Kiran Behera
କରୋନାର ତୃତୀୟ ଲହରୀ ତଥା ଓମ୍ରିକନର ପ୍ରଭାବ ବୃଦ୍ଧି ଦୃଷ୍ଟିରୁ ରାଜ୍ୟ ସରକାର ପକ୍ଷରୁ ଚଳିତ ପଞ୍ଚାୟତ ନିର୍ବାଚନ ନିମନ୍ତେ କଟକଣା ଜାରି କରିଥିଲେ ମଧ୍ୟ ଏହାକୁ ଉଲ୍ଲଘଂନ କରାଯାଇଥିବା ଜଣାପଡ଼ିଛି । ଏଭଳି ଘଟଣା ଗୁରୁବାର ଦିନ ଦେଖିବାକୁ ମିଳିଛି ଗଞ୍ଜାମ ଜିଲ୍ଲା ଦିଗପହଣ୍ଡି ବ୍ଲକ ଅନ୍ତର୍ଗତ କଇଠଖଣ୍ଡି ଗ୍ରାମ ପଞ୍ଚାୟତରେ । ଘଟଣାପରେ ବ୍ଲକ ପ୍ରଶାସନ ଅଧିକାରୀ ପହଞ୍ଚି ତାଗିଦ୍ କରିବା ସହ ପ୍ରସାଦ ଭୋଗ ଜବତ କରିଥିବା ଜଣାପଡ଼ିଛି । ଖବରନୁଯାୟୀ , ଆଜି ପଞ୍ଚାୟତ ନିର୍ବାଚନର ନାମାଙ୍କନ ପତ୍ର ଦାଖଲର ଚତୁର୍ଥ ଦିନରେ ଏକ ନିର୍ଦ୍ଦିଷ୍ଟ ଦଳର ପ୍ରାର୍ଥୀ ମାନେ ନିଜର ନାମାଙ୍କନ ଦାଖଲ ନିମନ୍ତେ ଗ୍ରାମରେ ପଟୁଆର ସହ ଗ୍ରାମ୍ୟ ପରିକ୍ରମା କରିବା ସହ ସ୍ଥାନୀୟ ଗ୍ରାମ ମନ୍ଦିରରେ ଏକ ହଜାରରୁ ଉର୍ଦ୍ଧ୍ବ ଲୋକଙ୍କ ପାଇଁ ପ୍ରସାଦ ସେବନ ଆଳରେ ପଲଉ ଭୋଗ ପ୍ରସ୍ତୁତି କରି ସେଗୁଡିକୁ ପ୍ୟାକେଟ କରି ଘରକୁ ଘର ବୁଲି ବଣ୍ଟନ କରିବା ପାଇଁ ସ୍ଥଗିତ ରଖିଥିଲେ । ତେବେ ସ୍ଥାନୀୟ ତହସିଲଦାର ସିପକ କୁମାର ପାତ୍ର ବିଶେଷ ସୁତ୍ରରୁ ଖବରପାଇ ସ୍ଥାନୀୟ ପୋଲିସ ସହାୟତାରେ ଗ୍ରାମରେ ପହଞ୍ଚି ପ୍ରସାଦ ଗୁଡ଼ିକୁ ଜବତ କରିଥିଲେ । ଏହାପରେ ଉକ୍ତ ପ୍ରସାଦକୁ ଆଣି ଚୈତନ୍ୟପୁର ଗ୍ରାମର ଅସହାୟ ଗରିବ ଲୋକଙ୍କୁ ବଣ୍ଟନ କରିଥିବା ଜଣାପଡ଼ିଛି । ଏଥିସହ ଉକ୍ତ ଗ୍ରାମର ଆୟୋଜକ ମାନଙ୍କୁ ତହସିଲଦାର ଓ ପୋଲିସ ଏଭଳି କାର୍ଯ୍ଯରୁ ବିରତ ରହିବାକୁ ତାଗିଦ୍ କରି ଫେରିଥିବା ଜଣାପଡିଛି ।
