ଗଞ୍ଜାମ ଜିଲ୍ଲା ଦିଗପହଣ୍ଡି ଥାନା ଆଙ୍କୋରଡା ଗ୍ରାମରେ ପାରିବାରିକ ବିବାଦରୁ ବାପା ଓ ପୁଅ ମଧ୍ୟରେ ଆକ୍ରମଣ ଓ ପ୍ରତି ଆକ୍ରମଣ ମାମଲାରେ ପୋଲିସ ଉଭୟଙ୍କୁ ଗିରଫ କରିଥିବା ଜଣାପଡ଼ିଛି । ଖବରନୁଯାୟୀ , ରବିବାର ମଧ୍ୟାହ୍ନ ପ୍ରାୟ ସାଢେ ୧୧ ଟାରେ ବାପା ପି. ଗଣପତି ଦୋରା ଓ ପୁଅ ପି . ରାମବାବୁ ଦୋରାଙ୍କ ମଧ୍ୟରେ କୈାଣସି କଥାକୁ ନେଇ ପାରିବାରିକ ବିବାଦ ଦେଖାଦେଇଥିଲା । ଯାହାଫଳରେ ବାପା ଗଣପତିଙ୍କୁ ତାଙ୍କ ସ୍ତ୍ରୀ ଏବଂ ତାଙ୍କ ପୁଅ ଏକ ଠେଙ୍ଗାରେ ମୁଣ୍ଡକୁ ଆକ୍ରମଣ କରିଥିଲେ । ବାପାଙ୍କ ପାଟି ଶୁଣି ଝିଅ ତପସ୍ଵିନୀ ଆସି ଛଡ଼ାଇବାରୁ ତାଙ୍କୁ ମଧ୍ୟ ସେମାନେ ସଂଘବଦ୍ଧ ଭାବେ ଠେଙ୍ଗାରେ ଆକ୍ରମଣ କରିଥିଲେ । ପରେ ଗଣପତି ଏବଂ ତାଙ୍କ ଝିଅ ତପସ୍ଵିନୀ ରାମବାବୁଙ୍କୁ ପ୍ରତି ଆକ୍ରମଣ କରିଥିଲେ । ଏନେଇ ଉଭୟପକ୍ଷ ଦିଗପହଣ୍ଡି ଥାନାରେ ଏତଲା ଦେଇଥିଲେ । ଏତଲାକୁ ଭିତ୍ତି କରି ପୋଲିସ ପୃଥକ ମାମଲା ରୁଜୁ କରି ତଦନ୍ତ ଚଳାଇଥିଲେ । ବାପା ଗଣପତି ଓ ଝିଅଙ୍କୁ ତାଙ୍କ ପୁଅ ପି.ରାମ ବାବୁ , ପି.ଶ୍ୟାମ ବାବୁ ଏବଂ ୨ ବୋହୁ ପି.ସୁଜାତା ଦୋରା , ପି.ପୁଷ୍ପାଞ୍ଜଳୀ ଦୋରା ଏବଂ ସ୍ତ୍ରୀ ନମିତା ସଂଘବଦ୍ଧ ଭାବେ ମରଣାନ୍ତକ ଆକ୍ରମଣ କରିଥିବା ଅଭିଯୋଗ ହୋଇଥିବା ବେଳେ ଅନ୍ୟପଟେ ଏମାନଙ୍କୁ ବାପା ଓ ଝିଅ ପାଲଟା ଆକ୍ରମଣ କରିଥିବା ମଧ୍ୟ ଅଭିଯୋଗ ହୋଇଛି । ଆହାତ ମାନଙ୍କୁ ଦିଗପହଣ୍ଡି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା । ସେଠାରୁ ଚିକିତ୍ସା ହୋଇ ଫେରିବା ପରେ ଉଭୟ ପକ୍ଷ ଥାନାରେ ପହଞ୍ଚି ଏତଲା ଦେଇଥିଲେ । ଏହି ମାମଲା ରେ ଅନ୍ୟ ଅଭିଯୁକ୍ତ ମାନେ ଫେରାର ଥିବା ପୋଲିସ ପକ୍ଷରୁ ସୂଚନା ଦିଆଯାଇଛି । ଏନେଇ ପୋଲିସ ପୃଥକ ଥାନା ମାମଲା ନଂ.୧୩୯/୨୨ ଏବଂ ୧୪୦/୨୨ ଅନୁସାରେ ଉଭୟଙ୍କୁ ଗିରଫ ପରେ କୋର୍ଟ ଚାଲାଣ କରିଥିଲା । ସେଠାରେ ଜାମିନ ଆବେଦନ ନାମଞ୍ଜୁର ହେବାରୁ ଉଭୟ ଅଭିଯୁକ୍ତଙ୍କୁ ଦିଗପହଣ୍ଡି ସବ୍ ଜେଲ ହାଜତକୁ ପଠାଇ ଦିଆଯାଇଛି ।