Kiran Behera
ଗଞ୍ଜାମ ଜିଲ୍ଲା ବ୍ରହ୍ମପୁର ବନଖଣ୍ଡ ଦିଗପହଣ୍ଡି ବନାଞ୍ଚଳ ଅଧିନସ୍ଥ ଚିକିଟି ସେକ୍ସନ ଚିକିଟି ବିଟରୁ ଆନ୍ଧ୍ର ପ୍ରଦେଶକୁ ବେଆଇନ ଭାବେ ଆମ୍ବକାଠ ଚୋରାଚାଲାଣ ହେଉଥିବା ବେଳେ ବନବିଭାଗ ପକ୍ଷରୁ ବୁଧବାର ସକାଳୁ ଏକ କାଠ ବୋଝେଇ ଟାଟା ଏସିଇ ଗାଡ଼ିକୁ ଜବତ କରିବା ସହ ଜଣେ ଯୁବକକୁ ଗିରଫ କରାଯାଇଥିବା ଜଣାପଡ଼ିଛି । ଗିରଫ ଯୁବକ ହେଲେ କେ. ନୂଆଗାଁ ଥାନା କରବାଲୁଆ ଗ୍ରାମର ଉଜ୍ବଳ ବେହେରା ବୋଲି ସୂଚନା ମିଳିଛି । ଖବରନୁଯାୟୀ , ବୁଧବାର ଦିନ ସକାଳ ୫ ଘଣ୍ଟା ସମୟରେ ଯୁବକ ଜଣକ ଉକ୍ତ ଗାଡ଼ି ( ଓଆର ୦୭ କ୍ଯୁ ୪୮୩୬) ଯୋଗେ କରବାଲୁଆ ଗ୍ରାମରୁ ୧୨ ଖଣ୍ଡ ବଡ଼ କାଠଗଣ୍ଡି ତଥା ୩୦. ୧୨୪ ଘନଫୁଟ କାଠକୁ ଧରି ବେଆଇନ ଭାବେ ଆନ୍ଧ୍ରକୁ ଚୋରାଚାଲାଣ କରୁଥିବା ଜଣାପଡିଛି । ତେବେ ବିଶେଷ ସୁତ୍ରରୁ ଖବର ପାଇ ବ୍ରହ୍ମପୁର ବନଖଣ୍ଡ ଅଧିକାରୀ ଅମ୍ଳାନ ନାୟକଙ୍କ ନିର୍ଦ୍ଦେଶକ୍ରମେ ଦିଗପହଣ୍ଡି ବନାଞ୍ଚଳ ଅଧିକାରୀ କାହ୍ନୁଚରଣ ପଟ୍ଟନାୟକଙ୍କ ନେତୃତ୍ବରେ ବନବିଭାଗ କର୍ମଚାରୀ ଓ ମୋବାଇଲ ଷ୍ଟାଫ୍ ଗାଡ଼ିର ପିଛା କରି ବଡବରଙ୍ଗା ନିକଟରେ ଗାଡ଼ିକୁ ଜବତ କରିଥିଲେ । ତେବେ ଜବତ କାଠଗଣ୍ଡି ଗୁଡ଼ିକର ମାପଚୁପ କରିବାପରେ ଏହାର ବଜାର ମୂଲ୍ୟ ପାଖାପାଖି ୧ ଲକ୍ଷରୁ ଉର୍ଦ୍ଧ୍ବ ହେବବୋଲି ପ୍ରାଥମିକ ଭାବେ ଆକଳନ କରିଥିବା ଦିଗପହଣ୍ଡି ରେଞ୍ଜର ଶ୍ରୀ ପଟ୍ଟନାୟକ କହିଛନ୍ତି । ଏନେଇ ଅଭିଯୁକ୍ତଙ୍କ ବିରୁଦ୍ଧରେ ଏକ ମାମଲା ରୁଜୁ କେସ୍ ନଂ ୭୩/୨୦୨୧ ଅନୁସାରେ ବୁଧବାର ଦିନ କୋର୍ଟ ଚାଲାଣ କରାଯାଇଥିବା ଜଣାପଡ଼ିଛି ।
