ମାଧ୍ୟମିକ ଶିକ୍ଷା ଦଶମ ଶ୍ରେଣୀ ବୋର୍ଡ ପରୀକ୍ଷାଫଳ ପ୍ରକାଶ ପାଇବା ପୂର୍ବରୁ ଜଣେ ଛାତ୍ରୀ ନିଜ ବନ୍ଦ କୋଠରୀ ଭିତରେ ଦେହରେ କିରୋସିନ ଢାଳି ଆତ୍ମହତ୍ୟା କରିଥିବା ଜଣାପଡିଛି । ଏଭଳି ଘଟଣା ଦେଖିବାକୁ ମିଳିଛି ଗଞ୍ଜାମ ଜିଲ୍ଲା ଦିଗପହଣ୍ଡି ବିଜ୍ଞାପିତ ଅଞ୍ଚଳ ପରିଷଦ ରାଣୀ ସାହି ପରିସରରେ । ମୃତକ ଛାତ୍ରୀ ଜଣକ ହେଲେ ଗଜପତି ଜିଲ୍ଲା କେସିଙ୍ଗା ଥାନା ଅନ୍ତର୍ଗତ ଖରଡା ଗ୍ରାମର କାଳିଆ ଜେନାଙ୍କ ନାବାଳିକା ଝିଅ କଳ୍ପନା ଜେନା (୧୫) । ଖବରନୁଯାୟୀ , ମୃତ ଛାତ୍ରୀଙ୍କ ଘର ଗଜପତିରେ ହୋଇଥିବା ବେଳେ ଗତ କିଛି ବର୍ଷ ପୂର୍ବେ ମାଆଙ୍କ ଦେହାନ୍ତ ହୋଇଥିଲା । ଏହାପରେ ପିତା କାଳିଆ ସିକ୍କିମ ରାଜ୍ୟରେ କାମ କରୁଥିବା ଯୋଗୁଁ ଝିଅକୁ ଦିଗପହଣ୍ଡିରେ ରହୁଥିବା ବଡବାପା ନରସିଂହ ଜେନାଙ୍କ ପାଖରେ ଛାଡି ଦେଇ ଚାଲି ଯାଇଥିଲେ । ପରେ ଛାତ୍ରୀ ଜଣକ ଦିଗପହଣ୍ଡି ନିକଟସ୍ଥ ପଦ୍ମନାଭପୁର ଶ୍ରୀଧାମ ଶିଶୁ ବିଦ୍ୟା ମନ୍ଦିର ହଷ୍ଟେଲରେ ରହି ପାଠ ପଢୁଥିବା ବେଳେ ଚଳିତ ବର୍ଷ ଦଶମ ବୋର୍ଡ ପରୀକ୍ଷା ମଧ୍ୟ ଦେଇଥିଲା । ତେବେ ପରୀକ୍ଷା ସରିବା ପରେ ଛାତ୍ରୀ ଜଣକ ନିଜ ବଡବାପା ଘରକୁ ଚାଲିଯାଇଥିବା ବିଦ୍ୟାଳୟ କତ୍ତୃପକ୍ଷ କହିଛନ୍ତି । ଏହି ଅବସରରେ ଆଜି ଛାତ୍ରୀ ଜଣକ କୈାଣସି କାରଣ ଯୋଗୁଁ ମଧ୍ୟାହ୍ନ ସାଢେ ୧୨ ସମୟରେ ନିଜ ଶୋଇବା ରୁମ୍ କବାଟ ବନ୍ଦ କରି ନିଜ ଦେହରେ କିରୋସିନ ଢ଼ାଳି ନିଆଁ ଲଗାଇ ଦେଇ ଆତ୍ମହତ୍ୟା କରିଥିଲେ । ଏହାର କିଛି ସମୟ ପରେ ବନ୍ଦ କୋଠରୀ ଭିତରୁ ଧୁଆଁ ବାହାରିବା ଦେଖି ସାହି ପଡୋଶୀ ଦୈାଡି ଯାଇ କବାଟ ଭାଙ୍ଗି ଦେଖିବା ବେଳକୁ କଳ୍ପନା ନିଆଁରେ ହୁତୁହୁତୁ ହୋଇ ଜଳୁଥିଲା । ଘଟଣାସ୍ଥଳରେ ଖବରପାଇ ଦିଗପହଣ୍ଡି ଦମକଳ ବାହିନୀ ପହଞ୍ଚି ନିଆଁକୁ ଆୟତ୍ତ କରିଥିଲେ ମଧ୍ୟ ଛାତ୍ରୀ ଜଣକ ପୋଡ଼ି ମୃତ୍ୟୁ ହୋଇଥିବା ଜଣାପଡିଛି । ଏହାପରେ ଦିଗପହଣ୍ଡି ଥାନା ପୋଲିସ ପହଞ୍ଚି ଅର୍ଦ୍ଧପୋଡ଼ା ଶବକୁ ଜବତ କରି ଅପମୃତ୍ୟୁ ମାମଲା ନଂ ୮/୨୨ ପ୍ରକାରେ ବ୍ରହ୍ମପୁର ଏମକେସିଜି ମେଡିକାଲକୁ ବ୍ୟବଚ୍ଛେଦ ନିମନ୍ତେ ପଠାଇଥିଲା । ଏହିଭଳି ଏକ ଅଭାବନୀୟ ଘଟଣା ପାଇଁ ସ୍ଥାନୀୟ ଅଞ୍ଚଳରେ ଏକ ଶୋକର ଛାୟା ଖେଳିଯାଇଛି । ଯେହେତୁ ଛାତ୍ରୀ ଜଣକ ଭଲ ପାଠ ପଢୁଥିବା ସହ ଚଳିତ ବର୍ଷ ପରୀକ୍ଷାରେ ୬୦୦ ମାର୍କରୁ ୪୨୧ ମାର୍କ ରଖି ବି-୧ଗ୍ରେଟ୍ ହାସଲ କରିଥିଲେ । ତେବେ ଛାତ୍ରୀ ଜଣକ ଏଭଳି ମୃତ୍ୟୁକୁ କାହିଁକି ନିଷ୍ପତ୍ତି ନେଲେ ତାହା ବର୍ତ୍ତମାନ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି । ମୃତ୍ୟୁର କାରଣ ଅସ୍ପଷ୍ଟ ରହିଥିବା ବେଳେ ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ପ୍ରକୃତ ଘଟଣା ଜଣାପଡିବ ବୋଲି ଥାନା ଅଧିକାରୀ ଦିପ୍ତୀରଞ୍ଜନ ବେହେରା ସୂଚନା ଦେଇଛନ୍ତି । ତେବେ ଛାତ୍ରୀଙ୍କ ଏଭଳି ଅକାଳ ମୃତ୍ୟୁରେ ଅଞ୍ଚଳବାସୀ , ବିଦ୍ୟାଳୟ କତ୍ତୃପକ୍ଷ ଏବଂ ଛାତ୍ରଛାତ୍ରୀ ମାନେ ଗଭୀର ଦୁଃଖ ପ୍ରକାଶ କରିଛନ୍ତି ।