Swadhina Kumar Sahu
ବ୍ରହ୍ମପୁର ସଦର ଥାନା ପକ୍ଷରୁ ବାଇକ ଚେକିଙ୍ଗ କରୁଥିବା ବେଳେ ଦୁଇ ବାଇକ ଲୁଟେରାକୁ କାବୁ କରିଛି । ସୂଚନା ମୂତାବକ ଗତକାଲି ସଦର ଥାନା ପକ୍ଷରୁ ସ୍ଥାନୀୟ ଲୋଚାପଡା ଛକ ନିକଟରେ ମୋଟର ଯାନ ଚେକିଙ୍ଗ ଚାଲିଥିଲା । ଏହି ସମୟରେ ଦୁଇ ଯୁବକ ଏକ ଆପାଚି ଗାଡିରେ ଆସିଥିଲେ ସେମାନଙ୍କୁ ମଧ୍ୟ ପୋଲିସ ଚେକିଙ୍ଗ କରିବା ସମୟରେ ତାହା ଏକ ଚୋରୀ ଗାଡି ବୋଲି ଜାଣିବାକୁ ପାଇଥିଲା । ଏହାପରେ ପୋଲିସ ଉଭୟଙ୍କୁ ପଚରା ଉଚରା କରିବା ସମୟରେ ଜଣା ପଡିଲା ଉଭୟେ ବାଇକ ଚୋରୀ କରୁଛନ୍ତି । ସେମାନେ ରାଜଧାନୀ ଭୂବନେଶ୍ୱରରୁ ବାଇକ ଚୋରୀ କରି ଆଣିବା ସହ ଗୋପାଳପୁର ଥାନା ଅନ୍ତର୍ଗତ ଗୋଳାବନ୍ଧ ଠାରେ ଥିବା ଏକ ଗ୍ୟାରେଜରେ ସମସ୍ତ ମୋଟର ସାଇକେଲ ଲୁଚାଇ ରଖିଥିବା ତଦନ୍ତ ସମୟରେ ପୋଲିସକୁ କହିଥିଲେ । ଏହାପରେ ପୋଲିସ ପକ୍ଷରୁ ସମସ୍ତ ୧୬ ଗୋଟି ମୋଟର ସାଇକେଲକୁ ଜବତ କରିବା ସହ ଉବୟଙ୍କ ନାମରେ ଏକ ମାମଲା ରୁଜୁ କରି କୋର୍ଟ ଚାଳାଣ କରାଯାଇଛି । ଗିରଫ ଅଭିଯୁକ୍ତମାନେ ହେଲେ ଖୋର୍ଦ୍ଧା ସଦର ଥାନା ଅନ୍ତର୍ଗତ କାଇପଦର ଗ୍ରାମର ଗୁଲାମ ହୁସେନ ଖାନ ( ୪୩ ) ଓରଫ ପପୁ ଏବଂ ବ୍ରହ୍ମପୁର ସଦରଥାନା ଅନ୍ତର୍ଗତ ବାସୁଦେବ ନଗର ସପ୍ତମ ଗଳିର ଲିଲୁ ବେହେରା ( ୨୨ ) ଓରଫ ଇଲୁ । ଉଭୟଙ୍କ ନିକଟରୁ ଚାରୋଟି ପଲସର ବାଇକ, ଚାରୋଟି ଆପାଚି, ଦୁଇଟି ଲେଖାଏଁ ହିରୋ ଗ୍ଲାମର ଓ ହୋଣ୍ଡା ସାଇନ ଏବଂ ଗୋଟିଏ ଲେଖାଏଁ ୟାମାହା ଏଫଜେଡ, ବାଜାଜ ସିଟି ହଣ୍ଡ୍ରେଡ, ହିରୋ ହଙ୍କ ଏବଂ ବାଜାଜ ଏଭେଞ୍ଜର ଗାଡି ଜବତ କରିଛି ପୋଲିସ । ଏହା ସହ ଏହି ଘଟଣାର ଅଧିକ ତଦନ୍ତ ଜାରି ରହିଥିବା ସଦର ଏସଡିପିଓ ଶିବ ଶଙ୍କର ମହାପାତ୍ର ସୂଚନା ଦେଇଛନ୍ତି ।
