ପାଟପୁର ଥାନା ପୋଲିସ ପକ୍ଷରୁ ଗଞ୍ଜାମ - ଗଜପତି ସୀମାନ୍ତ ଅଞ୍ଚଳ ଟି . ଗୋବିନ୍ଦପୁର ପଞ୍ଚାୟତ ଅନ୍ତର୍ଗତ କୃଷ୍ଣପୁର ଏବଂ ଦଶେଇପୁର ନିକଟସ୍ଥ ଦୁର୍ଗମ ଜଙ୍ଗଲ ଅଞ୍ଚଳରେ ପୋଲିସ ପ୍ରଶାସନର ଉଦ୍ୟମରେ ୩ କୋଟି ଟଙ୍କାରୁ ଉର୍ଦ୍ଧ୍ଵ ବେଆଇନ ଗଞ୍ଜେଇ ଗଛ ପୋଡ଼ି ନଷ୍ଟ କରାଯାଇଥିବା ଜଣାପଡିଛି । ଖବରନୁଯାୟୀ , ମଙ୍ଗଳବାର ସକାଳେ ଗଞ୍ଜାମ ଜିଲ୍ଲା ଆରକ୍ଷୀ ଅଧିକ୍ଷକ ବ୍ରିଜେଶ ରାଏଙ୍କ ନିର୍ଦ୍ଦେଶକ୍ରମେ ପାଟପୁର , ଶେରଗଡ଼ ଓ ସୋରଡ଼ା ପୋଲିସ ପ୍ରଶାସନର ଉଦ୍ୟମରେ ଉକ୍ତ ଦୁର୍ଗମ ପାହାଡ଼ିଆ ଅଞ୍ଚଳରେ ଅତର୍କିତ ଚଢ଼ାଉ କରାଯାଇଥିଲା । ସାନଖେମୁଣ୍ଡି ତହସିଲଦାର ଶ୍ରୀନିବାସ ବେହେରାଙ୍କ ଉପସ୍ଥିତିରେ ଏହି ଗଞ୍ଜେଇ ପୋଡ଼ି ଅଭିଯାନରେ ଆସିକା ଏସଡିପିଓ ଉମାଶଙ୍କର ସିଂ , ପାଟପୁର ଥାନା ଅଧିକାରୀ ସବ୍ୟସାଚୀ ମଲ୍ଲ , ଶେରଗଡ଼ ଥାନା ଅଧିକାରୀ ମନୋଜ ପ୍ରଧାନ , ସୋରଡ଼ା ଥାନା ଅଧିକାରୀ ରମେଶ ଚନ୍ଦ୍ର ପ୍ରଧାନ ଓ ପୋଲିସ କର୍ମଚାରୀ ମାନେ ସାମିଲ ହୋଇଥିଲେ । ଏହିି ଚଢ଼ାଉ ବେଳେ ଅସାମାଜିକ ଯୁବକଙ୍କ ଦ୍ବାରା ପ୍ରାୟ ବେଆଇନ ଭାବେ ୩୦ ଏକର ସରକାରୀ ଜମିରେ ବିଛେଇ ହୋଇଥିବା ୧ ଲକ୍ଷରୁ ଉର୍ଦ୍ଧ୍ବ ଗଛକୁ ପୋଡ଼ି ନଷ୍ଟ କରାଯାଇଥିବା ଜଣାପଡ଼ିଛି । ଯାହାର ଆନୁମାନିକ ବଜାର ମୂଲ୍ୟ ୩ କୋଟି ଟଙ୍କାରୁ ଉର୍ଦ୍ଧ୍ବ ହେବ ବୋଲି ଥାନା ଅଧିକାରୀଙ୍କ ପକ୍ଷରୁ ସୂଚନା ଦିଆଯାଇଛି । ତେବେ ଅବକାରୀ ବିଭାଗ ଯେଉଁ କାର୍ଯ୍ୟ କରିବା କଥା ତାହା ପୋଲିସ କରି ଆସୁଛି । ତେଣୁ ଅବକାରୀ ବିଭାଗର ଏଭଳି ନିଷ୍କ୍ରିୟତା ଯୋଗୁଁ ପୋଲିସ ଏଭଳି ପଦକ୍ଷେପ ନେବାକୁ ବାଧ୍ୟ ହେଉଥିବା ଜଣାପଡିଛି । ଯାହାକୁ ନେଇ ଅବକାରୀ ବିଭାଗର କାର୍ଯ୍ୟଦକ୍ଷତା ଉପରେ ପ୍ରଶ୍ନବାଚୀ ସୃଷ୍ଟି କରୁଛନ୍ତି ଗ୍ରାମବାସୀ ।