Kiran Behera
ଗଞ୍ଜାମ ଜିଲ୍ଲା ଦିଗପହଣ୍ଡି ସାହାଣୀ ସାହିରେ ଶୁକ୍ରବାର ସକାଳେ ପୂର୍ବ ଶତ୍ରୁତାକୁ କେନ୍ଦ୍ର କରି ୨ ଗୋଷ୍ଠୀ ମଧ୍ୟରେ ରକ୍ତାକ୍ତ ସଂଘର୍ଷ ଘଟିଥିବା ଜଣାପଡିଛି । ଛୁରା ମାଡ଼ରେ ସୁଶାନ୍ତ ଦାସ ଗୁରୁତର ଆହାତ ହୋଇଥିବା ବେଳେ କାତି ଚୋଟରେ ସୁକାନ୍ତି ଦାସ ଏବଂ ମୁନା ଦାସ ଆହାତ ହୋଇଛନ୍ତି । ଆହାତ ମାନଙ୍କୁ ପ୍ରଥମେ ଦିଗପହଣ୍ଡି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା । ସେଠାରେ ପ୍ରାଥମିକ ଚିକିତ୍ସା ପରେ ସମସ୍ତ ଆହାତ ମାନଙ୍କୁ ବ୍ରହ୍ମପୁର ବଡ଼ ଡାକ୍ତରଖାନାକୁ ସ୍ଥାନାନ୍ତରିତ କରାଯାଇଛି । ସେହିପରି ବିପକ୍ଷ ଗୋଷ୍ଠୀର ଜଣେ ମହିଳା ଆହାତ ହୋଇଛନ୍ତି । ଉଭୟ ପକ୍ଷ ଦିଗପହଣ୍ଡି ଥାନାରେ ଏତଲା ଦେଇଛନ୍ତି । ପ୍ରାୟ ୪ ବର୍ଷ ପୂର୍ବେ ସାହିରେ ସୁଶାନ୍ତଙ୍କ ପରିବାରଙ୍କୁ ଜାତିଆଣ ବାସନ୍ଦ କରାଯାଇଥିଲା । ପରବର୍ତ୍ତୀ ଅବସ୍ଥାରେ ତାଙ୍କ ପରିବାରକୁ ସାହିରୁ ବିତାଡିତ କରାଯାଇଥିଲା । ପରେ କୁଳ ସଭା ଓ ଜାତିର ମୁଖିଆ ମାନଙ୍କ ନିଷ୍ପତ୍ତି କ୍ରମେ ସୁଶାନ୍ତଙ୍କ ପରିବାରଙ୍କୁ ୩୦ ହଜାର ଜରିମନା ଧାର୍ଯ୍ୟ କରାଯାଇ ଜାତିରେ ମିଶା ଯାଇଥିଲା । ଏନେଇ ସାହିରେ ୨ ଗୋଷ୍ଠୀ ମଧ୍ୟରେ ଚାପା ଉତ୍ତେଜନା ଲାଗି ରହିଥିଲା । ଶୁକ୍ରବାର ସକାଳେ ସୁଶାନ୍ତ ବାଇକ ଯୋଗେ ପରିବା କିଣିବାକୁ ଯାଉଥିବା ବେଳେ ପୂର୍ବ ଯୋଜନା ପ୍ରକାରେ ତାଙ୍କୁ ବିପକ୍ଷ ଗୋଷ୍ଠୀର ଲକ୍ଷ୍ମଣ ଦାସ ,ରାଜା ଦାସ , ଶିବ ଦାସ , କୃଷ୍ଣ ଦାସ , ସଞ୍ଜୟ ଦାସ , ଅହଲ୍ୟା ଦାସ , କୌଶଲ୍ୟା ଦାସ ,ପୁଷ୍ପ ଦାସ ପ୍ରମୁଖ ଛୁରୀ , ଠେଙ୍ଗା ଓ କାତିରେ ଘାତକ ଆକ୍ରମଣ କରିଥିଲେ । ଭାଇକୁ ସେମାନଙ୍କ କବଳରୁ ଉଦ୍ଧାର କରିବାକୁ ଯାଇଥିବା ଭଉଣି ସୁକାନ୍ତି ଏବଂ ଭାଇ ମୁନାଙ୍କୁ ସେମାନେ ସଂଘବଦ୍ଧ ଆକ୍ରମଣ କରିଥିବା ପୋଲିସ କହିଛି । ଅପରପକ୍ଷରେ ସୁଶାନ୍ତ ଏବଂ ମୁନାଙ୍କ ଆକ୍ରମଣରେ ୪ ଜଣ ଆହତ ହୋଇଥିବା ପୋଲିସର ପ୍ରାଥମିକ ତଦନ୍ତ ରୁ ଜଣାପଡ଼ିଛି । ଉଭୟ ପକ୍ଷଙ୍କ ଏତଲା କ୍ରମେ ପୋଲିସ ପୃଥକ ମାମଲା ରୁଜୁ କରିଛି। ଘଟଣାକୁ ନେଇ ସାହିରେ ଚାପା ଉତ୍ତେଜନା ଲାଗି ରହିଥିଲେ ମଧ୍ୟ ପରିସ୍ଥିତି ନିୟନ୍ତ୍ରଣାଧୀନ ଥିବା ଥାନା ଏସ୍ ଆଇ ବଳଭଦ୍ର ଗଣ୍ଡ ସୂଚନା ଦେଇଛନ୍ତି ।
