ଗଞ୍ଜାମ ଜିଲ୍ଲା ଦିଗପହଣ୍ଡି ବ୍ଳକ ଅନ୍ତର୍ଗତ ବମକୋଇ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଅଧିନରେ କାର୍ଯ୍ୟରତ ଆଶାକର୍ମୀମାନେ ଗୁରୁବାର ଦିନ ୫ ଦଫା ଦାବି ପୂରଣ ନେଇ କାର୍ଯ୍ୟ ବନ୍ଦ ଆନ୍ଦୋଳନ ଡ଼ାକରା ଦେଇଥିଲେ । ଏପରିକି ସେମାନେ ସ୍ବାସ୍ଥ୍ୟକେନ୍ଦ୍ର କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିବା ସହ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଅଧିକାରିଣୀ ଶୁଚସ୍ମିତା ଚୌଧୁରୀଙ୍କୁ ଏକ ଦାବିପତ୍ର ପ୍ରଦାନ କରିଛନ୍ତି । ଭାରତୀୟ ମଜଦୁର ସଂଘ ଦ୍ୱାରା ପରିଚାଳିତ ଓଡ଼ିଶା ରାଜ୍ୟ ଆଶାକର୍ମୀ ସଂଘ ତରଫରୁ କର୍ମୀମାନେ ସେମାନଙ୍କ ଦୀର୍ଘଦିନର କାର୍ଯ୍ୟ ପୁରଣ ହୋଇନଥିବା ଯୋଗୁଁ ଆଜି ଏକତ୍ରିତ ହୋଇ ବିଭିନ୍ନ ଦାବି ସମୂହ ଯଥା ଜାତୀୟ ସ୍ବାସ୍ଥ୍ୟ ମିଶନକୁ ସ୍ଥାୟୀ ନିଯୁକ୍ତି , କର୍ମୀଙ୍କୁ ସରକାରୀ କର୍ମଚାରୀ ମାନ୍ୟତା ପ୍ରଦାନ , ପ୍ରୋତ୍ସାହନ ରାଶି ବଦଳରେ ମାସିକ ୧୮ ହଜାର ଟଙ୍କା , ଗୋଷ୍ଠୀ ଓ ପ୍ରାଥମିକ ସ୍ବାସ୍ଥ୍ୟ କେନ୍ଦ୍ରରେ ଆଶାଗୃହ ନିର୍ମାଣ , ସରକାରୀ ମାନ୍ୟତା ପ୍ରଦାନ ନଂ ଦେବା ଯାଏ ଅବସର ନେଉଥିବା କର୍ମଚାରୀଙ୍କୁ ଏକକାଳୀନ ୫ ଲକ୍ଷ ଓ ମାସିକ ୫ ହଜାର ଟଙ୍କା ଭତ୍ତା ଭଳି ଦାବିପତ୍ରରେ ଉଲ୍ଲେଖ କରିଛନ୍ତି । ରାଜ୍ୟ ସରକାର ଯଦି ଏଥିପ୍ରତି ଦୃଷ୍ଟି ନ ଦିଅନ୍ତି କିମ୍ବା ସମସ୍ୟାର ସମାଧାନ ନ କରନ୍ତି ତେବେ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ କାର୍ଯ୍ୟ ବନ୍ଦ ରଖିବାକୁ କର୍ମୀମାନେ ଦାବି କରିଛନ୍ତି । ଏହି ସମୟରେ ଆଶାକର୍ମୀ ସୁଜାତା ମହାରଣା , ରଶ୍ମୀତା ମହାପାତ୍ର , ତୁଳସୀ ରେଡ୍ଡୀ , ପ୍ରିୟମ୍ବଦା ଦୋରା , ଶାନ୍ତିଲତା ଚୌଧୁରୀ , ଲିପିକା ମିଶ୍ର , ନିବେଦିତା ଦାସ ସମେତ ବହୁ କର୍ମକର୍ତ୍ତା ଉପସ୍ଥିତ ରହିଥିଲେ ।