ଠାରୁ ଜିଲ୍ଲାରେ ବର୍ଷା ସାଙ୍ଗକୁ ପବନର ବେଗ ବଢିବା ସମ୍ଭାବନାକୁ ଦୃଷ୍ଟିରେ ରଖି ଆଜି ଦିଗପହଣ୍ଡି ବ୍ଲକ ପ୍ରଶାସନ ପକ୍ଷରୁ ପ୍ରତ୍ୟେକ ଗ୍ରାମରେ ପହଞ୍ଚି ମାଇକ ପ୍ରଚାର ମାଧ୍ୟମରେ ଜନସାଧାରଣଙ୍କୁ ସଜାଗ ରହିବାକୁ ସର୍ତକ କରାଇଛନ୍ତି । ଏପରିକି ନଦୀକୁଳିଆ ଅଞ୍ଚଳ ଲୋକମାନଙ୍କୁ ନିରାପଦ ସ୍ଥାନ କିମ୍ବା ନିକଟସ୍ଥ ବାତ୍ୟା ଆଶ୍ରୟସ୍ଥଳୀରେ ରହିବା ପାଇଁ ପ୍ରଶାସନ ପକ୍ଷରୁ ଅବଗତ କରାଯାଇଛି । ଏହି ପରିପ୍ରେକ୍ଷୀରେ ଦିଗପହଣ୍ଡି ବ୍ଲକର ୨୫ ଗୋଟିଏ ପଞ୍ଚାୟତରେ ଆଜି ସ୍ଥାନୀୟ ସରପଞ୍ଚଙ୍କ ଉପସ୍ଥିତିରେ ପଞ୍ଚାୟତ ନିର୍ବାହୀ ଅଧିକାରୀ , ଗ୍ରାମ ରୋଜଗାର ସେବକ ଓ ଯୋଗାଣ ସହାୟକ ମାନେ ନିଜ ନିଜ ପଞ୍ଚାୟତର ବିଭିନ୍ନ ଗ୍ରାମ ବୁଲିବୁଲି ଡ଼ାକବାଜି ଯନ୍ତ୍ର ମାଧ୍ୟମରେ ଜନସାଧାରଣଙ୍କୁ ସର୍ତକ କରାଇଥିଲେ । ଏଥିସହ ବାତ୍ୟା ୟସକୁ ନଜରରେ ରଖି ଜନସାଧାରଣଙ୍କ ସୁରକ୍ଷା ଦେବାଲାଗି ବ୍ଳକରେ ତିନିଗୋଟି ବାତ୍ୟା ଆଶ୍ରୟସ୍ଥଳୀ ଏବଂ ୬୨ ଗୋଟି ବିଦ୍ୟାଳୟ ମଧ୍ୟ ଖୋଲା ରହିଥିବା ଜଣାପଡିଛି । ଆବଶ୍ୟକ ସ୍ଥଳେ ସେମାନଙ୍କୁ ରନ୍ଧାଖାଦ୍ୟ ଯୋଗାଇ ଦିଆଯିବ ବୋଲି ଦିଗପହଣ୍ଡି ବ୍ଲକ ଉନ୍ନୟନ ଅଧିକାରୀ ହଳଧର ଶବର ସୂଚନା ଦେଇଛନ୍ତି । ଏହି ସର୍ତକ ସୂଚନା ପ୍ରଦାନ ସମୟରେ ସିଦ୍ଧେଶ୍ୱର ଗ୍ରାମ ପଞ୍ଚାୟତ ନିର୍ବାହୀ ଅଧିକାରୀ ସଂଗ୍ରାମ ଆଚାର୍ଯ୍ୟ , ଗ୍ରାମ ରୋଜଗାର ସେବକ ଧିରେନ କୁମାର ସ୍ବାଇଁ ସମେତ ବ୍ଳକର ପଞ୍ଚାୟତ ମାନଙ୍କରେ ଅନ୍ୟ କର୍ମଚାରୀ ଉପସ୍ଥିତ ରହିଥିଲେ ।
