Swadhina Kumar Sahu
ବ୍ରହ୍ମପୁର ଅବକାରୀ ଗୁଇନ୍ଦା ବିଭାଗ ପକ୍ଷରୁ ଗୋଟିଏ ଟ୍ରକ ସମେତ ବିପୁଳ ପରିମାଣର ଗଞ୍ଜେଇ ଜବତ କରିବା ସହ ଜଣଙ୍କୁ ଗିରଫ କରାଯାଇଛି । ଗିରଫ ଅଭିଯୁକ୍ତ ଜଣଙ୍କ ହେଲେ ଉତ୍ତରପ୍ରଦେଶ ମୁରଦାବାଦ ଜିଲ୍ଲା ଚନ୍ଦଖେଡା ଗ୍ରାମର ମହମ୍ମଦ ରିଜୱାନ (୩୯) । ସୂଚନା ମୁତାବକ ଗଜପତି ଜିଲ୍ଲାର ବ୍ରହ୍ମପୁର ନିକଟସ୍ଥ ଜାତୀୟ ରାଜପଥ ଦେଇ ଉତ୍ତରପ୍ରଦେଶକୁ ଏକ ଟ୍ରକ ଯୋଗେ ବିପୁଳ ପରିମାଣର ଗଞ୍ଜେଇ ଚୋରା ଚାଲାଣ ହେଉଥିବା ଖବର ପାଇଥିଲା ଅବକାରୀ ଗୁଇନ୍ଦା ବିଭାଗ । ଏହାପରେ ଅବକାରୀ ଅଧିକାରୀଣି ଗିତାଞ୍ଜଳୀ ସାହୁଙ୍କ ନେତୃତ୍ୱରେ ଏକ ଟିମ ସହର ଉପକଣ୍ଠ ପୋକଡିବନ୍ଧ ଛକ ନିକଟରେ ଜଗି ରହିଥିଲେ । ଏହି ସମୟରେ ଟ୍ରକ (ୟୁପି ୨୧ ବିଏନ ୧୫୮୫) ଟି ଉକ୍ତ ରାସ୍ତା ଦେଇ ଆସୁଥିବା ବେଳେ ତାକୁ ଯାଞ୍ଚ କରିଥିଲେ । ଏହି ସମୟରେ ଟ୍ରକରୁ ୨୪୦ କିଲୋଗ୍ରାମ ଗଞ୍ଜେଇ ଜବତ କରିବା ସହିତ କେସ ନମ୍ବର ୯୬୯/୨୦୨୨-୨୩ ରେ ଏକ ମାମଲା ରୁଜୁ କରି ଅଭିଯୁକ୍ତ ଟ୍ରକ ଚାଲକଙ୍କୁ କୋର୍ଟ ଚାଲାଣ କରିଥିବା ଅବକାରୀ ଉପ ଆୟୁକ୍ତ ଡମ୍ବରୁଧର ଖଣ୍ଡା ସୂଚନା ଦେଇଛନ୍ତି ।
