ଗଞ୍ଜାମ ଜିଲ୍ଲା ପାଟପୁର ଥାନା ଅନ୍ତର୍ଗତ ତୁଳସୀପଦର ଗ୍ରାମରେ ଗତକାଲି ପାରିବାରିକ ଝଗଡାକୁ ନେଇ ଦେହରେ କିରୋସିନ ଢାଳି ଜଣେ ବିବାହିତ ମହିଳା ଆତ୍ମହତ୍ୟା କରିଥିବା ଅଭିଯୋଗ ହୋଇଥିବା ଜଣାପଡିଛି । ମୃତ ମହିଳା ଜଣକ ହେଲେ ରିଙ୍କି ମହାନ୍ତି (୩୦) ବୋଲି ସୂଚନା ମିଳିପାରିଛି । ତେବେ ମୃତକଙ୍କ ପରିବାର ଏହାକୁ ବିଶ୍ୱାସ ନ କରିପାରି ଝିଅକୁ ଯୈାତୁକ ଜନିତ ହତ୍ୟା କରାଯାଇଥିବା ଥାନାରେ ଏତଲା ଦେଇଛନ୍ତି । ଖବରନୁଯାୟୀ , ଧରାକୋଟ ଥାନା ଢଉଗାଁ ଗ୍ରାମର ରମେଶ ପରିଡ଼ାଙ୍କ ଝିଅ ରିଙ୍କି ୮ ବର୍ଷ ପୂର୍ବେ ସାନଖେମୁଣ୍ଡି ବ୍ଲକ ସାହାସପୁର ପଞ୍ଚାୟତ ଅନ୍ତର୍ଗତ ତୁଳସୀପଦର ଗ୍ରାମର ଭୂଷଣ ମହାନ୍ତିଙ୍କ ପୁଅ ଭଗବାନ ମହାନ୍ତିଙ୍କୁ ବୈଦିକ ରୀତିରେ ବିବାହ କରିଥିଲେ । ଯୈାତୁକ ବାବଦରେ ୬୦ ହଜାର ଟଙ୍କା ସମେତ ସୁନାଚେନ ଓ ଜାନି ଯୌତୁକ ଦେଇଥିଲେ । ବିବାହ ପରଠାରୁ ଉଭୟ ସ୍ବାମୀ ସ୍ତ୍ରୀ ପରସ୍ପର ବିଭିନ୍ନ ସମୟରେ ଝଗଡ଼ା ଲାଗି ରହୁଥିବା ଏକ କନ୍ୟା ସନ୍ତାନ ରହିଥିବା ଜଣାପଡିଛି । ତେବେ ଗତ ଶନିବାର ରାତିରେ ଉଭୟଙ୍କ ମଧ୍ୟରେ କୈାଣସି କାରଣରୁ ପାଟିତୁଣ୍ଡ ହୋଇଥିବା ବେଳେ ରିଙ୍କି ମାନସିକ ଭାରସାମ୍ୟ ହରାଇ ନିଜ ଶରୀରରେ କିରୋସିନ ଢାଳି ଆତ୍ମହତ୍ୟା କରିଛନ୍ତି ବୋଲି ସ୍ବାମୀ ଭଗବାନଙ୍କ ପରିବାର ଲୋକେ କହିଛନ୍ତି । ଏହାପରେ ଘରେ ନିଆଁ ଲାଗିଥିବା ଜାଣିପାରି ଦେଖିବା ବେଳକୁ ରିଙ୍କି ହୁତୁହୁତୁ ହୋଇ ଜଳୁଥିବା ଦେଖିଥିଲେ । ଘଟଣାପରେ ଅର୍ଦ୍ଧଦଗ୍ଧ ଅବସ୍ଥାରେ ମହିଳାଙ୍କୁ ଉଦ୍ଧାର କରି ଦିଗପହଣ୍ଡି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଇଥିଲେ । ସେଠାରେ ଭଗବାନ ରବିବାର ସକାଳ ସାଢେ ଆଠଟା ସମୟରେ ଝିଅଙ୍କ ବାପା ରମେଶଙ୍କୁ ଘଟଣା ସମ୍ପର୍କରେ ଜଣାଇଥିଲେ । ପ୍ରାଥମିକ ଚିକିତ୍ସା ପରେ ରିଙ୍କିଙ୍କୁ ବ୍ରହ୍ମପୁର ପରେ କଟକ ବଡ଼ ମେଡ଼ିକାଲରେ ଭର୍ତ୍ତି କରାଯାଇଥିଲା । ତେବେ ଗତକାଲି ଚିକିତ୍ସାଧୀନ ଅବସ୍ଥାରେ ମହିଳାଙ୍କ ମୃତ୍ୟୁ ହୋଇଥିବା ଉପସ୍ଥିତ ଡାକ୍ତର ପରିବାରକୁ ଜଣାଇଥିଲେ । ଗୋଟିଏ ପଟେ ସ୍ବାମୀ ଭଗବାନଙ୍କ ପରିବାର ରିଙ୍କି ନିଜେ ଆତ୍ମହତ୍ୟା କରିଥିବା କହୁଥିବା ବେଳେ ଅନ୍ୟପଟେ ଝିଅକୁ ଏକଲକ୍ଷ ଟଙ୍କା ଯୈାତୁକ ମାଗିବା ସହ ବିଭିନ୍ନ ସମୟରେ ସ୍ବାମୀ ସମେତ ଶଶୁର , ଶାଶୁ , ଦିଅର ଓ ଦୁଇ ନଣନ୍ଦ ନିର୍ଯ୍ୟାତନା ଦେଇ ଆସୁଥିବା ଝିଅର ପରିବାର ଥାନାରେ ଏତଲା ଦେଇଛନ୍ତି । ଏନେଇ ପାଟପୁର ଥାନା ମାମଲା ନଂ ୪୩୬/୨୧ ପ୍ରକାରେ ମକଦ୍ଦମା ରୁଜୁ କରାଯାଇ ତଦନ୍ତ ଚଳାଇଥିବା ବେଳେ ବ୍ୟବଛେଦ ରିପୋର୍ଟ ଆସିବା ପରେ ପ୍ରକୃତ ଘଟଣା ଜଣାପଡିବ ବୋଲି ଥାନା ଅଧିକାରୀ ସବ୍ୟସାଚୀ ମଲ୍ଲ ସୂଚନା ଦେଇଛନ୍ତି ।