Kiran Behera
ଗଞ୍ଜାମ ଜିଲ୍ଲା ଦିଗପହଣ୍ଡି ନଗର ଶାଖା ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ ପକ୍ଷରୁ ଶୁକ୍ରବାର ଦିନ ପବିତ୍ର ରାକ୍ଷୀ ପୂର୍ଣ୍ଣିମା ଉପଲକ୍ଷେ ଦେଶବାସୀଙ୍କୁ ସୁରକ୍ଷା ଦେଉଥିବା ସାମରିକ ବିଭାଗର କାର୍ଯ୍ୟରତ ବୀର ଯବାନଙ୍କ ପାଇଁ ରାକ୍ଷୀ ଓ ଶୁଭେଚ୍ଛା ପତ୍ର ସଂଗୃହୀତ କରାଯାଇଥିବା ଜଣାପଡିଛି । ଖବରନୁଯାୟୀ , ଭାଇ ଓ ଭଉଣୀର ପବିତ୍ର ସମ୍ପର୍କ ହେଉଛି ରକ୍ଷା ବନ୍ଧନ । ଭାଇ ନିଜ ଭଉଣୀକୁ ସୁରକ୍ଷା ଦେବା ପାଇଁ ଏହି ଦିନ ପାଳନ କରାଯାଇଥାଏ । ତେବେ ଭାରତୀୟ ସାମରିକ ବିଭାଗରେ କାର୍ଯ୍ୟରତ ବୀର ଯବାନ ମାନେ ନିଜ ରକ୍ତ ସମ୍ପର୍କ ଭଉଣୀମାନଙ୍କୁ ଛାଡି ଦେଶବାସୀଙ୍କ ସୁରକ୍ଷା ଲାଗି ସିମାନ୍ତ ଅଞ୍ଚଳରେ ଜଗି ରହିଛନ୍ତି । ଯାହାଫଳରେ ଆଜି ଏହି ପବିତ୍ର ସମ୍ପର୍କ ବଜାଇ ରଖିବା ପାଇଁ ଏବିଭିପି କର୍ମକର୍ତ୍ତା ମାନେ ଏହି ଅଭିଯାନ ମାଧ୍ୟମରେ ନିଆରା ପ୍ରୟାସ କରିଛନ୍ତି । ଏପରିକି କାର୍ଯ୍ୟକର୍ତ୍ତା ମାନେ ବିଭିନ୍ନ ମହାବିଦ୍ୟାଳୟ ଓ ଶିକ୍ଷା କେନ୍ଦ୍ର ଗୁଡ଼ିକରେ ପହଞ୍ଚି ଯବାନ ଭାଇଙ୍କ ପାଇଁ ରାକ୍ଷୀ ଓ ଶୁଭେଚ୍ଛା ଚିଠି ସଂଗ୍ରହ କରିଥିଲେ । ଏହି ଅଭିଯାନ ମାଧ୍ୟମରେ ବଡ଼ଖେମୁଣ୍ଡି ଓ ସାନଖେମୁଣ୍ଡି ଅଞ୍ଚଳରେ ଥିବା ଶିକ୍ଷାନୁଷ୍ଠାନ ତଥା ଖେମୁଣ୍ଡି ମହାବିଦ୍ୟାଳୟ , ବିଜୁ ପଟ୍ଟନାୟକ ମହିଳା ମହାବିଦ୍ୟାଳୟ , ପୋଡାମାରି ସ୍ଥିତ ଉଚ୍ଚ ମାଧ୍ୟମିକ ଶୈକ୍ଷିକ ବିଦ୍ୟାଳୟ , ଦିଗପହଣ୍ଡି ସ୍ଥିତ ଗ୍ରେଟ୍ ଏଜୁକେସନ୍ କୋଚିଂ ସେଣ୍ଟରରୁ ଯବାନଙ୍କ ପାଇଁ ଶତାଧିକ ରାକ୍ଷୀ ଓ ଶୁଭେଚ୍ଛା ପତ୍ର ସଂଗ୍ରହ କରଯାଇଛି । ଅନେକ ଛାତ୍ରୀମାନେ ଉତ୍ସାହ ସହକାରେ ଦେଶର ଯବାନ ଭାଇମାନଙ୍କୁ ରାକ୍ଷୀ ପ୍ରଦାନ କରିଥିଲେ ଏହି ଅଭିଯାନକୁ ଗଞ୍ଜାମ ବିଭାଗ ସୋସିଆଲ ମିଡ଼ି଼ଆ ପ୍ରମୁଖ ସୁନୀଲ କୁମାର ଦୋରା ଓ ଦିଗପହଣ୍ଡି ନଗର ସମ୍ପାଦକ ଅମିତ୍ କୁମାର ରଥ , ସହ ପ୍ରମୁଖ ହରିକୃଷ୍ଣ ଦୋରା , ବିଜୟ ସମେତ ଏହି ଅଭିଯାନର ସଂଯୋଜିକା ମୋନାଲିକା , ସୁନେନା ନନ୍ଦ ସମେତ ବହୁ ଛାତ୍ରୀ ଓ କାର୍ଯ୍ୟକର୍ତ୍ତା ମାନେ ସମସ୍ତ କଲେଜ ପରିସରରେ ପହଞ୍ଚି ରାକ୍ଷୀ ଓ ଶୁଭେଚ୍ଛା ପତ୍ର ସଂଗ୍ରହ କରି ପିଲାଙ୍କ ମନରେ ଦେଶ ଭକ୍ତି ସୃଷ୍ଟି କରିଥିଲେ ।
